Ekisodho 39:1-43
39 Ivona vakanasa kusona nguvo jaizoshandiswa pa ndau yakacena vecishandisa ruji hwo bhurumu, hwokupsukirikira no hwo kupsuka. Vakaitirazve Aroni nguvo jakaceneswa, inga zvakananga Jehovha ecivhunja Mosi.
2 Iyena wakanasirira efodhi ecishandisa goridhi, ruji hwo bhurumu, hwokupsukirikira, hwo kupsuka no hwakanaka no kukoswa.
3 Ivona vakatakira goridhi roita cibhande cakatetepa, perapo vocicekaceka coita zvimuceka zvaizokoswa pamwepo no ruji hwo bhurumu, hwokupsukirikira, hwo kupsuka no hwakanaka no kukoswa.
4 Ivona vakaita mabhande o efodhi anoenda pamapfuji.* Iwona aibatanija mativi maviri ayo ngo pamapfujipo; divi ro sure no ro kumbeji.
5 Muceka waisonehwa pa efodhi iyi, wo kuisunga ndiwona, wainga wakaithwa ngo zviro zvondhozvo; goridhi, ruji hwo bhurumu, hwokupsukirikira, hwo kupsuka no hwakanaka no kukoswa, inga zvainga zvakananga Jehovha ecivhunja Mosi.
6 Tevere ivona vakadira mapuwe o onikisi mu zvibatiriro zvo goridhi. Ivona vakatara pa mapuwe aya mazina o vana vo Vaiziraeri, inga zvinoithwa ngo mundhu anotara magama pa cidhindho.
7 Iyena wakamadira pa mapfuji* panotangira mabhande maviri o efodhi kuti ave mapuwe o ciceukijo ku vana vo vaiziraeri, inga zvainga zvakananga Jehovha ecivhunja Mosi.
8 Perapo iyena wakaita borosa ro paditi rakaita ngo kurukwa inga efodhi ecishandisa goridhi, ruji hwo bhurumu, hwokupsukirikira, hwo kupsuka, no hwakanaka no kukoswa.
9 Rikambhera ngo kupethwa, irona rainga rino mativi marongomuna akaezana. Ivona vakaita borosa ro paditi iri, zvokuti kudari rikapethwa, raireba no kupambhama mutengo wo nyara.*
10 Ivona vakaridira fira murongomuna jo mapuwe. Fira yo kutanga yainga ino mapuwe aya: Rubhi, topaziyo no esmerardha.
11 Fira yo cipiri yainga ino mapuwe aya: Turkeza Safira no Jhaspe.
12 Fira yo citatu yainga ino mapuwe aya: Buwe ro reshemu,* agata no ametista.
13 Fira yo cirongomuna yainga no mapuwe aya: Krizorito, onikisi no jadhi. Iwona aidihwa pa zvibatiriro zvo goridhi.
14 Mapuwe aya aiimirira mazina o 12 o vana vo Vaiziraeri. Mazinewo ainga akatahwa inga zvinoithwa ngo mundhu anotara magama pa cidhindho. Zina rimwe nga rimwe raiimirira vhumbo rimwe pa mavhumbo 12.
15 Tevere ivona vakaita zvikurenti zvo goridhi, zvakakoswa inga bote kuti zvibatirire borosa ro paditi.
16 Ivona vakaita zvibatiriro zviviri zvo goridhi no zvibato* zviviri zvo goridhi, vozvidira mu zvikina zviviri zvo borosa ro paditi.
17 Perapo, ivona vakanghwinisa zvikurenti zviviri zviya zvo goridhi ngo mu zvibato* zviviri, zviri muzvikina zvoborosa ro paditi.
18 Ivona vakatora kumbhiri ko zvikurenti zviviri zvo goridhi, vozvinghwinisa mu zvibatiriro. Zvibatiriro izvi, zvainamihwa pamapfuji* ngo panyezuru po efodhi.
19 Tevere, ivona vakaita zvibato* zviviri zvo goridhi, vozvidira muzvikina zviviri zvo borosa ro paditi ngo mukati, zvakacindana no efodhi.
20 Perapo, ivona vakaitazve zvibato* zviviri zvo goridhi vozvidira ngo kumbeji ko efodhi, ngo pasi po mabhande maviri o efodhi, akaenda pamapfuji* ngo panyezuru po ndau inobatanijwa muceka* wo kusunga ndiwona efodhiyo.
21 Pakupejisira ivona vakasunga borosa ro paditi no muceka wo bhurumu kuvhira pa zvibato* zvaro mbhera pa zvibato zvo efodhi. Izvi zvinozoita kuti borosa ro paditi, rigare riri pa ndau yaro pambeji po efodhi ngo panyezuru po muceka* wakasonehwa pa efodhiyo, inga zvainga zvakananga Jehovha ecivhunja Mosi.
22 Iyena wakaita nguvo icina mukono yaizosimihwa ngo mukati mo efodhi. Nguvo iyi yaidikana kurukwa yese ngo ruji hwo bhurumu, ngo mundhu anoziva kuruka ushoni.
23 Bovo ro nguvo yakareba icina mukono, rainga riri ngo pakati payo, rovanga inga nguvo yo simbi yo musoca. Bovo iri, rakasonehwa gora kutendeneja musipa maromo mese kuti ritame kukasika kumweka.
