Ekisodho 34:1-35
34 Jehovha wakati kuna Mosi: “Cecai mapuwe akaezana no okutanga ayani. Inini ndinozotara pa mapuwe aya magama andainga ndakatara pa mapuwe o kutanga ayani awakaphwanyaya.
2 Nasirirai ngokuti mangwana comangwanani, unozoenda pa Dundhu ro Sinai, wozoima pamberi pangu, panyezuru po dundhupo.
3 Asi akuna mundhu anodikana kukhwira na iwewe. Pa ndau iri yese yo dundhu, apadikani kuwanika mundhu. Nee vhuta, nee n’gombe, azvidikani kuhava pamberi po dundhupo.”
4 Ngo kudaro, Mosi wakaceca mapuwe maviri akaezana no o kutanga ayani. Perapo, wakamuka comangwanani wokhwira ku Dundhu ro Sinai inga zvaakavhunjwa ndi Jehovha. Iyena wakaenda no mapuwe maviri munyara.
5 Ngo kudaro, Jehovha wakabzuka ari mugore, woenda koima pondhopo naye, wozivisa zina rake Jehovha.
6 Jehovha wakapinda ngo kumbeji kwake, eciti: “Jehovha, Jehovha! Mwari ano usizi no unyasha, anononoka kunyangajwa, wakazara ngo rudo hucikacinji no wo cokwadi.
7 Iyena anokhombijira vandhu vazinji rudo ucikacinji, anoregerera kukhanganisa, kuposa no zvishaishi. Aazoregeri kupangira mushaishi. Ngokuti anoita kuti zvishaishi zvakaithwa ngo majibaba, zvitambuje vana, no vazukuru, mbhera mubarihwana wo citatu no wocirongomuna.”
8 Ngo kukasika, Mosi wakagwadama wokotama.
9 Iyena wakati: “Jehovha! Kudari mukandiitira unyasha, ndapota Jehovha, ivanyi pakati pedu, tiyende tese, pikija tiri vandhu vakavanga musoro. Regereranyi kuposa kwedu, no zvishaishi zvedu. Titenderenyi kuti tive vandhu venyu.”
10 Jehovha wakapingura kuti: “Ndiri kuita citenderano na imwimwi. Ndinozoitira vandhu vako vese zviro zvinoshamaisa, zvicito zvamboitika pasi pese, nee ku majinja. Vandhu vese vaunozogara navo vanozovona mabasa angu. Ngokuti zviro zvandinokuitira zvinoshamaisa.
11 “Nasai kuzwa zvandiri kukuvhunjari nyamasi. Inini ndinozogogomera pamberi pako Vaamori, Vakhanani, Vahiti, Vaperezi, Vahivhi no Vajebhusi.
12 Bhasopai kuti utame kuita citenderano no vandhu vanogara ku nyika yauri kwendaro. Kuti izvi zvitame kuva murau kwamuri.
13 Asi imwimwi munodikana kuphwanya artari javo, munodikana kuphwanya-phwaya njiki jo buwe jakaceneswa, no kuguragura njiki jo muti jakaceneswa.*
14 Audikani kugwadama pamberi pa mwari umweni ngokuti Jehovha Mwari wako anozivika kuva Mwari anodikana kunamatwa ega basi. Hina! Iyena ndi Mwari anoda kunamatwa ega basi.
15 Bhasopanyi kuti mutame kuita citenderano no vagari vo nyikeyo. Ngokuti pavanonga veciita cishaishi ngo kunamata* zvimwari zvavo no kuita mupiro, vanozokudanija kuti wendevo koha zviro zvinongaro zvapihwa.
16 Ngo kudaro, vana vako vanozoenda korovora vana vavo. Vasikane ava vanozoita uhure no zvimwari zvavo zvoita kuti vana vako vaitevo uhure no zvimwari zvavo.
17 “Amudikani kuita zvimwari zvo simbi.
18 “Imwimwi munodikana kuita Mutambo wo Pau Jicina Mbijo. Munozoha Pau Jicina Mbijo inga zvandakamuvhunja. Munodikana kuita izvi mukati mo njiku nomwe pa nguva yakagajwa yo mweji wa Abhibhi.* Ngokuti ndiwona mweji wa Abhibhi, wamakabuda ndiwona mu nyika yo Ejipita.
