Ekisodho 9:1-35
9 Ngo kudaro, Jehovha wakavhunja Mosi kudari: “Endai ka Faro komuvhunja kudari: ‘Jehovha, Mwari wo Vahebheru ari kunanga kudari: “Pindisai vandhu vangu kuti vaende kondishandira.
2 Asi kudari ukaramba kuvapindisa, wovagajika kuno,
3 inini Jehovha, ndinozohwisa mushambi yako iri kumahavo. Ndinozohwisa haci, no mbongoyo, no kamera, no n’gombe no mavhuta. Ndinozozvihwisa ngo mutungu mukuru.
4 Zvokadi kamare inini Jehovha ndinozokwanisa kusiyanisa mushambi yo Vaiziraeri no mushambi yo Vaejipita. Apana na cimwe haco co Vaiziraeri cinozourawa.”’”
5 Jehovha watopera kugaja mukuvo waanozoita zviro izvi eciti: “Mangwana, inini Jehovha ndinozoita izvi mu nyika ino.”
6 Jehovha wakaita zviro zvondhozvo kamare pa njiku yakatevera. Mukhaindi wese wo zvifuyo zvo Vaejipita, wakapera kufa. Asi apana no cifuyo cimwe haco co Vaiziraeri cakafa.
7 Faro paakavhunjisa, wakazwa kuti akuna na cimwe haco co zvifuyo zvo Vaiziraeri cakafa. Pikija zvakadaro, Faro wakaenderera mberi akatindivarisa mwoyo wake. Ngo kudaro, aazivi kupindisa Vaiziraeri.
8 Jehovha wakavhunja Mosi na Aroni kudari: “Zajanyi nyara jenyu ngo marota. Mosi anodikana kumakhandira mudenga pamberi pa Faro.
9 Iwona anozoita bukuta rakaceta rinonga recimburuka mu nyika yese yo Ejipita. Bukuta iri rinozobara mota ku vandhu no zvinyama zviri mu nyika yese yo Ejipita.”
10 Ivona vakatora marota voenda pamberi pa Faro. Mosi wakamakhandira mudenga opinduka kuita mota jaibata vandhu no zvinyama. Mota iji jaiguma pa kuputika.
11 Vapiri vo masaramuso avacaikwanisepi kuima pamberi pa Mosi ngo pamusoro po mota iji. Ngokuti ijona jakabatavo vapiri ava no Vaejipita vese.
12 Asi Jehovha wakaitisa kuti mwoyo wa Faro utindivare. Iyena aazivi kutendera kuzwa zvakanangwa ndi Mosi na Aroni, inga zvainga zvakanangwa ndi Jehovha ecivhunja Mosi kuti ngo zvaizoitika.
13 Tevere Jehovha wakavhunja Mosi kudari: “Fumirisai comangwanani, uende pamberi pa Faro kuti umuvhuje kudari: ‘Jehovha, Mwari wo Vahebheru ari kunanga kudari: “Pindisai vandhu vangu kuti vaende kondishandira.
14 Wari inini ndiri kuda kukuviisira mutungu umweni. Mutungu uwu unozopsasa iwewe, no vashandiri vako, no vandhu vako, zvokuti iwewe unozoziva kuti akuna umweni wakatojana na inini pasi pese.
15 Zvokadi, nondainga ndakaviisa mutungu, kuti ndikuuraye, kuvhira iwewe no vandhu vako, maizodeno makapera kufa.
16 Asi inini ndakakuregera uri penye ngo pamusoro po thangwe iri: Rokukutatija simba rangu no kutizve zina rangu rizivike pasi pese.
17 Uciri kundoenderera mberi wecijikuja ngo kuramba kupindisa vandhu vangu?
18 Wari wecivonai, ndiri kuda kunisa nvura yo mapuwe mangwana mukuvo uno. Nvura iyi aizivi kumboitikazve Muejipita muno, kuvhira payakaumbhwa mbhera na nyamasi.
19 Waro tumirai soko ro kuti zvifuyo zvako zvese zviri kumahavo, no zviro zvako zviri kunja, zvinghwiniswe mukati. Ngokuti mundhu wese ano zviro zvake zviri kumahavo, zvobathwa ngo nvura iyi, zvinozopera kufa.”’”
