Ekisodho 36:1-38
36 “Bhezareri anozoshanda pamwepo na Oriyabhi no vanarume vese vanokwanisa kuita basa, vakapuwa uzivi no kuzwisisa ndi Jehovha kuti vakwanise kuita basa rese ro kuceneswa inga zvakanangwa ndi Jehovha.”
2 Mosi wakadanija Bhezareri na Oriyabhi no vanarume vese vanokwanisa kuita basa, vainga vakadihwa uzivi ndi Jehovha mu mwoyo mwavo, no vese vainga vecindundihwa ngo mwoyo wavo kuti vajipire kuita basa.
3 Ivona vakatora mupiro jese jainga na Mosi, jainga jakaviiswa ngo Vaiziraeri kuti jishandiswe pa basa rakaceneswa. Asi njiku jese Vaiziraeri vaindoviisa mupiro ngo kuda kwavo.
4 Pakupera kutangwa ko basa rakaceneswa, vashandi vese vanokwanisa kuita basa, vaiviya umwe nga umwe.
5 Ivona vaivhunja Mosi kudari: “Vandhu vari kuviisa zviro zvakawanda maningi kupindirija mudida wo zviro zvinoda kushandiswa pa basa rakanangwa ndi Jehovha kuti riithwe.”
6 Mosi wakananga kuti paidikana kuitwa ciziviso mu akampamento mwese, cainanga kudari: “Apacinazve mundhu, nee mwanarume kana mwanakaji, anodikana kuviisazve zviro zvokuvaka ndizvona tende ya Mwari.” Ngo kudaro, vandhu avazivizve kutendehwa kuviisa ciro.
7 Zviro zvaingaro zvaviiswa, zvaikwana kuti basa rese riithwe.
8 Ngo kudaro, vanarume vese vanokwanisa kuita basa, vakaita tabherinake ngo 10 ro macira akanasirihwa ngo uruji hwakanaka no kukoswa, hwo bhurumu, hwokupsukirikira no hwo kupsuka. Bhezareri wakaruka mufananijo wo makherubhi pamacirepo.
9 Jira rimwe na rimwe ro tende, raireba mutengo wo 28 o makovhadho,* ropambhama mutengo wo makovhadho 4. Macira ese o tende, ainga akaezana.
10 Perapo iyena wakabatanija pamwepo macira mashanu o tende, wobatanijazve pamwepo macira amweni mashanu.
11 Tevere wakaita muceka jo uruji hwo bhurumu wojidira kumbhiri kunoperera mundandanda wo macira, kwaaizobatanijwaro ndikona. Wakaitazve zvondhozvo no kumbhiri ko mundandanda umweni wo macira kwaizobatanijwa mundandanda wo macira maviri ayani.
12 Iyena wakaita 50 o muceka wojidira pa jira ro tende. Woitazve 50 o muceka, wojidira kumbhiri kumweni ko jira ro tende, koraizobatanijwa ndikona. Zvoita kuti muceka jiyani jigare jakasotana.
13 Pakupejisira, iyena wakaita 50 o zvikorokotejero* zvo goridhi zvobatanija macira o tabherinake. Ngo kudaro, tabherinake yakava ciro cimwe basi.
14 Perapo iyena wakaita macira ngo ukuse hwo* mbuji yokaji, kuti afukije tabherinake. Iyena wakaitazve 11 ro macira o tende.
15 Jira rimwe na rimwe ro tende, rainga no 30 o kovhadho o kureba, no makovhadho 4 o upambhi. 11 ro macira aya, ainga akaezana.
16 Naapera kuita izvi, iyena wakabatanija pamwepo macira mashanu o tende. Wobatanijazve pamwepo macira amweni matandhatu o tende.
17 Perapo iyena wakaita 50 o muceka, wojidira pa munda-nda-nda wo kumbhiri ko jira ro tende koraizobatanijwaro. Woitazve 50 o muceka, wojidira kumbhiri ko jira rimweni ro tende kwaraizobatanijwa no rokutanga.
