Ekisodho 28:1-43
28 “Pakati po Vaiziraeri unodikana kudanija hama yako Aroni pamwepo no vana vake kuti ivona vandishandire inga vapiri. Danijai Aroni no vana vake Nadhabhi, Abhihu, Eriyazari na Itamari.
2 Unodikana kuitira hama yako Aroni nguvo yakaceneswa yoseja* no inomuita kuti akujwe.
3 Vhunjai vandhu vese vanoziva kuita zviro,* vaya vandakazaja ngo mujimu wo kuva no uzivi, kuti vaitire Aroni nguvo jinomuita kuti ave wakaceneswa kuti ashande inga mupiri wangu.
4 “Ngavaite izvi: borosa ro paditi, efodhi, nguvo yakareba icina mukono, nguvo yakareba yocenerukira,* dhuku no muceka. Ivona vanozoita nguvo iji jakaceneswa kuna Aroni no ku vana vake, kuti vazondishandire inga vapiri.
5 Vashandi ava vanozivari kuita zviro, vanodikana kushandisa goridhi, ruji hwo bhurumu, hwokupsukirikira, hwo kupsuka no hwakanaka.
6 “Vanodikana kunasirira efodhi vecishandisa goridhi, ruji hwo bhurumu, hwokupsukirikira, hwo kupsuka pomwe no ruji hwakanaka no kukoswa. Ivona vanodikana kuita ngo kuzviruka.
7 Efodhi iyi, inodikana kuva no mabhande maviri pa mapfuji,* anoibatanija no mativi ayo maviri, divi ro sure no ro kumbeji.
8 Muceka wakasonehwa pa efodhi iyi wokuisunga ndiwona, unodikana kuitwa ngo zviro zvondhozvo, goridhi, ruji hwo bhurumu, hwokupsukirikira, hwo kupsuka pomwe no ruji hwakanaka no kukoswa.
9 “Unodikana kutora mapuwe maviri o onikisi wotarepo mazina o vana vo Vaiziraeri.
10 Mazina matandhatu anodikana kutahwa pa buwe rimwe. Mazina amweni matandhatu anodikana kutahwa pa buwe rimweni mukuzwirana no makore avo, kuvhira dhodha mbhera mudoko.
11 Mundhu anotara mazina aya, anodikana kutara mazina o vana vo Vaiziraeri pa mapuwe maviri inga zvinoithwa ngo mundhu anotara magama pa cidhindo. Unodikana kunama mapuwe aya pa cibato co goridhi.
12 Mapuwe maviri aya anodikana kudihwa pamapfuji,* panotangira mabhande maviri o efodhi. Kuti ave mapuwe o ciceukijo ku vana vo Vaiziraeri. Aroni anodikana kuthwara mazina avo pa mapfuji* ake kuti aende nao pamberi pa Jehovha kuti ave ciceukijo.
13 Unodikana kuita zvibatiriro zvo goridhi,
14 no zvikurenti zviviri zvo goridhi zvakanasirihwa, zvakaita inga ruji hwakakoswa, wozvisungira pa zvibatiriro zvo goridhi.
15 “Vhunjai mundhu anonasirira macira, kuti anasirire borosa ro kutonga ro paditi. Borosa iri, rinodikana kunasirihwa ngo zviro zvakashandiswa pa kunasirira efodhi, ecishandisa goridhi, ruji hwo bhurumu, hwokupsukirikira, hwo kupsuka pomwe no ruji hwakanaka no kukoswa.
16 Rikambhera ngo kupetwa, rinodikana kuva no mativi marongomuna akaezana, rakapambhama mutengo wo nyara,* no kureba kwaro koitavo mutengo wo nyara.
17 Unodikana kuridira mapuwe. Iwona anodikana kurongwa ngo fira murongomuna. Fira yokutanga, ngaive no mapuwe aya: rubhi, topaziyo no esmerardha.
