Ekisodho 26:1-37
26 “Unodikana kuita tabherinake ngo 10 ro macira akanasirihwa ngo uruji hwakanaka no kukoswa; hwo bhurumu, hwokupsukirikira no hwo kupsuka. Unasirirevo makerubhi akaita ngo kurukihwa.
2 Jira rimwe ro tende rinodikana kureba mutengo wo 28 o makovhadho, rakapambhama mutengo wo makovhadho 4. Macira ese o tende anodikana kuva akaezana.
3 Macira mashanu o tende anodikana kubatanijwa pondhopo, osonwa akaita ngo kundandana. Macira mashanu amwenizve o tende, anodikanazve kubatanijwa pondhopo, osonwa akaita ngo kundandana.
4 Unodikana kuita muceka jo uruji hwo bhurumu, woudira ngo kumbhiri kunoperera mundandanda wo macira. Woitazve zvondhozvo no kumbhiri ko mundandanda umweni wo macira kuti kuzobatanijwe ndikona mundandanda muviri iji.
5 Unodikana kuita 50 o muceka wojidira pa jira ro tabherinake, woitazve 50 o muceka wojidira ngo kumbhiri ko jira rimweni ro tabherinake. Muceka iji, jinonga jakasotana panongaro pakabatanijwa macira.
6 Unodikana kuitazve 50 o zvikorokotejero* zvo goridhi zvokuzobatanija ndizvona macira o tabherinake. Tabherinake inozova ciro cimwe basi.
7 “Unodikanazve kuita macira ngo ukuse wo* mbuji yokaji kuti afukije tabherinake. Unodikana kuita 11 ro macira o tabherinake.
8 Jira rimwe na rimwe ro tabherinake, rinodikana kuva no 30 o makovhadho o kureba, no makovhadho 4 o upambhi. 11 ro macira aya ese anodikana kuva akaezana.
9 Unodikana kubatanija pamwepo macira mashanu o tende, wobatanijazve pamwepo macira amweni matandhatu. Jira ro citandhaturo, unodikana kuripeta ngo kumbeji ko tabherinake.
10 Unodikana kuita 50 o muceka wojidira kumbhiri ko jira ro tende. Woitazve 50 o muceka wojidira kumbhiri ko jira rimweni ro kupejisira ngo paanozobatanijwaro ndipona.
11 Unodikana kuita 50 o zvikorokotejero* zvo utare, uzvidire pa muceka kuti zvibatanije mativi o tabherinake. Iyona inozova ciro cimwe basi.
12 Matimbu anozosararo o macira o tende, anozoshanda inga munvuriri. Dimbu rimweni ro jira, rinozopakaikwa* rogara rakati rerere ngo sure ko tabherinake.
13 Divi rinozosara ro urebu hwo macira o tende, rinozogara rakati rerere rozova no kovhadho imwe ku divi rimwe nga rimwe ro tabherinake kuti riifukije.
14 “Unodikana kuita co kufukija tende wecishandisa dovo rakapsukirikira rovhuta. Panyezuru payo, unodikana kuifukija ngo dovo dete.
15 “Unodikana kuita aro jo kuita biravira ro tabherinake ngo matabwa o muti wakavanga,* woita ngo kujiimisa.
16 Aro imwe nga imwe inodikana kureba mutengo wo 10 ro makovhadho. Upambhi hwaro unodikana kuita kovhadho imwe no meya.
17 Aro imwe nga imwe, unodikana kuidira makumbo maviri. Iyi ndiyona njira yaunodikana kuita ndiyona aro jese jo kuita biravira ro tabherinake.
18 Unodikana kuita 20 o aro, wojidira ngo kumavhazuva ko tabherinake, jakasota kumavhazuveyo.
19 “Unodikana kuita 40 o zvigajikiro zvo sirivha, zvinozodihwa pasi po 20 o aro. Zvigajikiro zviviri zvinozodihwa pasi po aro imwe ino zvimakumbo zviviri. Zvimakumbo zviviri zvo aro zvinozonghwiniswa mukati mo mabovo o zvigajikiro zviviri. Unodikana kudira zvigajikiro zviviri, pasi po aro jese.
