Ekisodho 33:1-23
33 Jehovha wakavhunjazve Mosi kudari: “Endai no vandhu vawakabudisa mu nyika yo Ejipita. Uende kunyika yandakagondesa Abhirahama, na Izaki na Jakobe ndeciti: ‘Inini ndinozoipa mubarihwana wako.’
2 Ndinozotumira ngirozi pambeji penyu, ndogogomera Vakhanani, Vaamori, Vahiti, Vaperezi, Vahivhi no Vajebhusi.
3 Endanyi ku nyika inopopoma mukaka* no uci. Asi inini andizoendi na imwimwi. Ngokuti imwimwi muri vandhu vakavanga musoro. Kangaije ndingazomuuraya muciri mugwanja ndikaenda na imwimwi.”
4 Vandhu pavakazwa magama aya akavanga, vakatanga kucema.* Akunazve na umwe wavo wakasimira zvinemeso zvake.
5 Jehovha wakavhunja Mosi kudari: “Vhunjai Vaiziraeri kuti: ‘Imwimwi muri vandhu vakavanga musoro. Kudari nondaizopinda ngo pakati penyu, ndaizomuuraya ngo kukasika. Wari mucasimira zvinemeso zvenyu pandicapsaka zvandinoda kumuitira.’”
6 Ngo kudaro, kutangira pa Dundhu ro Horebhi, Vaiziraeri avazivizve kusimira* zvinemeso zvavo.
7 Mosi wakatora tende yake, woenda kooiimisa kunja ko akampamento. Ikona kwainga ndhambo padoko no akampamento. Perapo woidanija kuti itende yo musongano. Mundhu wese waida ndhungamiriro inovha kuna Jehovha, waiyenda mu tende yo musongano, kunja ko akampamento.
8 Mosi paaiyenda mu tende, vandhu vese vaimuka voima pa musuvo jo tende javo. Ivona vaimusotesesa mbhera anghwine mutende.
9 Mosi paaindonghwina mutende, gore raibzuka, rogara pa musuvo wo tende, Mosi paainga ecibhuya na Mwari.
10 Vandhu vese pavaivona gore rakaima pa musuvo wo tende, umwe na umwe wavo waigwadama pamusuvo wo tende yake.
11 Jehovha waibhuya na Mosi, meso ngo meso. Inga zvinoithwa ngo mundhu ecibhuya no mundhu umweni. Mosi paaiviya mu akampamento ecivha ku tende, Joshuwa mwana wa Nuni, aacaibudepi patendepo. Joshuwa wainga mushandiri no mubeseri wa Mosi.
12 Mosi wakavhunja Jehovha kudari: “Vonanyi! Imwimwi muri kundivhunja kuti, ‘Tungamirirai vandhu ava,’ asi imwimwi amuzivi kundivhunja kuti ndinozoenda naani. Kusiyapo zvondhozvo mandivhunja kuti, ‘Ndinokuziva ngo zina rako. Iwewe wawana unyasha pamberi pangu.’
13 Ndapota, kudari ndawana unyasha pamberi penyu, nditatijenyi makwanja enyu. Kuti inini ndimuzive no kwenderera mberi ndeciwana unyasha pamberi penyu. Ceujanyizve kuti jinja iri ngo renyu.”
14 Iyena wakadavira kudari. “Inini kamare ndinozoenda na iwewe. Ndinozokuzoroja.”
15 Mosi wakadavira kudari: “Kudari mukatama kwenda na itusu, mucatibudisavo pano.
16 Vandhu vanozozvizivisa kudini kuti tawana unyasha pamberi penyu, inini no vandhu venyu? Asipi ngo kwenda kwenyu na itusu kuti vavone kuti itusu takasiyana no vandhu vese vari munyika?”
17 Jehovha wakavhunja Mosi kudari: “Ndinozoitazve zviro zvawakumbirari, ngokuti iwewe wawana unyasha pamberi pangu. Inini ndinokuziva ngo zina.”
18 Waro Mosi wakati: “Ndapota, nditatijenyi nduma yenyu.”
19 Iyena wakadavira kudari: “Ndinozoenda kumbeji kwako ndozokuvonesa kunaka kwangu kwese. Ndinozozivisa zina rangu ro kuti Jehovha pamberi pako. Ndozoitira unyasha, wandinoda kuitira unyasha. Ndozoitira pena wandinoda kuitira pena.”
20 Iyena wakanangazve kudari: “Iwewe audikani kuvona kumeso kwangu. Ngokuti akuna mundhu anovona kumeso kwangu wotama kufa.”
21 Jehovha wakatizve: “Vonai, pano ndau phedo na inini. Imai panyezuru po buwe.
22 Kun’ganikira kwangu pakunopinda ngo pondhopo, inini ndinozokudira mubako ro buwe. Ndokufukija ngo nyara yangu. Mbhera ndipinde.
23 Perapo inini ndinozovhisa nyara yangu. Iwewe wovona musana wangu. Asi kumeso kwangu auzokuvoni nee padoko.”
