Ekisodho 35:1-35
35 Tevere, Mosi wakaunganija gungano rese ro Vaiziraeri, wovavhunja kudari: “Jehovha wakananga kuti zviro izvi zvinodikana kuti zviithwe.
2 Imwimwi munozoita mabasa enyu ese mukati mo njiku ndhandhatu. Asi njiku yocinomwe, inozova yakaceneswa kwamuri; Sabudu ro kuzorora kamare kuna Jehovha. Mundhu wese anoita ciri cese mu njiku iyi, anodikana kuurawa.
3 Amudikani kubwakija muriro pari pese hapo pamunonga muriwaro, mu njiku yo Sabudu.”
4 Tevere, Mosi wakavhunja gungano rese ro Vaiziraeri kudari: “Jehovha wananga kudari:
5 ‘Unganijanyi zviro zvokupekeja Jehovha zvamunazvo. Mundhu wese ano mwoyo unoda, ngaaviise zviro zvokupekeja Jehovha zvakadari inga goridhi, sirivha, utare,
6 uruji hwo bhurumu, hwo kupsukirikira, hwo kupsuka, hwakanaka, ukuse hwo mbuji,
7 no matovo akapsukirikira o vhuta, no matovo matete, no matabwa o muti wakavanga,*
8 mafuta o zvibani,* bharsamo rokuita ndirona mafuta o kuzoja, no rokuita ndirona rubani hunonuhira,
9 mapuwe o onikisi no mapuwe amweni okudira pa efodhi no okudira pa borosa ro paditi.
10 “‘Vandhu vese vano uzivi pakati penyu, ngavaviye vaite zvese zvakananga Jehovha.
11 Ngavaite tabherinake no tende yayo no nguvo jo kuifukija ndiyona no zvikorokotejero* zvayo no aro jayo jo kuita ndijona biravira no rukasha* hwayo no njiki jo mapuwe jayo no zvigajikiro zvayo,
12 bhokiso no mupingo jaro, no jira ro kuparajanisa ndirona;
13 meza no mupingo jayo no mujiyo jayo jese pomwe no pau jokuita mupiro kuna Mwari;
14 cigajikiro co zvibani zvokuvhenekera ndizvona no mujiyo jaco no mafuta o kuzvibwakija ndiwona;
15 artari yo rubani no mupingo jayo, mafuta o kuzoja ndiwona no rubani unonuhira, jira ro kudira pa musuvo wo tabherinake;
16 artari yo kupisira mupiro no bandhi rayo ro utare no mupingo jayo no mujiyo jayo jese, basiya no cigajikiro caro;
17 jira ro pa ruvanje no njiki jo mapuwe jaro no zvigajikiro zvajo no jira ro pamusuvo wo ruvanje;
18 mbhingu jo tende yo tabherinake no mbhingu jo tende yo pa ruvanje pomwe no mapote ajo;
19 nguvo jakanasa kusonwa, nguvo jakaceneswa jinozosimihwa ndi Aroni, mupiri, no nguvo jinozosimihwa ngo vana vake kuti vashande inga vapiri.’”
20 Ngo kudaro, gungano rese ro Vaiziraeri, rakavha pamberi pa Mosi.
21 Mundhu wese waindundiwa ngo mwoyo wake no mundhu wese wainga ecida kupa ciri cese, wakaviisa zvipo kuna Jehovha kuti zvishandiswe pa tende yo musongano no zvokuita ndizvona nguvo jakaceneswa.
22 Ivona vaiviya, vanarume no vanakaji. Wese wainga no cido co kupekeja ciri cese, zvakadari inga biriku,* mbhete* no zvinemeso zviri zvese kubatanijavo no mukhaindi wese wo zviro zvakaitwa ngo goridhi. Vese vaipekeja Jehovha mupiro javo jo goridhi.
23 Vaiviya vese vainga no uruji hwo bhurumu, hwo kupsukirikira, hwo kupsuka, hwakanaka, ukuse* wo mbuji no dovo ro mbuji rakapsukirikira roseja.*
24 Vese vaida kuita mupiro wo sirivha no utare, vakaviisa zvipo kuna Jehovha. Vese vainga no matabwa o muti wakavanga,* vakamaviisa kuti ashandiswe pa basa riri rese raidaro kuitwa.
25 Vanakaji vese vainga no uzivi, vakakosa uruji ngo nyara javo, voviisa hwavaingaro vakakosa: Uruji hwo bhurumu, hwakapsukirikira, hwakapsuka no hwakanaka.
26 Vanakaji vese vainga no uzivi no mwoyo unoda, ivona vakakosa ukuse* wo mbuji.
27 Madhodha akaviisa mapuwe o onikisi no mapuwe amweni okudira pa efodhi no okudira pa borosa ro paditi
28 no bharsamo no mafuta okudira muzvibani* no okuita ndiwona rubani hunonuhira.
29 Vanarume vese no vanakaji vaindundiwa ngo mwoyo wavo kuti vaite ciri cese, vakaviisa zvipo kuna Jehovha kuti zviite basa rainga rakananga Mwari kuti riithwe ecishandisa Mosi. Vaiziraeri vakazviviisa ngo kuda kwavo kuti vaite mupiro kuna Jehovha.
30 Tevere, Mosi wakavhunja Vaiziraeri kudari: “Vonanyi! Jehovha wakasana Bhezareri mwana wa Uri. Uri mwana wa Huri wo mubarihwana wa Judha.
31 Mwari wakamuzaja ngo mujimu wake, omupekeja uzivi, kuzwisisa no kuziva kuita mabasa ese okuveza,
32 kuti anase kurangarira kuti waizozviitisa kudini kuti zvibude ushoni ecishandisa goridhi, sirivha no utare
33 kuti iyena aceke mapuwe no kumaronga no kuita ngo matabwa mukhaindi wese wo mujiyo.
34 Iyena wainga akadira mu mwoyo ma Bhezareri na Oriyabhi mwana wa Izamaki wo jinja ra Dhani, cido cokujijisa.
35 Iyena wakavazaja ngo uzivi kuti vakwanise kuita mufumbo wese wo mabasa akadari inga kuruka, kusona vecishandisa uruji hwo bhurumu, hwo kupsukirikira, hwakapsuka, hwakanaka no mabasa o kuruka nguvo. Vanarume ava, vanozoita mukhaindi wese wo mabasa no kunasirira mukhaindi wese wo mabasa anoda kuitwa.
Masoko o Pasi
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zvigabhu-gabhu.”
^ Kana: “zvokunghwinisira.”
^ Kana: “mbariro.”
^ Mbhete.
^ Aneri.
^ Kana: “mandhenga.”
^ Kana: “ronyara.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “mandhenga.”
^ Kana: “zvigabhu-gabhu.”
