Ekisodho 40:1-38
40 Jehovha wakavhunjazve Mosi kudari:
2 “Pa njiku yo kutanga yo mweji wo kutanga, unodikana kuvaka tabherinake, kana kuti, tende yo musongano.
3 Unodikana kudira mukati mayo Bhokiso ro Ucapupu, worifukija ngo jira.
4 Unodikana kutora meza woidira mukatimo, wonasa kurongeja zviro zvayo pamezepo. Unodikanazve kutora cigajikiro co zvibani* wobasira zvibanizvo.
5 Perapo, dirai artari yo goridhi yo kupisira rubani pambeji po bhokiso ro Ucapupu. Wodirazve jira ro pamusuvo wo tabherinake.
6 “Unodikanazve kudira artari yo kupisira zvipo pamberi po musuvo wo tabherinake, kana kuti, tende yo musongano.
7 Dirai basiya pakati no pakati po tende yo musongano no artari, wodiremo kumwa.
8 Gwimbai jira kuti ritendeneje ruvanje, perapo wodira jira pamusuvo wo ruvanje.
9 Tevere torai mafuta okuzoja, wozoja tabherinake no zviro zvese zviri mukati mayo. Icenesei pomwe no mujiyo jayo jese. Ngo kudaro inozova yakacena.
10 Unodikana kuzoja artari yo kupisira zvipo no zviro zvayo zvese. Icenesei, ngo kudaro inozova artari yakacenesesa.
11 Unodikana kuzoja basiya no cigajikiro caro, wozvicenesa.
12 Perapo viisai Aroni no vana vake phedo no pa musuvo wo tende yo musongano, uvasambije ngo kumwa.
13 Unozosimija Aroni nguvo yakaceneswa, womuzoja perapo womucenesa. Iyena anozondishandira inga mupiri.
14 Perapo viisai vana vake, wovasimija nguvo jakareba.
15 Unodikana kuvazoja inga zvowakaita baba wavo, kuti ivona vandishandire inga vapiri. Kuzojwa kwavo kunozovaita kuti ivona vashande inga vapiri vo kwenda no kwenda ku mubarihwana wavo wese.”
16 Mosi wakaita zvese zvaakavhunjwa ndi Jehovha. Iyena wakaita kudaro kamare.
17 Pa njiku yo kutanga, yo mweji wo kutanga, wo gore ro cipiri, tabherinake yakapera kuvakwa.
18 Mosi paaivaka tabherinake, iyena wakandandanisa pasi zvigajikiro zvo aro, wojimika arojo, wonghwinisira hasha* jajo, wojimikazve njiki jakona.
19 Iyena wakafukija aro jese jo biravira ro tende ngo macira, perapo wofukija panyezuru payo, inga zvainga zvakananga Jehovha ecivhunja Mosi.
20 Iyena wakatorazve mapuwe akacecwa o citenderano, womadira mu bhokiso ro Ucapupu. Perapo wakatora mupingo, wojidira pa bhokisopo. Wakatorazve tapa woidira pa Bhokiso.
21 Iyena wakatora bhokiso woridira mu tabherinake, perapo wodira jira ro kuparajanisa, kuti bhokiso ro Ucapupu ritame kuvoneka, inga zvakananga Jehovha ecivhunja Mosi.
22 Tevere iyena wakadira meza, ngo mukati mo tende yo musongano ngo divi ro kanjikazi ko tabherinake, ngo kunja ko jira.*
23 Perapo wakaronga pau panyezuru po artari, pamberi pa Jehovha, inga zvakananga Jehovha ecivhunja Mosi.
24 Wakadira cigajikiro co zvibani* mu tende yo musongano ngo kumbeji ko meza ngo divi ro kanjikazi ko tabherinake.
25 Iyena wakabwakija zvibani* pamberi pa Jehovha inga zvakananga Jehovha ecivhunja Mosi.
26 Perapo iyena wakadira artari yo goridhi, mu tende yo musongano, pamberi po jira,
27 kuti apisirepo rubani hunonuhira, inga zvakananga Jehovha ecivhunja Mosi.
28 Tevere iyena wakadira jira pa musuvo wo tabherinake.
29 Wakadira artari yo kupisira zvipo pamusuvo wo tabherinake, kana tende yo musongano, kuti aitirepo zvipo zvokupiswa no zvipo zvomucece, inga zvakananga Jehovha ecivhunja Mosi.
30 Perapo wakatora basiya woridira pakati no pakati po tende yo musongano no artari, wodiremo kumwa kuti vasambe makumbo avo no* nyara.
31 Mosi na Aroni no vana vake, vakasamba makumbo avo no* nyara.
32 Nguva jese pavaida kunghwina mutende yo musongano, kana kukhwedera pa artari, ivona vaidikana kusamba makumbo avo no* nyara, inga zvakananga Jehovha ecivhunja Mosi.
33 Perapo iyena wakagwimba jira wotendeneja ruvanjehwo hwese no artari. Tevere wakadirazve jira pamusuvo wo ruvanje.
Ngo kudaro Mosi wakapeja basa rese.
34 Perapo gore rakafukija tende yo musongano, simba ra Jehovha rozaja tabherinake.
35 Mosi aacaikwanisepi kunghwina mutende yo musongano, ngokuti gore raindofukija tendeyo. Simba guru ra Jehovha raizaja tabherinake.
36 Gore paraimuka panyezuru po tabherinake, Vaiziraeri vaivhisa akampamento javo. Izvi zvaindoitika mu hwendo hwavo hwese.
37 Asi kudari gore rikatama kumuka ivona avacaivhisepi akampamento javo mbhera njiku yaraimuka.
38 Gore ra Jehovha rainga riri panyezuru po tabherinake comasikati, asi co usiku mainga muno muriro mukati mwaro, Vaiziraeri vese vecivona. Izvi zvaiitika mu hwendo hwavo hwese.
Masoko o Pasi
^ Kana: “zvigabhu-gabhu.”
^ Kana: “mbariro; rukasha.”
^ Kana: “ngo pandau yakacena”
^ Kana: “zvigabhu-gabhu.”
^ Kana: “zvigabhu-gabhu.”
^ Kana: “vaphoze no kusamba.”
^ Kana: “vakaphoza no kusamba.”
^ Kana: “kuphoza no kusamba.”
