Ekisodho 37:1-29
37 Bhezareri wakaita bhokiso ro matabwa o muti wakavanga.* Irona rainga no kovhadho mbiri no meya jo kureba, kovhadho imwe no meya yo upambhi no kovhadho imwe no meya yo kukhwira.
2 Iyena wakainama ngo goridhi rakanasirihwa, woitendeneja mumbhiripiri mayo ngo bote ro goridhi.
3 Pasure pa izvi, iyena wakaita zvibato* zvirongomuna zvo goridhi, wozvinamira panyezuru po makumbo marongomuna: Zvibato zviviri kudivi rimwe, zvibato zviviri kudivi rimweni.
4 Perapo iyena wakaita mupingo jo matabwa o muti wakavanga,* wojinama ngo goridhi.
5 Tevere, iyena wakanghwinisa mupingo iji, mu zvibato* zviri mumativi maviri o bhokiso, kuti vathware ndiyona bhokiso iri.
6 Iyena wakaita tapa yo goridhi rakanasirihwa, yainga no kovhadho mbiri no meya jo kureba, kovhadho imwe no meya yo upambhi.
7 Perapo iyena wakaita makherubhi maviri ngo goridhi, eciita ngo kumatakira ngo mariteru, womadira kumativi maviri o kumbhiri ko tapa.
8 Kherubhi rimwe, rainga kumbhiri ko divi rimwe, kherubhi rimweni rainga kumbhiri ko divi rimweni ro tapa. Iyena wakaita makherubhi, womadira kumativi maviri o tapa.
9 Makherubhi maviri aya, ainga akafunungura mapapiro* awo maviri, ofukija tapa ngo mapapiro awo. Iwona ainga akasotana. Kumeso kwawo kwainga kwakasota pa tapa.
10 Iyena wakaita meza yo matabwa o muti wakavanga,* iyona yainga yakareba mutengo wo makovhadho maviri, yopambhama mutengo wo kovhadho imwe, yokhwira mutengo wo kovhadho imwe no meya.
11 Iyena wakainama ngo goridhi rakanasirihwa, woitendeneja mumbhiripiri mayo ngo bote ro goridhi.
12 Perapo, wakaita bhande rakapambhama mutengo wo nyara. Irona rainga no mapote maviri o goridhi, mudenga no pasi.
13 Perapo, iyena wakaitira zvibato* zvirongomuna zvo goridhi, wozvidira mu zvikina zvirongomuna maitangira makumbo marongomuna o meza.
14 Zvibato* izvi zvaigara phedo no bhande. Mu zvibato izvi mainghwinisihwa mupingo jaishandiswa pakuthwara meza.
15 Perapo iyena wakaita mupingo jo matabwa o muti wakavanga* jokuthwara ndijona mezeyo, wojinama ngo goridhi.
16 Perapo iyena wakaita mujiyo jaigara pa meza ngo goridhi rakanasirihwa, jakadari inga paratu jayo, kopo jayo, jharo jayo pomwe no zvibasiya zvayo, maizodururihwa doro ro mupiro.
17 Perapo iyena wakaita cigajikiro co zvibani ngo goridhi rakanasirihwa. Cigajikiro co zvibani* ici, wakaciita ngo kucitakira ngo mariteru. Murenje jaco, njiki yaco, matavi aco, kopo jaco, mafundo aco no mafirori aco, zvese zvakabatana cova ciro cimwe.
18 Matavi matandhatu, ainga akadihwa pa njiki yo cigajikiro co zvibani.* Matavi matatu ngo divi rimwe ro cigajikiro co zvibani, matavi matatu ngo divi rimweni.
19 Kopo ndhatu jainga jakaithwa inga mafirori o mu amendowa, jainga jiri pa davi rainga ngo divi rimwe. Kopo iji jainga jakaparajaniswa ngo mafundo no mafirori. Kopo jimweni ndhatu, jakaithwa inga mafirori o muamendowa, jainga jiri pa davi ro divi rimweni. Kopo iji jainga jakaparajaniswavo ngo mafundo no mafirori. Izvi ndizvona zvainga zvakaita matavi matandhatu anovha pa cigajikiro co zvibani.*
20 Pa njiki yo cigajikiro co zvibani, painga no kopo murongomuna jakaita inga mafirori o muamendowa, joparajaniswa ngo mafundo no mafirori.
21 Pasi po matavi maviri okutanga aivha pa njiki yo cigajikiro co zvibani, painga no fundo. Pasi po matavi o cipiri aivha pa njiki yo cigajikiro co zvibani, paiva no fundo rimweni. Pasi po matavi maviri amweni o citatu aivha ku njiki yo cigajikiro co zvibani,* paiva no fundo rimwenizve. Izvi ndizvona zvakaitwa no matavi matandhatu ese aivha ku njiki yo cigajikiro co zvibani.
22 Mafundo no matavi pomwe no cigajikiro co zvibani, zvese zvakabatana zvova ciro cimwe cakaithwa ngo goridhi rakanasirihwa.
23 Perapo wakaiitira zvibani zvinomwe no zvokuvhisa ndizvona marota o turusida iri kubwaka, woitazve cokujima muriro. Izvona zvakava zvo goridhi rakanasirihwa.
24 Iyena wakaita cigajikiro co zvibani* no mujiyo jaco jese. Wakaciita no mujiyo jaco jese ecishandisa tarenta* rimwe ro goridhi rakanasirihwa.
25 Ngo kudaro, wakaita artari yo rubani ecishandisa matabwa o muti wakavanga.* Artari yainga no mativi marongomuna akaezana. Iyona yaireba kovhadho imwe, yopambhama kovhadho imwe, yaingazve no kovhadho mbiri jokukhwira. Nyanga jayo no artariyo, zvainga zvakabatana zvoita ciro cimwe.
26 Iyena wakainama ngo goridhi rakanasirihwa. Wakainama kunja no mukati, woitendeneja yese kubatanija no nyanga jayo. Wakaitendeneja mumbhiripiri mayo ngo bote ro goridhi.
27 Iyena wakaita zvibato* zviviri zvo goridhi zvainga ngo pasi po bote ro goridhi. Mumativi ayo maviri, mainga no zvibato zvakadihwa. Mukati mazvo mainghwinisihwa mupingo jo kuthwara ndijona artari.
28 Pasure po izvi, iyena wakaita mupingo jo matabwa o muti wakavanga,* perapo wocinama ngo goridhi.
29 Iyena wakanasirira mafuta akaceneswa okuzoja ndiwona. Wakaitazve rubani wakanaka unonuhira. Zvese izvi zvakanasa kunasirihwa ushoni.
Masoko o Pasi
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zviradhondo.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zviradhondo zvo goridhi.”
^ Kana: “mapapa.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zviradhondo.”
^ Kana: “zviradhondo zvo goridhi.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zvigabhu-gabhu.”
^ Kana: “zvigabhu-gabhu.”
^ Kana: “zvigabhu-gabhu.”
^ Kana: “zvigabhu-gabhu.”
^ Kana: “zvigabhu-gabhu.”
^ Tarenta rimwe rairema kiru jinokwana kuita 34,2. Vonanyi Masoko Okuengejera B14.
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ kana “zviradhondo.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
