Ekisodho 25:1-40
25 Jehovha wakavhunja Mosi kudari:
2 “Vhunjai Vaiziraeri kuti vandiviisire zvipo. Munodikana kunditorera zvipo ku mundhu wese anopa ngo mwoyo wese.
3 Imwimwi munodikana kuashira zvipo izvi kwavari: goridhi, no sirivha, no utare,
4 no uruji hwo bhurumu, hwo kupsukirikira, hwo kupsuka, hwakanaka, no ukuse* hwo mbuji,
5 no matovo akapsukirikira o vhuta, no matovo matete, no matabwa o muti wakavanga,*
6 mafuta o zvibani,* bharsamo rokuita ndirona mafuta o kuzoja, no rokuita ndirona rubani hunonuhira,
7 no mapuwe o onikisi, no mapuwe amweni okudira pa efodhi no okudira pa borosa ro paditi.
8 Ivona vanodikana kundiitira ndau yo kundinamatira. Inini ndinozogara pakati pavo.
9 Imwimwi munodikana kunasa kundivakira tabherinake no mujiyo jayo, mecinasa kutevejera zvese zvandiri kudari kumutatija.
10 “Ivona vanodikana kundiitira bhokiso ro matabwa o muti wakavanga.* Bhokiso iri rinodikana kuva no kovhadho* mbiri no meya jo kureba, kovhadho imwe no meya yo upambhi no kovhadho imwe no meya yo kukhwira.
11 Imwimwi munodikana kurinama ngo goridhi rakanasirihwa. Rinamenyi mukati no kunja. Imwimwi munodikana kuritendeneja mumbhiripiri maro mese ngo bote ro goridhi.
12 Imwimwi munodikana kuita zvibato* zvirongomuna zvo goridhi. Mozvinamira ngo panyezuru po makumbo marongomuna. Zvibato zviviri kudivi rimwe, zvibato zviviri kudivi rimweni.
13 Unodikana kuita mupingo jo matabwa o muti wakavanga.* Woinama ngo goridhi.
14 Imwimwi munodikana kunghwinisa mupingo iji, mu zvibato* zviri mu mativi maviri o bhokiso, kuti mukwanise kurithwara ngo mupingo iji.
15 Mupingo iyi, inodikana kugara iri mu zvibato* zvo bhokiso iri. Iyona aidikani kuvhiswa.
16 Mubhokiso iri, unodikana kudiremo mapuwe akaita tabwa o Ucapupu andinozokupekejari.
17 “Unodikana kuveza tapa yo goridhi rakanasirihwa, ino kovhadho mbiri no meya jo kureba, kovhadho imwe no meya yo upambhi.
18 Unodikana kuita makherubhi maviri o goridhi, weciita ngo kutaka ngo mariteru. Makherubhi aya unodikana kumadira ku mativi maviri o kumbhiri ko tapa yo bhokiso.
19 Nasirirai makherubhiwo, kuti umadire ku mativi maviri. Rimwe nga ini, rimweni kudivi rimweni ro kumbhiri ko tapa.
20 Makherubhi aya anodikana kufunungura mapapiro* awo maviri, ofukija tapa ngo mapapiro awo. Iwona anodikana kusotana. Kumeso kwawo kunodikana kusota pa tapa.
21 Unodikana kudira tapa panyezuru po Bhokiso. Mubhokisomo unodikana kudiremo mapuwe akaita tabwa ano Ucapupu, andinozokupekeja.
22 Inini ndinozokugumira, ndozobhuya na iwewe ndiri panyezuru po tapa. Pakati po makherubhi aya ari panyezuru po bhokiso ro Ucapupu, inini ndinozokuvhunja mutemo yese yaunodikana kuvhunja Vaiziraeri.
23 “Unodikanazve kuita meza yo matabwa o muti wakavanga.* Iyona inodikana kureba mutengo wo makovhadho maviri, yopambhama mutengo wo kovhadho imwe, yokhwira mutengo wo kovhadho imwe no meya.
24 Unodikana kuinama yese ngo goridhi rakanasirihwa. Wotendeneja mumbhiripiri mayo ngo bote ro goridhi.
25 Unodikana kuita bhande rinotendeneja mezeyo yese rakapambhama mutengo wo nyara. Irona rinodikana kuva no mapote maviri o goridhi, mudenga no pasi.
26 Unodikana kuita zvibato* zvirongomuna zvo goridhi, wozvidira mu zvikina zvirongomuna, ngo pasi pakakohomerehwa makumbo marongomuna.
