Ekisodho 30:1-38
30 “Itai artari kuti upisirepo rubani. Unodikana kuiita ngo muti wakavanga.*
2 Inodikana kuva no mativi marongomuna akaezana, kovhadho* imwe yo kureba, kovhadho imwe yo kupambhama no makovhadho maviri okukhwirira. Nyanga jayo jinodikana kubatana no artariyo.
3 Unodikana kuinama yese ngo goridhi rakanasirihwa. Uiname kunja no mukati no kuitendeneja yese kubatanija no nyanga jayo. Unodikanazve kuitendeneja ngo bote ro goridhi panyezuru payo.
4 Unodikana kuita zvibato* zviviri zvo goridhi wozvidira ngo pasi po bote ro goridhi mu mativi ayo o maviri. Mu zvibato izvi, ndimona munozonghwiniswa mupingo jo kuthwara artariyo.
5 Unodikana kuita mupingo jo matabwa o muti wakavanga,* woinama yese ngo goridhi.
6 Unodikana kutora artari woenda koidira kumbeji ko jira riri phedo no bhokiso ro Ucapupu ngo pambeji po tapa iri pa bhokiso ro Ucapapu pandinozosongana newe.
7 “Aroni anozopisa rubani unonuhira panyezuru po artari, kuti rubani uhu hubude ciusi panyezuru po artari mangwanani ese paanonga ecinasirira zvibani.*
8 Aroni anozopisirazve rubani co madeko,* paanonga ecienda koobasira zvibani. Ici cinozova cipo co rubani cinoitihwa Jehovha nguva jese ngo mubarihwana yenyu.
9 Mucadopisira pa artari iyi rubani hucikatendehwi nee cipo co kupiswa nee cipo co mucece.* Mucadururepozve mukhaindi uri wese wo zvipo zvo doro.
10 Aroni anodikana kudira sangi yo mupiro wo cishaishi panyezuru po nyanga jo artari kuti aicenese. Iyena anodikana kuita izvi kamwe pa gore ku mubarihwana yenyu yese. Artari, inozova yakacenesesa pamberi pa Jehovha.”
11 Perapo Jehovha wakati kuna Mosi:
12 “Nguva jese jaunoita mutariro weciverenga vana vo Vaiziraeri, umwe na umwe wavo anodikana kuviisa muripo wo kuripira upenyu hwake kuna Jehovha. Izvi zvinoithwa kuti ivona vatame kuwana dambujiko pavanonga veciverengwa.
13 Vandhu vese vanonga vakataririhwa, vanodikana kuviisa dimbu ro shekeri* ro buwe rokupima sirivha rinoanja kushandiswa mu ndau yakacena.* Shekeri imwe inoezana no 20 o jhera.* Dimbu ro shekeri* rinozopihwa kuna Jehovha.
14 Mundhu wese anotaririhwa anonga ano 20 o makore kwenda nyezuru, anodikana kuviisa mupiro kuna Jehovha.
15 Mupfumi aadikani kuviisa zvizinji kupindirija dimbu ro shekeri.* Nee murombo, aadikani kuviisa zvishoma zvicikakwani shekeri, inga mupiro kuna Jehovha kuti aponese upenyu hwake.*
16 Unodikana kutora mare yo Vaiziraeri, mare yokuponesa upenyu hwavo, uishandise pa basa ro pa tende yo musongano, kuti Jehovha kangaije aceukije Vaiziraeri.”
17 Jehovha wakavhunjazve Mosi kuti:
18 “Itai basiya ngo utare no zvigajikiro zvaro ngo utare, wozoridira pakati no pakati po tende yo musongano no artari, wodiremo kumwa.
19 Aroni no vana vake, vanozosambiremo makumbo avo no nyara.
20 Ivona pavanozonghwina mu tende yo musongano no pavanozokhwedera phedo no artari kuti vashandirepo, vecipekeja zvipo zvokupiswa kuna Jehovha, ivona vanozosamba makumbo avo no* nyara kuti vatame kufa.
21 Vanozosamba nyara javo no soka* kuti vatame kufa. Uwu, unozova mutemo unozogara kwenda no kwenda kwavari kuvhira ku vana vavo mbhera ku mubarihwana yese.”