24 Tevere ivona vakadira mumbhiripiri mo nguvo yo kureba icina mukono, zviro zvakatojana no mucero wo maromaa, vozviita ngo ruji hwo bhurumu, hwokupsukirikira no hwo kupsuka hwokoswa pamwepo.
25 Ivona vakaita zvinginde-nginde zvo goridhi rakanasirihwa, vozvidira mumbhiripiri mo nguvo yakareba icina mukono. Zvinginde-nginde izvi, zvaiparajaniswa ngo zviro zvakatojana no mucero wo maromaa. Nguvo iyi, vakaitendeneja mumbhiripiri mayomo mese ngo pasi payo ngo zviro izvi.
26 Ivona vakatendeneja nguvoyo yese mumbhiripiri mayo ngo mucero no zvingindenginde zvo goridhi. Vozvidira kuti apa cingindenginde co goridhi, apa mucero wo maromaa. Apa cingindenginde co goridhi apa mucero wo maromaa. Nguvo iyi yaisimihwa ngo mupiri paaida kuita basa ro upiri, inga zvakanangwa ndi Jehovha ecivhunja Mosi.
27 Ivona vakaita nguvo jakareba ngo ruji hwakaseja, zvonasa kusonwa ngo mundhu anokwanisa kusona ushoni, kuti jisimihwe ndi Aroni no vana vake.
28 Vakavaitirazve dhuku rakaithwa ngo ruji hwakanaka. Dhuku iri, rainga rokufukija musoro rakaithwa ngo ruji hwakaseja. Voitazve no kamudura jakaithwa ngo ruji hwakaseja hwokoswa.
29 Vakaitazve muceka wo ruji hwakanaka no kukoswa, hwo bhurumu, hwokupsukirikira no hwo kupsuka, hwokoswa pamwepo inga zvainga zvakananga Jehovha ecivhunja Mosi.
30 Pakupejisira, ivona vakaita cibhande cinon’ganikira, cainga citatijo co kujipira kwakaceneswa, vecishandisa goridhi rakanasirihwa. Ivona vakacitara inga zvinoithwa ngo mundhu anotara magama pa cidhindho. Vocitara kudari: “Uceni ngo hwa Jehovha.”
31 Ivona vakasungira muceka wakaithwa ngo ruji hwo bhurumu pa cibhande ici, kuti vacisungire pa dhuku inga zvainga zvakananga Jehovha ecivhunja Mosi.
32 Ngo kudaro, basa rese ro tabherinake, kana kuti tende yo musongano, rakapera kuithwa. Vaiziraeri vakaita zviro zvese kamare zvainga zvakananga Jehovha ecivhunja Mosi. Ivona vakaita kudaro kamare.
33 Ivona vakatora tabherinake no mujiyo jayo jese, zvakadari inga zvikorokotejero* zvayo, aro jayo, hasha* jayo, njiki jayo no zvigajikiro zvo njiki, voenda nazvo ka Mosi.
34 Vakatorazve dovo ro vhuta rakapsuka no dovo rakaita dete ro kufukija tabherinake, no jira ro kuparajanisa ndirona.
35 Vakatorazve bhokiso ro Ucapupu no njiki jaro, pomwe no tapa yaro.
36 Vakatorazve meza no mujiyo jayo jese no pau jo kuita mupiro.
37 Vakatorazve cigajikiro co zvibani* co goridhi rakanasirihwa no zvibani zvaco zvakarongwa, no mujiyo jaco jese no mafuta o kuvhenekera ndiwona.
38 Vakatorazve artari yo goridhi, mafuta o kuzoja ndiwona, rubani hunonuhira, no jira ro pamusuvo wo tende.
39 Ivona vakatorazve artari yo utare, bandhi ro utare no mupingo jaro, no mujiyo jayo jese no basiya no cigajikiro caro.
40 Vakatorazve macira o paruvanje no njiki jawo, zvigajikiro zvajo, jira ro pamusuvo wo paruvanje, mapote o tende, mbhingu jo tende, no mujiyo jese jinoshandiswa pa basa raiithwa pa tabherinake, kana kuti tende yo musongano.
41 Ivona vakatorazve nguvo jakanasa kusonwa, nguvo jakaceneswa jaizosimihwa ndi Aroni mupiri, no nguvo jaizosimihwa ngo vana vake kuti vashande inga vapiri.
42 Vaiziraeri vakaita mabasa ese akananga Jehovha ecivhunja Mosi.
43 Mosi paakaenda koovona basa ravo, iyena wakavona kuti vainga vaita kamare zvainga zvakananga Jehovha. Perapo Mosi wakavakomborera.
Masoko o Pasi
^ Kana: “pamakhaja.”
^ Kana: “makhaja.”
^ Mutengo o masentimentro anokhwedera kuita 22,2. Vonanyi Masoko Okuengejera B14.
^ Ariziviki kuti ibuwe ro mukhaindinyi. Kangaije buwe iri rinoda kunangira ambari, jasinto, opara, kana turumarina.
^ Kana: “zviradhondo.”
^ Kana: “zviradhondo.”
^ Kana: “pamakhaja.”
^ Kana: “zviradhondo.”
^ Kana: “zviradhondo.”
^ Kana: “pamakhaja.”
^ Kana: “bhande ro mucihunu.”
^ Kana: “zviradhondo.”
^ Kana: “bhande ro mucihunu.”
^ Kana: “zvokunghinisira.”
^ Kana: “mbariro; rukasha.”
^ Kana: “zvigabhu-gabhu.”