20 Kudivi ro kanjikazi ro tabherinake, unodikana kuita 20 o aro
21 no 40 o zvigajikiro zvajo zvo sirivha. Zvigajikiro zviviri zvinozodihwa pasi po aro imwe. Pa aro jese, imwe nga imwe inodikana kudihwa zvigajikiro zviviri.
22 Ngo sure ko tabherinake, kumavirira, unodikana kuita aro ndhandhatu.
23 Unodikana kuita aro mbiri jinozoshandiswa kuti jiite njiki jo zvikina zviviri zvo sure ko tabherinake.
24 Aro iji jinodikana kuvha pasi jiri mbiri mbhera panyezuru, pano cibato co kutanga. Panyezuru apa ndipona panozobatanijwa mativi maviri o aro iji. Aro mbiri iji jinodikana kuithwa zvondhozvo, joshanda inga njiki mbiri jo zvikina.
25 Unodikana kuita aro sere no zvigajikiro zvajo zvo sirivha zvinokwana kuita 16. Zvigajikiro zviviri zvinozodihwa pasi po aro imwe. Unodikana kudira zvigajikiro zviviri pasi po aro jese.
26 “Unodikana kuita hasha* jo muti wakavanga.* Hasha shanu jinodikana kudihwa ku aro jo divi rimwe ro tabherinake.
27 Hasha* shanu jinodikana kudihwa ngo divi rimweni ro tabherinake. Hasha shanu jinodikana kudihwa ngo divi ro kumavirira ko tabherinake ku biravira ro sure.
28 Hasha* yo pakati ngaidihwe pakati no pakati po aro yopiningija kuvha ku divi rimwe mbhera kudivi rimweni.
29 “Aro iji unodikana kujinama ngo goridhi, woita zvibato zvo* goridhi kuti munghwiniswe hasha* jiya. Unodikanavo kujinama ngo goridhi.
30 Unodikana kuvaka tabherinake mukuzwirana no zvawakakhombijwa pa dundhu.
31 “Unodikana kuita jira ngo uruji hwo bhurumu, hwo kupsukirikira, hwo kupsuka no hwakanaka no kukoswa. Unodikana kuriita rino mufananijo wo makherubhi akaita ngo kurukwa.
32 Unozoripakaika pa nyezuru po njiki murongomuna jo muti wakavanga* wakanamiwa ngo goridhi. Zvikorokotejero* zvo njiki iji zvinodikana kuva zvo goridhi. Njiki iji jinodikana kuimiswa pa zvigajikiro zvo sirivha.
33 Unodikana kupakaika jira iri ngo pasi po zvikorokotejero,* wotora bhokiso ro Ucapupu woringwinisa mukati sure ko jira. Jira iri rinozoparajanisa ndau Yakacena no ndau Yakacenesesa.
34 Unodikana kudira tapa yo kudumaija bhokiso ro Ucapupu mu ndau Yakacenesesa.
35 “Unodikana kudira meza ngo divi ro kunja ko jira no cigajikiro co zvibani* ngo divi ro kakusi ro tabherinake zvogara zvakasotana, wozodira meza kudivi ro kanjikazi.
36 Unodikana kuita jira ro kudira pa musuvo wo tende. Jira iri unozoriita ngo uruji hwo bhurumu, hwo kupsukirikira, hwo kupsuka no hwakanaka no kukoswa.
37 Itirai jira iri, njiki shanu jo muti wakavanga* wojinama ngo goridhi. Zvikorokotejero* zvo njiki iji zvinodikana kuva zvo goridhi. Wozoita zvigajikiro zvishanu zvo utare zvinonga zvakabovohwa pakati.
Masoko o Pasi
^ Zvokunghwinisira.
^ Kana: “mandhenga o.”
^ Zvokunghwinisira.
^ Kana: “rinozopaikwa.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “mbariro.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “mbariro.”
^ Kana: “mbariro.”
^ Kana: “zvikango zvo.”
^ Kana: “mbariro.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Zvokunghwinisira.
^ Zvokunghwinisira.
^ Kana: “zvigabhu-gabhu.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Zvokunghwinisira.
