Ekisodho 5:1-23
5 Pasure pazvo, Mosi na Aroni vakaenda pamberi pa Faro, vonanga kuti: “Jehovha Mwari wo Vaiziraeri anonanga kuti: ‘Pindisai vandhu vangu kuti vandiitire mabuso mu zvipare.’”
2 Asi Faro wakati: “Ndiyani Jehovha, kuti ndizwe zvaanonanga, ndipindise Vaiziraeri? Inini andimuzivi Jehovha, nee andizotenderi kuti Vaiziraeri vapinde.”
3 Asi ivona vakati: “Mwari wo Vahebheru wakabhuya na itusu. Tapota, tinoda kuita hwendo hwo njiku ndhatu kuti tiende mu zvipare koitira mupiro Jehovha Mwari wedu. Tikatama kuita kudaro, iyena anozotiuraya ngo ndhendha kana ngo banga.”
4 Mambo wo Ejipita wakavadavira kuti: “Mosi na Aroni, ngenyi muri kuregeresa vandhu basa ro vari kuita? Hwiriranyi ku mabasa enyu!”
5 Faro wakaenderera mberi ecinanga kudari: “Vandhu ava vakawanda maningi, imwimwi muri kuda kuti varegere basa ravo.”
6 Pa njiku yondhoyo kamare, Faro wakavhunja vatungamiriri* no vabeseri vavo kuti:
7 “Mucapazve vandhu maushwa o kuita ndiwona zvidhina. Varegerenyi vaende kopsaka vega maushwa.
8 Asi vavhunjenyi kuti vaite mutengo wondhowo wo zvidhina wovaiitaya kare. Mucavapungurira ngokuti vari kutamba.* Ngo zvinovaitisaro kuti vanange kudari: ‘Tiri kuda kupinda, tiri kuda kuenda koitira mupiro Mwari wedu!’
9 Itanyi kuti vabate maningi basa, ngavagare vakabatikana kuti vatame kupurukira zvo kunyepa.”
10 Ngo kudaro, vatungamiriri no vabeseri vavo vakaenda kovhunja vandhu kuti: “Faro wananga kudari: ‘Andicamupizve maushwa.
11 Endanyi kopsaka mwega maushwa komunomawaniraro, basa romunoitaro arizopunguhwi.’”
12 Perapo vandhu vakaparajika mu Ejipita mwese kuti vaunganije maushwa mu maminda mapera kukotohwa mbeu.
13 Vatungamiriri vaya vaivavangirija veciti: “Munodikana kupeja basa renyu njiku jese, inga zvomaiita pomaipuwaya maushwa.”
14 Vabeseri vo vatungamiriri vo Vaiziraeri vakagajwaya ngo vatungamiriri va Faro, vaitakwa. Ivona vaivhunjiswa kuti: “Ngenyi amuzivi kukwanisa mutengo wo zvidhina zvomaiitaya kare? Zuro zvakaitika! Nyamasi zvoitikazve.”
15 Ngo kudaro, vabeseri vo vatungamiriri wo Vaiziraeri vakaenda pamberi pa Faro von’gun’guta veciti: “Ngenyi muri kutitaja ngo njira iyi?
16 Akucina mundhu ari kutipekejazve maushwa, ivona vanoda kuti tienderere mberi ‘ticiita zvidhina.’ Cimwenizve, ivona vari kutitaka, kuveni ivona vari kutoposavo.”
17 Asi iyena wakati: “Imwimwi muri kutamba* maningi, muri kutamba* kamare! Ndizvona zvinomuitisaro kuti munange kudari: ‘Tiri kuda kupinda. Tiri kuda kuenda koitira mupiro Jehovha.’
18 Waro endanyi, hwiriranyi ku basa! Akuna maushwa omunozopuwa, asi munodikana kuenderera mberi mecitaka mutengo wo zvidhina zvomaiitakaya kare.”
19 Vabeseri vo Vaiziraeri vakavona kuti vainga pa mugariro unonesa maningi ngo pamusoro po masoko ovakavhunjwaya okuti: “Imwimwi amudikani kupungura nee padoko mutengo wenyu wo zvidhina wamunotaka pa njiku ngo njiku.”
20 Pasure pazvo, povakabuda pamberi pa Faro, ivona vakaenda kowanana na Mosi na Aroni, vainga vakavavetera.
21 Ivona vakati kovari: “Jehovha ngaavone zviito zvenyu no kumutonga, ngokuti makaita kuti Faro no vashandiri vake vatinyenye, modirazve banga mu nyara javo kuti vatiuraye.”
22 Mosi wakaita mukumbiro kuna Jehovha, wonanga kudari: “Jehovha, ngenyi muri kusiya vandhu ava vecitambujika? Makanditumirenyi?
23 Kuvhira pondakaenda kobhuya na Faro ngo zina renyu, iyena ari kutonyanyisa maningi kutambuja vandhu venyu kupinda zvaaiita kare, asi imwimwi amuripi kuponesa vandhu venyu.”
Masoko o Pasi
^ Kana: “vakurumiji.” Vanokurumijira vandhu kuti vaite basa.
^ Kana: “kuita nungo; kuita umbhwa.”
^ Kana: “muri kuita nungo; muri kuita umbhwa.”
^ Kana: “muri kuita nungo; muri kuita umbhwa.”