20 Vashandiri vese va Faro vaithya zvakananga Jehovha, vakakwengweneja mushambi yavo, voidira mumba mayo.
21 Asi wese wainga acikadi kuzwira zvakananga Jehovha, wakasiya vashandiri vake no mushambi yavo kumahavo.
22 Jehovha wakavhunja Mosi kudari: “Musai nyara jako kudenga, kuti nvura yo mapuwe ine mu nyika yese yo Ejipita. Ngainire vandhu no zvinyama no zviro zvese zvinomera mu nyika yo Ejipita.”
23 Ngo kudaro, Mosi wakabata ndonga yake woimujura mudenga, Jehovha wotumira mbheni no nvura yo mapuwe pomwe no muriro* pasi pese. Jehovha wakaenderera mberi eciitisa kuti nvura yo mapuwe ine mu nyika yese yo Ejipita.
24 Yakana nvura yo mapuwe no muriro wairazva, wainga wakabatana no nvura yo mapuwe. Iyona yainga yakavanga maningi. Ciitiko ici cainga cicizivi kumboitikazve kuvhira Ejipita payakatanga kugahwa.
25 Nvura yo mapuwe yakanira zviro zvese zvainga zviri kunja mu nyika yo Ejipita. Kuvhira ku vandhu mbhera ku zvinyama. Iyona yakapera kupurura zviro zvese zvainga zvakamera no muti jese jainga jiri musora.
26 Ku ndharaundha yo Gosheni, kwainga no Vaiziraeri, ndikona basi kucizivi kunihwa ngo nvura iyi.
27 Ngo kudaro, Faro wakadanijisa Mosi na Aroni wovavhunja kudari: “Vhaza ino inini ndashaisha. Jehovha ndiyena wakarurama. Inini no vandhu vangu tashaisha.
28 Deketereranyi Jehovha kuti apeje mbheni no nvura yo mapuwe. Mukaita kudaro, inini ndinozomupindisa. Amuzogarizve muno.”
29 Ngo kudaro, Mosi wakamuvhunja kudari: “Pandinondobuda mu dhorobha muno, inini ndinozomusa nyara yangu pamberi pa Jehovha. Mbheni inozonyarara. Nvura yo mapuwe inozonyararavo. Kuti imwimwi muzive kuti pasi pano ngo pa Jehovha.
30 Inini ndinozviziva kuti pikija izvi zvikaitika, imwimwi no vashandiri venyu amuzothyi Jehovha Mwari.”
31 Ngo kudaro, sava* no sevhadha* zvakapera kucangajwa. Ngokuti sevhadha* yainga yootumbuka, sava* rainga roobuda maruva.
32 Asi mbeu* jainga jicito jatumbuka, ajizivi kucangajwa. Ngokuti mukuvo wajo wainga ucito wakwana.
33 Mosi wakabuda mu dhorobha ecivha ka Faro. Womusa nyara jake pamberi pa Jehovha. Ngo kudaro, mbheni no nvura yo mapuwe zvakapera.
34 Faro paakavona kuti nvura yo mapuwe no mbheni zvainga zvapera, iyena wakashaishazve. Wotindivarisazve mwoyo wake, iyena no vashandiri vake.
35 Faro wakaenderera mberi ecitindivarisa mwoyo wake. Iyena aazivi kupindisa Vaiziraeri. Inga zvainga zvakanangwa ndi Jehovha ecivhunja Mosi kuti ngo zvaizoitika.
Masoko o Pasi
^ Kangaije zviri kuda kunangira kurazva kukuru maningi ko mbeni.
^ Sava, rairimwa kuvhira kare. Uruji hwaro hwaishandiswa pa kuita nguvo.
^ Sevhadha imbeu yakatojana no tirigu.
^ Sevhadha imbeu yakatojana no tirigu.
^ Sava, rairimwa kuvhira kare. Uruji hwaro hwaishandiswa pa kuita nguvo.
^ Mbeu iji jinodanijwa kuti tirigu no siperta.