18 Wakaitazve 50 o zvikorokotejero* zvo utare kuti zvibatanije pamwepo tende, kuti ibatane yova imwe.
19 Iyena wakaita cokufukija tende, ecishandisa dovo rakapsukirikira ro vhuta. Panyezuru payo wakaifukija ngo dovo dete.
20 Perapo wakaita aro jo kuita biravira ro tabherinake, ecishandisa matabwa o muti wakavanga,* woita ngo kujiimisa.
21 Aro imwe nga imwe, yaireba mutengo wo 10 ro makovhadho. Upambhi hwayo, hwaiita kovhadho imwe no meya.
22 Aro imwe nga imwe yainga no zvimakumbo zviviri. Iyi ndiyona njira yaakaita ndiyona aro jese jo kuita biravira ro tabherinake.
23 Ngo kudaro, iyena wakaita aro jo kumavhazuva ko tabherinake. 20 o aro iji, jainga jakasota kumavhazuveyo.
24 Perapo iyena, wakaita 40 o zvigajikiro zvo sirivha, zvodihwa pasi po 20 o aro. Zvigajikiro zviviri, zvakadihwa pasi po aro imwe ino zvimakumbo zviviri. Zvimakumbo zviviri zvo aro, zvakanghwinisihwa mukati mo mabovo o zvigajikiro zviviri. Wakadira zvigajikiro zviviri pasi po aro jese. Pasi po aro imwe na imwe, wakadira zvigajikiro zviviri.
25 Iyena wakaita 20 o aro wojidira ngo divi ro kanjikazi ro tabherinake.
26 No 40 o zvigajikiro zvo sirivha, zvigajikiro zviviri zvodihwa pasi po aro imwe, pa aro jese, imwe nga imwe yodihwa zvigajikiro zviviri.
27 Ngo sure ko tabherinake ngo kumavirira, iyena wakadireyo aro ndhandhatu.
28 Iyena wakaita aro mbiri kuti jiite njiki jo zvikina zviviri zvo sure ko tabherinake.
29 Aro iji jaivha pasi jiri mbiri, mbhera panyezuru pano cibato* cokutanga. Panyezuru apa paibatanija mativi maviri o aro iji, aro mbiri iji jaiithwa zvondhozvo joshanda inga njiki mbiri jo zvikina. Izvi ndizvona zvaakaita no njiki mbiri jo zvikina.
30 Ivona vakaunganija aro sere no zvigajikiro zvajo zvo sirivha zvinokwana kuita 16, zvigajikiro zviviri zvaidihwa pasi po aro imwe.
31 Perapo iyena wakaita rukasha* hwo muti wakavanga, zvirukasha zvishanu wozvidira ku divi rimwe ro tabherinake.
32 Zvirukasha* zvishanu zvodihwa ngo kudivi rimweni ro tabherinake, zvirukasha zvishanu zvodihwa ku divi ro kumavirira ko tabherinake kubiravira ro sure.
33 Wakadira rukasha hwo pakati kuti ubatanije aro ngo pakati pajo* kuvhira kumbhiri mbhera kumbhiri.
34 Iyena wakanama aro jiya ngo goridhi, woita zvibato* zvajo zvo goridhi kuti munghwiniswe zvirukasha zviya, perapo iyena wakanama hasha* jiya ngo goridhi.
35 Tevere iyena wakaita jira ngo uruji wobhurumu, wokupsukirikira, wokupsuka no wakanaka. Wakariita rino mufananijo womakerubhi akaita ngo kurukwa.
36 Perapo wakaita njiki murongomuna jo muti wakavanga* wojinama ngo goridhi. Woitazve zvikorokotejero* zvajo ngo goridhi no zvigajikiro zvirongomuna zvo sirivha zvo kuzogajikira njiki jiya.
37 Tevere wakaita jira rokudira pa musuvo wo tende, jira iri wakariita ngo uruji wo bhurumu, wokupsukirikira, wokupsuka no wakarukwa wosonwa pamwepo.
38 Wakaitazve njiki shanu no zvikorokotejero zvajo, wonama kumbhiri ko njiki ngo goridhi no zvitengerebwe* zvajo zvo kubatanija ndizvona no zvigajikiro zvishanu zvo utare.
Masoko o Pasi
^ Kovhadho imwe inoezana no 44,5 yo masentimetro. Vonanyi Masoko Okuengejera B14.
^ Kana: “zvokunghwinisira.”
^ Kana: “mandhenga o.”
^ Kana: “Zvokunghwinisira.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “ciradhondo.”
^ Mbariro.
^ Mbariro.
^ Aro.
^ Kana: “ciradhondo.”
^ Kana: “mbariro.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zvokunghwinisira.”
^ Kana: “zvimagangiro no mapote.”