18 Fira yocipiri inodikana kuva no mapuwe aya: turkeza, safira no jaspe.
19 Fira yocitatu inodikana kuva no mapuwe aya: buwe ro reshemu,* agata no ametista.
20 Fira yocirongomuna, inodikana kuva no mapuwe aya: krizorito, onikisi no jadhi. Mapuwe ese aya, anozodihwa pa zvibatiriro zvo goridhi.
21 Mapuwe aya anozozwirana no mazina o 12 o vana vo Vaiziraeri. Buwe rimwe nga rimwe, rinodikana kutahwa, inga zvinoita mundhu anotara magama pa cidhindo. Zina rimwe nga rimwe, rinonga reciimirira vhumbo rimwe pa mavhumbo 12.
22 “Unodikana kuita zvikurenti zvo goridhi, zvakakoswa inga bote kuti zvibatirire borosa ro paditi.
23 Unodikana kuita zvibato* zviviri zvo goridhi, kuti uzvidire pa borosa ro paditi. Zvibato zviviri izvi, zvinodikana kugara muzvikina zviviri zvo pa borosa ro paditi.
24 Unodikana kunghwinisa zvikurenti zviviri izvi zvo goridhi, ngo mu zvibato* zviviri zviri kumbhiri ko borosa ro paditi.
25 Unodikana kutora kumbhiri ko zvikurenti zviviri zvo goridhi, wozvinghwinisa mu zvibatiriro. Zvibatiriro izvi, zvinodikana kunamihwa pa mapfuji* ngo panyezuru po efodhi.
26 Unodikana kuita zvibato* zviviri zvo goridhi, wozvidira muzvikina zviviri zvo borosa ro paditi ngo mukati, zvakacindana no efodhi.
27 Unodikana kuitazve zvibato* zviviri zvo goridhi. Izvona zvinodikana kudihwa ngo kumbeji ko efodhi, ngo pasi po mabhande maviri o efodhi akaenda pamapfuji* phedo no paanobatanijwaro, ngo panyezuru po muceka* wo kusunga ndiwona efodhi.
28 Kuti borosa ro paditi rigare pa ndau yaro, unodikana kusunga ngo muceka* wo bhurumu zvibato* zvo borosa ro paditi no zvibato zvo efodhi. Izvi, zvinozoita kuti borosa ro paditi rigare riri pa ndau yaro, pambeji po efodhi, ngo panyezuru po muceka wakasonehwa pa efodhi.
29 “Aroni anodikana kuthwara mazina o vana vo Vaiziraeri pa borosa ro kutongwa ro paditi, rakafukija paditi pake,* paanoenda mu ndau Yakacena, kuti nguva jese ciite ciceukijo pamberi pa Jehovha.
30 Unodikana kudira Urimi no Tumimi* pa borosa ro kutongwa ro paditi. Izvona ngazvive pa mwoyo wa Aroni paanoenda pamberi pa Jehovha. Aroni anodikana kuthwara mathurusi aya pamwoyo pake, pakuda kutonga Vaiziraeri nguva jese paanoenda pamberi pa Jehovha.
31 “Unodikana kuita nguvo icina mukono, inozosimihwa ngo mukati mo efodhi. Nguvo iyi, inodikana kurukwa yese ngo ruji hwo bhurumu.
32 Pakati payo panozobovohwa, kuti pazonghwiniswe ndipona musoro. Bovo iri rinodikana kubinyahwi, rosonehwa gora ngo mundhu anoziva kusona ushoni. Iyena anodikana kuritendeneja musipewo wese, rovanga inga nguvo yo simbi yo musoca kuti ritame kukasika kumweka.
33 Unodikana kuita zviro zvakatojana no mucero wo maromaa, wozviita ngo ruji hwo bhurumu, hwokupsukirikira no hwo kupsuka. Woitazve zvingindenginde zvo goridhi. Izvona zvinodikana kudihwa pakati po mucero yo maromaa, wozvisonera mumbhiripiri mo nguvo iyi, kakuitendeneja yese.
