Ekisodho 8:1-32
8 Perapo, Jehovha wakavhunja Mosi kuti: “Endai ka Faro umuvhunje kuti: ‘Jehovha anonanga kudari: “Pindisai vandhu vangu kuti vandishandire.
2 Kudari ukandoramba kuvapindisa, ndinozotambuja nyika yakoyo yese ngo macehe.
3 Murambo wa Niro unozozara ngo macehe, iwona anozobuda onghwina pamuzi pako, no mumba mako, okhwira pa mubhedhu wako. Iwona anozonghwinazve mu nyumba jo vashandiri vako no jo vandhu vako pomwe no mu forno jako no maunokanyira pau.
4 Macehe anozoza kouri, ku vandhu vako no kuvashandiri vako.”’”
5 Pa kufamba ko nguva, Jehovha wakavhunja Mosi kuti: “Vhunjai Aroni kudari: ‘Musai nyara yako yakabataro ndonga panyezuru po murambo, mugeri* ja Niro no mumakandhwa, zviite kuti macehe azare mu nyika yese yo Ejipita.’”
6 Ngo kudaro, Aroni wakamusa nyara yake panyezuru po kumwa yo Ejipita, macehe otanga kubuda, ozaja nyika yese yo Ejipita.
7 Asi vapiri vo masaramuso vakaitavo zvondhozvo ngo masaramuso avo, ivona vakaita kuti kubude macehe mu nyika yo Ejipita.
8 Perepo, Faro wakadanija Mosi na Aroni wovavhunja kuti: “Deketereranyi Jehovha kuti avhise macehe aya pamberi pangu no po vandhu vangu, ngokuti ndoda kupindisa vandhu kuti vaende koitira mupiro Jehovha.”
9 Mosi wakadavira Faro kudari: “Izvi zvinofira komuri. Munoda kuti ndideketere rini kuti macehe aya avhiswe pamberi penyu, pamberi po vashandiri venyu, no pamberi po vandhu venyu no munyumba jenyu? Asi mu Murambo wa Niro basi ngo maanozosara.”
10 Faro wakadavira kuti: “Mangwana.” Ngo kudaro, Mosi wakati: “Zvinozoitika mu kuzwirana no zvomanangaro, kuti muzive kuti akuna umwenizve wakaezana na Jehovha, Mwari wedu.
11 Macehe anozopera pamberi penyu, no mu nyumba jenyu, no pamberi po vashandiri venyu no po vandhu venyu. Anozosara mu Murambo wa Niro basi.”
12 Ngo kudaro, Mosi na Aroni vakabuda pamberi pa Faro. Mosi wakadeketerera Jehovha ngo pamusoro po macehe aakaviisa kuna Faro.
13 Perepo, Jehovha wakaita mukuzwirana no zvaakakumbihwaya ndi Mosi, macehe akatanga kufira mumba, paruvanje no kumaminda.
14 Ivona vakaunganija mututu jicikaverengeki jo macehe, nyikeyo yotanga kunuha.
15 Faro paakavona kuti zvaita nane, wakatindivaja mwoyo wake woramba kuvazwira, inga zvaakanangaya Jehovha.
16 Waro Jehovha wakavhunja Mosi kudari: “Vhunjai Aroni kuti: ‘Musai ndonga yako utake mavhu, iwona anozopinduka oita mutunga mu nyika yese yo Ejipita.’”
17 Ivona vakazviita. Aroni wakatambanuja ndonga yake wotaka mavhu, iwona akapinduka oita mutunga, joenda koruma vandhu no zvinyama. Mavhu ese o nyika yo Ejipita akapinduka kuita mutunga.
18 Vapiri vo masaramuso vakaejavo kuita zvondhozvo; kubudisa mutunga ngo masaramuso avo. Asi vakazvikonehwa. Mutunga iji jairuma vandhu no zvinyama.
19 Ngo kudaro, vapiri vo masaramuso vakavhunja Faro kuti: “Izvi zvaitwa ngo simba ra* Mwari!” Asi mwoyo wa Faro wakagara wakatindivara, aazivi kuvazwa, inga zvakanangaya Jehovha.
20 Perapo, Jehovha wakavhunja Mosi kuti: “Mukai mangwana co mangwanani uende pamberi pa Faro. Paanozomuka kuenda kocera kumwa ku murambo, muvhunjei kudari: ‘Jehovha wananga kudari: “Pindisai vandhu vangu kuti vandishandire.
21 Asi kudari ukaramba kupindisa vandhu vangu, inini ndinozokutumira maborovongo,* iwewe, vashandiri vako, vandhu vako no munyumba menyu munozozara ngo maborovongo.* Nyumba jese jo Ejipita jinozozara ngo maborovongo, anozofukija pese paanoguma.
22 Pa njiku yondhoyo, ndinozoita kuti ku ndharaundha yo Gosheni kunogaraya vandhu vangu, kusiyane no kumweni. Akuzovi no maborovongo,* ngo izvi munozoziva kuti inini, Jehovha, ndiri mu nyika ino.
23 Inini ndinozoita kuti vandhu vako no vandhu vangu vasiyane. Citatijo ici cinozoitika mangwana.”’”
24 Jehovha wakaita kudaro, maborovongo* akawanda maningi akanghwina mu nyumba ya Faro, nyumba jo vashandiri vake no Muejipita mwese. Nyika yese yakapera kushata ngo maborovongo.*
25 Pakupejisira, Faro wakadanija Mosi na Aroni wovavhunja kuti: “Endanyi henyu koitira mupiro Mwari wenyu muri mu nyika ino.”
26 Asi Mosi wakadavira kudari: “Azviiti, ngokuti mupiro jotinodari kuitira Jehovha Mwari wedu, jinonyangaja Vaejipita. Kudari tikaita mupiro jinonyangaja Vaejipita, ivona vecizvivona, avazotifuri ngo mapuwe?
27 Itusu tinozoita hwendo hwo njiku ndhatu kuenda muzvipare, motinozoenda koitira mupiro Jehovha Mwari wedu, mukuzwirana no zvaakativhunja.”
28 Faro wakati: “Ndinozomupindisa kuti muende koitira mupiro Jehovha, Mwari wenyu mu zvipare. Asi mucaenda ndhambo maningi. Ndiitirenyivo mukumbiro.”
29 Perapo, Mosi wakati: “Ndiri kuvha pamberi penyu, ndinozodeketerera Jehovha. Mangwana maborovongo* anozovha pamberi penyu, no pamberi po vashandiri venyu no pamberi po vandhu venyu. Asi imwimwi mambo Faro amudikani kuticengejazve ngo kuramba kupindisa vandhu kuti vaende koitira mupiro Jehovha.”
30 Perapo, Mosi wakavha pamberi pa Faro, wodeketerera Jehovha.
31 Ngo kudaro, Jehovha wakaita mukuzwirana no zvakanangaro Mosi, maborovongo* ese akavha pamberi pa Faro, no pamberi po vashandiri vake no pamberi po vandhu vake. Apana na rimwe haro rakasara.
32 Asi Faro wakatindivajazve mwoyo wake, wotama kupindisa vandhu.
Masoko o Pasi
^ Kana: “museri.”
^ Gama ngo Gama: “ici cikunwe ca.”
^ Kana: “mabhawa.”
^ Kana: “mabhawa.”
^ Kana: “mabhawa.”
^ Kana: “mabhawa.”
^ Kana: “mabhawa.”
^ Kana: “mabhawa.”
^ Kana: “mabhawa.”