27 Zvibato* izvi zvinodikana kudihwa phedo no bhande perapo monghwinisa mupingo muviri jiya kuti mukwanise kuthwara ndijona mezeyo.
28 Munodikana kuita mupingo jo matabwa o muti wakavanga,* mojinama ngo goridhi. Kuti mukwanise kuthwara ndijona mezeyo.
29 “Unodikanazve kuitazve paratu jayo, no kopo jayo, no jharo jayo, pomwe no zvibasiya zvayo kuti muzodururiremo doro ro mupiro. Unodikana kuzviita wecishandisa goridhi rakanasirihwa.
30 Nguva jese iwewe unodikana kudira pau pa mezepo javanoda kuita mupiro pamberi pangu.
31 “Iwewe unodikana kuita cigajikiro co zvibani* co goridhi rakanasirihwa. Cigajikiro co zvibani ici, unodikana kuita ngo kucitakira ngo mariteru. Murenje jaco, no njiki yaco, no matavi aco, no kopo jaco, no mafundo aco no mafirori aco, zvese zvinodikana kuva ciro cimwe cakabatana.
32 Cigajikiro co zvibani* ici, cinodikana kudihwa matavi matandhatu. Matavi matatu ngo divi rimwe, matavi matatu ngo divi rimweni.
33 Kopo ndhatu jinonga jakaithwa inga mafirori o mu amendowa, jinonga jiri pa davi riri ngo divi rimwe. Kopo iji jinonga jakaparajaniswa ngo mafundo no mafirori. Kopo jimweni ndhatu, jakaithwa inga mafirori o mu amendowa, jinonga jiri pa davi ro divi rimweni. Kopo iji jinonga jakaparajaniswavo ngo mafundo no mafirori. Izvi ndizvona zvinonga zvakaita matavi matandhatu anovha pa cigajikiro co zvibani.*
34 Pa njiki yo cigajikiro co zvibani, panodikana kuva no kopo murongomuna jakaita inga mafirori o mu amendowa joparajaniswa ngo mafundo no mafirori.
35 Pasi po matavi maviri o kutanga, anovhaya pa njiki yo cigajikiro co zvibani,* panodikana kuva no fundo. Pasi po matavi o cipiri, anovhaya pa njiki yo cigajikiro co zvibani, panodikana kuva no fundo rimweni. Pasi po matavi maviri o citatu, anovhaya ku njiki yo cigajikiro co zvibani, panodikana kuva no fundo rimwenizve. Izvi ndizvona zvinodikana kuithwa no matavi matandhatu ese anovhaya ku njiki yo cigajikiro co zvibani.
36 Mafundo no matavi pomwe no cigajikiro co zvibani,* zvese zvinodikana kuva ciro cimwe cakabatana, cakaithwa ngo goridhi rakanasirihwa. Cinodikana kuithwa ngo kutakihwa ngo mariteru.
37 Iwewe unodikana kuciitira zvibani* zvinomwe. Izvona zvikabwaka, zvinozovhenekera ndauyo yese inonga iri pamberi pazvo.
38 Zvokuvhisa ndizvona marota o turusida inonga yecibwaka no cokujima muriro, zvinodikana kuva zvo goridhi rakanasirihwa.
39 Unodikana kuita cigajikiro co zvibani* no mujiyo jaco jese, wecishandisa tarenta* rimwe ro goridhi rakanasirihwa.
40 Unofanera kuita zvese mukuzwirana no ndhungamiriro jo wakapuwa pawainga pa dundhu.
Masoko o Pasi
^ Kana: “mandhenga.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zvigabhu-gabhu.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kovhadho imwe inoezana no 44,5 yo masentimetro. Vonanyi Masoko Okuengejera B14.
^ Kana: “zviradhondo.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zviradhondo.”
^ Kana: “zviradhondo.”
^ Kana: “mapapa.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zviradhondo.”
^ Kana: “zviradhondo.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zvigabhu-gabhu.”
^ Kana: “zvigabhu-gabhu.”
^ Kana: “zvigabhu-gabhu.”
^ Kana: “zvigabhu-gabhu.”
^ Kana: “zvigabhu-gabhu.”
^ Kana: “zvigabhu-gabhu.”
^ Kana: “zvigabhu-gabhu.”
^ Tarenta rimwe rairema kiru jinokwana kuita 34,2. Vonanyi Masoko Okuengejera B14.
