Ekisodho 29:1-46
29 “Kuti uvacenese kuti vashande inga vapiri kwandiri, unodikana kuita izvi: Torai cimwana co n’gombe* no mavhuta maviri acizivi kuremara,
2 pau jicina mbijo, pau jicina mbijo jakaita bhororindo jakaitwa ngo mafuta, no pau jicina mbijo jakaita bhororindo jakazojwa mafuta. Iwewe unodikana kuita pau iji ngo upfu wakaceta wo tirigu.
3 Jidirei mucitengu,* ujiviise kuno. Unodikana kuviyazve no cimwana co n’gombe* no mavhuta maviri.
4 “Unozoviya na Aroni no vana vake, pamusuvo wo tende yo musongano, wozovasambija ngo kumwa.
5 Unodikana kutora nguvo jiya, wosimija Aroni nguvo yakareba, no nguvo yakareba icina mukono,* no efodhi no borosa ro paditi, wonasa kuzvisunga ngo muceka wakanasa kusonehwa pa efodhi.
6 Iwewe unozomusunga dhuku mu musoro make, wodira pa dhuku citatijo cokujicenesa co kujipira.
7 Perapo torai mafuta okuzoja, womudururira panyezuru po musoro wake, womuzoja.
8 “Ukapeja kuita izvi, daninjai vana vake vakhwedere phedo, uvasimije nguvo jokureba.
9 Unodikana kusunga cihunu ca* Aroni no vana vake ngo muceka, wovadira cokufukija musoro wavo. Kuvhira pondhopo, basa ro upiri rinozova ravo. Uwu, unozova mutemo wo kwenda no kwenda. Iyi ndiyona njira yaunodikana kugaja ndiyona Aroni no vana vake kuti vashande inga vapiri.
10 “Iwewe unodikana kuviisa n’gombe yorume* pamberi po tende yo musongano. Aroni no vana vake vanozoicanjikira nyara pamusoro payo.
11 Urayai n’gombeyo pamberi pa Jehovha, pa musuvo wo tende yo musongano.
12 Bijai cikunwe mu sangi yo n’gombeyo, wozoja nyanga jo artari. Unodikana kudurura sangi yese inosararo mumbhiripiri mo artariyo.
13 Perapo torai mafuta ese ari pa maura, no mafuta ari pa ciropa, no shingamo* mbiri no mafuta ajo, wozvipisa pa artari kuti zvibude usi.
14 Asi nyama yo n’gombe yorume, no dovo rayo no manyongo* ayo, unodikana kuzvipisa pa muriro kunja ko akapamento. Unozova mupiro kuti zvishaishi zviregerehwe.
15 “Torai vhuta rimwe, perapo Aroni no vana vake vanozocanjikira nyara pamusoro po vhutero.
16 Unodikana kuriuraya, wotora sangi yaro woizuzira pa mativi ese o artari.
17 Unodikana kuceka-ceka nyameyo kuti iite matimbu. Wosuka maura no murenje* jaro. Wotora matimbuwo ese womandandanisa pamwepo no musoro.
18 Unodikana kupisa nyameyo yese, woita kuti ibude usi panyezuru po artari. Ici ndicona cipo co kupiswa cinoitihwa Jehovha cinonuhira ushoni.* Ndicona cipo cinopiswa ngo muriro cokuitira Jehovha.
19 “Perapo unodikana kutorazve vhuta rimweni rorume. Aroni no vana vake vanozoricanjikira nyara pa musoro paro.
20 Urayai vhutero wotora padoko sangi yaro, woidira kumbhiri ko njeve yo mukono muho ya Aroni. Perapo woidirazve kumbhiri ko njeve yo mukono muho wo vana vake. Wozodirazve kumbiri ko cikunwe cavo cikuru, co mukono wavo wo muho. No cikunwe cavo co soka co mukono wavo wo muho. Perapo unodikana kutora sangiyo woizuzira pa mativi ese o artari.
21 Unodikana kutorazve padoko sangi iri pa artari, wotorazve padoko mafuta o kuzoja, wozvifafaijira Aroni no nguvo jake. Unodikana kuzvifafaijirazve vana vake no nguvo javo, kuti iyena no nguvo jake pomwe no vana vake no nguvo javo, zvive zvakacena.
22 “Perapo torai mabembhe o vhuta rorume, no mushe waro wakanuna no mabembhe ari pa maura, no mabembhe ari pa ciropa, no shingamo* mbiri no mabembhe akona. Wotorazve no bandauko* ro mukono muho. Ngo kuti iri rinozova vhuta rorume ro kugaja ndirona mupiri.
23 Unodikana kutora pau jakaita bhororindo, no pau jakaita bhororindo jobovoka pakati, jakakanyiwa no mafuta jiri mucitengu co* pau jicina mbijo jiri pamberi pa Jehovha.
24 Unodikana kutora zviro zvese izvi wozvidira munyara ja Aroni no munyara jo vana vake. Perapo iwewe unodikana kuvaita kuti ivona vazinge zviro zvese izvi vecizviendesa kumbeji no sure, inga mupiro wo kuzingwa pamberi pa Jehovha.
25 Unodikana kuzvitora munyara mwavo wozvipisa pa artari pamwepo no zvipo zvo kupiswa. Ici cinozova cipo cinonuhira ushoni* cinodakajisa Jehovha. Ici icipo cinopiswa ngo muriro cinoitihwa Jehohva.
26 “Perapo unodikana kutora diti ro* vhuta rorume, rakapihwa pa kugaja Aroni, worizinga inga cipo co kuzingwa pamberi pa Jehovha. Izvi zvinozova zviro zvako.
