Ekisodho 6:1-30
6 Waro Jehovha wakavhunja Mosi kudari: “Wari unozovona zvandiri kuda kuitira Faro. Ngo simba rangu, ndinozovangirija Faro kuti amupindise. Pakupera kuvona simba rangu guru, iyena anozomubudisa mu nyika yake.”
2 Mwari wakavhunjazve Mosi kudari: “Inini ndini Jehovha.
3 Inini ndaianja kubudira Abhirahama, Izaki na Jakobe, ndecijivonesa kovari inga Mwari wo Masimba Ese. Asi ngo pamusoro po zina rangu rokuti Jehovha, inini andizivi kumbovavhunja.
4 Ndakaitazve citenderano na ivona co kuvapekeja nyika yo Khanani, nyika yovaigara inga varendo.
5 Wari ndiri kuzwa kugomera ko Vaiziraeri. Ngokuti ivona vari kuitwa varanda ngo Vaejipita. Inini andizivi kukanganwa citenderano condakaita na ivona.
6 “Ngo kudaro, vhunjai Vaiziraeri kudari: ‘Ndini Jehovha. Inini ndinozomuvhisira muthwaro unorema womakathikwa ngo Vaejipita, ndozomuponesa kuvha mu uranda. Inini ndinozoshandisa simba rangu kuti ndimuponese no kusvuzvunura Vaejipita.
7 Imwimwi munozova vandhu vangu, inini ndinozova Mwari wenyu. Imwimwi kamare munozonasa kuziva kuti ndini Jehovha, Mwari wenyu ari kumuvhisira muthwaro unorema womakathikwa ngo Vaejipita.
8 Inini ndinozomunghwinisa mu nyika yondakapika kuti ndaizoipekeja Abhirahama, Izaki na Jakobe. Ndinozomupekeja nyika iyi kuti ive ndhaka kwamuri. Ndini Jehovha.’”
9 Pakufamba ko nguva, Mosi wakavhunja masoko aya Vaiziraeri. Asi ivona avazivi kumupurutana* ngo pamusoro pokuti ivona vainga vakanyangajwa pomwe no kuhwajihwa ngo pamusoro po uranda.
10 Jehovha wakavhunja Mosi kudari:
11 “Endai, vhunjai Faro mambo wo Ejipita kuti iyena anodikana kubudisa Vaiziraeri kuti vabude mu nyika yake.”
12 Asi Mosi wakadavira Jehovha kudari: “Vonanyi basi! Pandakaenda kobhuya no Vaiziraeri ivona avazivi kundipurutana.* Waro Faro angazondipurutanisa* kudini? Inini andinasi kuvereketa ushoni.”
13 Asi Jehovha wakavhunjazve Mosi na Aroni kuti vaidikana kuvhunja Vaiziraeri na Faro mambo wo Ejipita kuti Vaiziraeri vabude kuvha ku nyika yo Ejipita.
14 Vakuru vo majibaba avo nga ava: Vana va Rubheni dangwe ra Iziraeri vainga Anoki, Paru, Ezironi na Karimi. Iyi ndiyona mbhuri ya Rubheni.
15 Vana va Simiyoni vaakabara no mwanakaji wo Khanani vainga Jemuweri, Jamini, Ohadhi, Jakini, Zohari na Shauri. Iyi ndiyona mbhuri ya Simiyoni.
16 Mazina o vana va Revhi, mukuzwirana no mubarihwana wo mbhuri yake, nga aya: Gerishoni, Kohati na Merari. Revhi wakava no makore anokwana kuita 137.
17 Vana va Gerishoni mukuzwirana no mbhuri yavo, vainga Ribhini na Shimei.
18 Vana va Kohati vainga Amirami, Izihari, Hebheroni na Uziyeri. Makore ese a Kohati akava 133.
19 Vana va Merari vainga Mahiri na Mushi. Iyi ndiyona mbhuri yo Varevhi, mukuzwirana no mubarihwana wavo.
20 Amirami wakarovora Jokebhedhi thethaji* wake. Ivona vakabara vana ava: Aroni na Mosi. Makore ese a Amirami akava 137.
21 Vana va Izihari vainga Koraa, Nefegi na Zikiri.
22 Vana va Uziyeri vainga Mishaeri, Erizafani na Sitiri.
23 Aroni wakarovora Erishebha mwana wa Aminadhabhi. Erishebha wainga hambzaji ya Naasoni. Aroni na Erishebha vakabara Nadhabhi, Abhihu, Eriyazari na Itamari.
24 Vana va Koraa vainga Asiri, Erikana na Abhiyazafi. Iyi ndiyona mbhuri yo Vakoraa.
25 Eriyazari mwana wa Aroni, wakarovora mwana wa Putiyeri, wobara Fineya. Ava ndivona vakuru vo majibaba o Varevhi, mukuzwirana no mbhuri yavo.
26 Ava ndivona dungwa ra Aroni na Mosi, vakavhunjwaya ndi Jehovha kudari: “Budisai Vaiziraeri mu Ejipita, cikwata ngo cikwata.”
27 Ndivona dungwa ra Mosi na Aroni rakavhunjaya Faro mambo wo Ejipita kuti abudise Vaiziraeri kuvha mu Ejipita.
28 Mu njiku iyi, Jehovha paakavhunja Mosi mu nyika yo Ejipita,
29 Jehovha wakavhunja Mosi kudari: “Inini ndini Jehovha, endai wovhunja Faro mambo wo Ejipita, zviro zvese zvondakakuvhunja.”
30 Tevere Mosi wakavhunja Jehovha kudari: “Vonanyi basi! Inini andinasi kuvereketa ushoni. Waro Faro angazondipurutanisa* kudini?”
Masoko o Pasi
^ Kumupurukira.
^ Kundipurukira.
^ Angazondipurukirisa.
^ Hama yokaji ya baba; Hambzaji ya baba.
^ Angazondipurukirisa.