22 Jehovha wakaenderera mberi ecivhunja Mosi kuti:
23 “Torai zviro zvinonuhira zvakadari inga: 500 o mashekeri o mira, 250 o mashekeri o sinanomi anotapira, 250 o mashekeri o karamusi anonuhira
24 no 500 o mashekeri o mukhaindi umweni wo sinamoni.* Imwimwi munodikana kushandisa buwe ro kupima sirivha, rinoanja kushandiswa mu ndau yakacena, pomwe no himu* imwe yo mafuta o maorivhe.*
25 Torai zviro izvi uite ndizvona mafuta akaceneswa o kuzoja ndiwona. Mafutewo, anodikana kunasa kunasirihwa ushoni.* Iwona anozova mafuta akaceneswa okuzoja ndiwona.
26 “Unodikana kuzoja ndiwona tende yo musongano no bhokiso ro Ucapupu.
27 Unozozojazve meza no mujiyo yayo yese; cibani* no mujiyo yaco yese; pomwe no artari yokupisira zvinonuhira.
28 Unodikanazve kuzoja artari yo zvipo zvokupiswa no mujiyo jayo jese, wozojazve basiya no zvigajikiro zvaro zvese.
29 Unodikana kuzvicenesa kuti zvive zvakacenesesa. Mundhu wese anozvipsasa, anodikana kuva wakacena.
30 Unozozoja Aroni no vana vake, wovacenesa kuti vazoshande inga vapiri kwandiri.
31 “Unodikana kuvhunja Vaiziraeri kudari: ‘Mafuta aya, anodikana kwenderera mberi ari mafuta okuzoja akaceneswa kwandiri, ku mubarihwana yese.
32 Mafuta aya, aadikani kuzohwa ngo mundhu ari wese. Imwimwi amudikani kuita mafuta akadoezana na aya. Iwona akacena, anodikana kuramba akacena kwamuri.
33 Mundhu wese anoita mafuta akadotojana na aya, womazoja mundhu acikatendehwi,* anodikana kuurawa.’”
34 Tevere, Jehovha wakavhunja Mosi kuti: “Torai mutengo wakaezana wo zviro izvi zvinonuhira: madondhojwe o sitoraki, madondhojwe o onika, madondhojwe o garibhano anonuhira no madondhojwe o ribhano acikazivi kuvhenganijwa no ciri cese.
35 Shandisai zviro izvi pakuita rubani. Izvona zvinodikana kunasa kuvhenganijwa ushoni, zvorungwa ngo munyu ucizivi kuvhenganijwa no ciri cese, perapo zvova zviro zvakaceneswa.
36 Unozodikana kutora divi rawo, worikwiya-kwiya woita upfu wakaceta, wotora padoko wodira pambeji po bhokiso ro Ucapupu mu tende yo musongano pandinozojivonesa kouri. Iwona unodikana kuva wakacenesesa komuri.
37 Mucadoita rubani wakatojana na uhu kuti muhushandise pacenyu. Rubani wakadari inga uhu, wakacenesehwa Jehovha.
38 Mundhu wese anoita rubani hwakatojana na uhu kuti azwe kunuhira kwaho, anodikana kuurawa.”
Masoko o Pasi
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kovhadho imwe inoezana no 44,5 yo masentimetro. Vonanyi Masoko Okuengejera B14.
^ Kana: “zviradhondo.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zvigabhu-gabhu.”
^ Zuva no ravira, asi kucito kwaausiku.
^ Kana: “Mbhumbha.”
^ Shekeri imwe yairema 11,4 g. Vonanyi Masoko Okuengejera B14.
^ Jhera rainga rakaezana no kiru jinokwana kuita 0,57. Vonanyi Masoko Okuengejera B14.
^ Kana: “ro shekeri yakaceneswa.”
^ Shekeri imwe yairema 11,4 g. Vonanyi Masoko Okuengejera B14.
^ Shekeri imwe yairema 11,4 g. Vonanyi Masoko Okuengejera B14.
^ Gama ngo Gama: “akumbire kuregerehwa zvishaishi zvake.”
^ Kana: “ivona vanozophoza no kusamba.”
^ Kana: “kuphoza.”
^ Kana: “kasiya.” Vonanyi Kudurujihwa ko Magama.
^ Himu imwe, inonghwina ritru jinokwana kuita 3,67. Vonanyi Masoko Okuengejera B14.
^ Kana: “o azeite.”
^ Kana kuti, inga zvinoitwa ngo muzivi anonasa kuita ushoni mafuta anonuhira.
^ Kana: “zvigabhu-gabhu.”
^ Gama ngo Gama: “munyikanja.” Kana kuti, wainga aciripi wo mbhuri ya Aroni.