27 Unodikana kucenesa zviro izvi: Diti* rakazingwa no bandauko* rakazingwa, rovhuta rorume rakapihwa pa kugaja Aroni no vana vake.
28 Zviro izvi zvinodikana kuva zva Aroni no vana vake, inga mutemo unozogara wecitevejwa ngo vana vo Vaiziraeri, mbhera narini. Ngokuti izvona, zvinozova zviro zvakacena zvinoviiswa ngo Vaiziraeri. Ndirona divi ravo rakacena ravanopa Jehovha inga zvipo zvo runyararo.
29 “Nguvo jakaceneswa ja Aroni jinozosimihwa ngo vana vake, pavanozozojwa, vogajwa inga vapiri sure kwake.
30 Mwana wa Aroni anozoita mupiri pa ndau pake, wozonghwina mu tende yo musongano kuti ashandire mundau yakacena. Anozosimira nguvo iji mukati mo jiku nomwe.
31 “Unodikana kutora nyama yo vhuta rorume ro kugaja ndirona mupiri, woibika mu ndau yakacena.
32 Aroni no vana vake vanozoha nyama yo vhutero, no pau iri mucitengu* pamusuvo wo tende yo musongano.
33 Ivona vanodikana kuha zviro zvakapihwa zvo kuripira zvishaishi zvavo, mu njiku yo kugajwa kwavo kuti vave vapiri no kuceneswa kwavo. Apana mundhu acikatendehwi* anodikana kuzviha. Ngokuti izviro zvakaceneswa.
34 Kudari pakasara nyama yo kugaja mupiri, no pau mbhera comangwana fumi, zvipisenyi ngo muriro. Azvidikani kuhiwa ngokuti zvakacena.
35 “Iwewe unodikana kuitira izvi Aroni no vana vake, mukuzwirana no zvandakakuvhunja. Unozopeja njiku nomwe kuti uvagaje inga vapiri.
36 Njiku jese unodikana kupira n’gombe yorume inga cipo cokufukija zvishaishi. Unodikana kucenesa artari ngo kuita mupiro uwu wo kufukija zvishaishi. Unodikanazve kuzoja artari ngo mafuta, kuti ive yakaceneswa.
37 Unodikana kupeja njiku nomwe weciita mupiro wo kufukija zvishaishi zvo artari. Unodikana kuicenesa kuti iyona ive yakacenesesa. Mundhu wese anoipsasa, anodikana kuva wakacena.
38 “Unodikana kugara weciita mupiro wo zviro izvi pa artari njiku jese: Mavhuta maviri o rume ano gore rimwe ro kubahwa.
39 Vhuta rimwe rorume, unoripira comangwanani. Rimweni woripira comadeko.
40 Paunopira vhuta rokutanga, unodikana kupiravo cogumi co mupimo wo efa* imwe co upfu hwakaceta wakavhenganijwa no divi ro cirongomuna ro himu* yo mafuta* akanaka o maorivha. Unodikana kupirazve divi rocirongomuna ro himu yo vhinyu.
41 Unozopirazve vhuta rocipiri comadeko,* pamwepo no upfu no vhinyu, zvakaezana no zvawapiraya comangwanani. Ici cinozova cipo cinonuhira cinodakajisa. Cipo cinoitihwa Jehovha ngo muriro.
42 Ici cinozova cipo co kupiswa cinoithwa nguva jese ngo mubarihwana yenyu yese pamberi pa Jehovha, pamusuvo wo tende yo musongano, pandinozoviyeyo kuzobhuya na iwewe.
43 “Pondhopo ndipona pandinozoenda koosongana no Vaiziraeri. Ndau yondhoyo inozoceneswa ngo simba rangu.
44 Ndinozocenesa tende yomusongano no artari, ndozocenesa Aroni no vana vake, kuti vakwanise kundishandira inga vapiri vangu.
45 Ndinozogara no Vaiziraeri ndozova Mwari wavo.
46 Ngo kudaro, vanozonasa kuziva kuti ndini Jehovha, Mwari wavo wakavabudisa munyika yo Ejipita kuti ndigare navo. Ndini Jehovha, Mwari wavo.
Masoko o Pasi
^ Kana: “buru; thoyo.”
^ Kana: “sesto.”
^ Kana: “buru, thoyo.”
^ Yainga nguvo yaisimihwa pacito padihwa efodhi.
^ Vonanyi Kudurujihwa ko Magama.
^ Kana: “kuviisa mukono wo n’gombe.”
^ Kana: “ndengero.”
^ Kana: “matuzvi.”
^ Divi rinotangira pa gogovhi mbhera pa sondo.
^ Kana: “cinotondhoja.” Gama ngo Gama: “cinozoroja.”
^ Murenje jo kumbeji.
^ Kana: “ndengero.”
^ Kana: “musesto yo.”
^ Kana: “cinotondhoja.” Gama ngo Gama: “cinozoroja.”
^ Kana: “dimbi ro; cikumbzaveto co.”
^ Dimbi; cikumbzaveto.
^ Murenje jo kumbeji.
^ Kana: “musesto.”
^ Gama ngo Gama: “munyikanja.” Kana kuti, wainga aciripi wo mbhuri ya Aroni.
^ Efa imwe inongwina ritru jinokwana kuita 22. Vonanyi Masoko Okuengejera B14.
^ Kana: “azeite.”
^ Himu imwe inongwina ritru jinokwana kuita 3,67. Vonanyi Masoko Okuengejera B14.
^ Gama ngo Gama: “zuva ravira asi akuto kwasvipa.”