19 “Matangwe ese orume* anobahwa pamuzi pako, nghangu. Kubatanijavo no matangwe ese o mushambi, nghangu. Ingava n’gombe yorume* kana vhuta rorume.
20 Munodikana kuripira dangwe ro mbongoyo. Munodikana kuriripira mecishandisa vhuta kuti rigare pa ndau yo mbongoyo. Kudari mukatama kuita mupiro wo vhuta, munodikana kugura musipa wo mbongoyoyo. Vana vese vo dangwe vari pa mbhuri yenyu, vanodikana kuripihwavo. Apana na umwe wenyu anoviya kwandiri acina ciro.
21 “Imwimwi munodikana kushanda mukati mo njiku ndhandhatu. Asi munodikana kuzorora* mu njiku yo cinomwe. Munozozorora pikija iri nguva yo kurima* no nguva yo kukotora.
22 “Munodikana kuita mutambo jo Sumana mecishandisa mucero jamunozotanga kukotora jo tirigu. Mozoita mutambo jo kukotora ko kupejisira kogore.
23 “Pa gore, vanarume vese vanodikana kwenda katatu pamberi pa Jehovha, Mambo wo cokwadi, Mwari wo Vaiziraeri.
24 Ndinozogogomera vo majinja pakati penyu. Ndinozoengejera ndau yenyu. Pamunozoenda pa mberi pa Jehovha, Mwari wenyu katatu pa gore, apana anozoemura nyika yenyu.
25 “Amudikani kuita mupiro jangu mecishandisa sangi pamwepo no zviri zvese zvino mbijo. Mupiro wo mutambo wo Phasika, audikani kuejehwa usiku hwese mbhera comangwanani.
26 “Unodikana kuviisa mucero jaushoni jinotanga kuivha mu maminda ako, ku nyumba ya Jehovha, Mwari wako.
“Audikani kubika cimwana co mbuji* ciciri kumwa mukaka.”*
27 Jehovha wakavhunjazve Mosi kudari: “Iwewe unodikana kutara magama andaperari kukuvhunja. Ngokuti ngo magama aya, inini ndiri kuita citenderano na iwewe pamwepo no Vaiziraeri.”
28 Iyena wakagara na Jehovha mu njiku jinokwana kuita 40, usiku no masikati. Aazivi kuha ciri cese nee aazivi kumwa kumwa. Iyena wakatara pa mapuwe, magama o citenderano. Magama aya Igumi ro Mutemo.
29 Ngo kudaro, Mosi wakabzuka mu Dundhu ro Sinai. Iyena wainga akabata mapuwe maviri o Ucapupu. Mosi paaibzuka, ganda ro kumeso kwake rain’ganikira maningi ngokuti wainga avha kubhuya na Mwari. Asi iyena aacaizvizivepi.
30 Aroni no Vaiziraeri vese pavakavona Mosi, ivona vakavona kuti ganda ro kumeso kwake rain’ganikira. Ngo kudaro vakathya kumukhwederera phedo.
31 Asi Mosi wakavadanija. Ngo kudaro, Aroni no madhodha ese o gungano, akamukhwederera, perapo Mosi wobhuya navo.
32 Pasure pazvo, Vaiziraeri vese vakakhwedera kwaari. Iyena wakavavhunja mupango yese, yaainga akavhunjwa ndi Jehovha pa Dundhu ro Sinai.
33 Mosi Paaipera kubhuya na ivona, waifukija kumeso kwake.
34 Asi Mosi paaiyenda pamberi pa Jehovha waivhisa nguvo iya mbhera apeje kubhuya naye. Pasure pazvo waivhunja Vaiziraeri mupango yese yaainga akaashira.
35 Vaiziraeri vaivona ganda* ra Mosi recin’ganikira. Ngo kudaro, Mosi waifukija kumeso kwake ngo nguvo, mbhera ahwirirezve kobhuya na Mwari.
Masoko o Pasi
^ Vonanyi Kudurujihwa ko Magama.
^ Gama ngo gama: “ngo kuhura no.”
^ Vonanyi Masoko Okuengejera. B15.
^ O vandhu.
^ Mukono.
^ Kana: “kungwarira Sabudu.”
^ Kana: “kutipura; kuphanda.”
^ Kana: “kubika cirengana.”
^ Kana: “mahe.”
^ Kana: “dovo.”