34 Unodikana kutendeneja nguvoyo yese mumbhiripiri mayo ngo mucero no zvingindenginde. Wecidira kuti apa cingindenginde co goridhi, apa mucero wo maromaa. Apa cingindenginde co goridhi apa mucero wo maromaa.
35 Nguvo iyi inodikana kusimihwa ndi Aroni paanonga eciita basa ro upiri. Kurira ko zvingindenginde izvi, kunozozika paanonga ecinghwina no kubuda mu ndau yakacena pamberi pa Jehovha, kuti iyena atame kufa.
36 “Unodikana kuita cibhande cinon’ganikira co goridhi rakanasirihwa. Wocitara inga zvinoithwaya ngo mundhu anotara magama pa cidhindo. Citarei magama aya: ‘Uceni ngo hwa Jehovha.’
37 Unodikana kucisungira pa dhuku ngo muceka wo bhurumu. Cibhande cinon’ganikira ici, cinodikana kugara ngo pambeji po dhuku.
38 Icona cinozogara pa huma ya Aroni. Aroni anozodavira kudari mundhu ari wese akashaisha kushandisa zviro zvakacena. Vaiziraeri vanodikana kuviisa zviro zvondhozvo inga zvipo zvakaceneswa kuna Mwari. Cibhande ici, cinozogara ciri pa huma ya Aroni kuti ivona vakwanise kutendehwa pamberi pa Jehovha.
39 “Unodikana kuita nguvo yakareba, yocenerukira* wecishandisa ruji hwakaseja.* Unodikana kuitazve dhuku ngo ruji hwakaseja no bhande ro nguvo.
40 “Unodikanazve kuita nguvo jakareba no mabhande no nguvo jo kufukija mu musoro mo vana va Aroni. Kuti ivona vakujwe no kuva vakaseja.*
41 Unozozvisimija hama yako Aroni no vana vake. Unodikana kuvazoja no kuvagaja* no kuvacenesa. Perapo ivona vanozoshanda inga vapiri vangu.
42 Vaitirei kamudura* kuti vafukije umitu hwavo. Kamudura iji jinodikana kuvha mu cihunu* mbhera mu makokovhi.
43 Izvi zvinodikana kusimihwa ndi Aroni no vana vake pavanonghwina mu tende yo musongano, kana pavanokhwedera phedo no artari pavanonga vecishandira mu ndau yakacena. Kuti ivona vatame kuva no ndava, vofa. Uwu unozogara uri mutemo kwavari no kumubarihwana yavo.
Masoko o Pasi
^ Kana: “yonyara.”
^ Gama ngo Gama: “vano mwoyo wakangwara.”
^ Kana: “yoita shadhrejhi.”
^ Makhaja.
^ Makhaja.
^ Makhaja.
^ Kana kuti, mutengo unokwana 22,2 yo masentimetro. Vonanyi Masoko Okuengejera B14.
^ Ariziviki kuti i buwe ro mukhaindinyi, kangaije buwe iri rinoda kunangira ambari, jasinto, opara kana turmarina.
^ Kana: “zviradhondo.”
^ Kana: “zviradhondo.”
^ Kana: “makhaja.”
^ Kana: “zviradhondo.”
^ Kana: “zviradhondo.”
^ Kana: “bhande ro mucihunu kana mumbhata.”
^ Kana: “makhaja.”
^ Zvikango.
^ Kana: “bhande ro mucihunu kana mumbhata.”
^ Gama ngo Gama: “mwoyo wake.”
^ Vonanyi Kudurujihwa ko Magama.
^ Kana: “yoshadhrejhi.”
^ Kana: “hwakanyara.”
^ Kana: “vakanyara.”
^ Gama ngo Gama: “no kuzaja nyara javo.”
^ Kana: “vaitirei nguvo yomukati.”
^ Vonanyi Kudurujihwa ko Magama.
