Esdhra 1:1-11
1 Mu gore rokutanga ro kutonga kwa Siro mambo wo Persiya, kuti rikwanirisike soko ra Jehovha raakabhuya ecishandisa Jeremiya, Jehovha wakadira murangariro wake mu mwoyo wa Siro mambo wo Persiya, Siro wakatara masokowo. Iwona ainanga kudari:
2 “Siro mambo wo Persiya anoti: ‘Jehovha Mwari wo kumatenga wakandipa umambo hwese pa nyika. Iyena wakandigaja kuti ndimuvakire themberi mu dhorobha ro Jerusarema, riri mu Judha.
3 Mundhu wese ari pakati penyu anomushandira, Mwari wake ngaave naye. Ngo kudaro, ngaakhwire ku Jerusarema riri ku Judha, avakise themberi iri mu Jerusarema, themberi ya Jehovha Mwari wo Vaiziraeri, Mwari wo cokwadi.
4 Mundhu wese ari kugara inga munyikanja, azvinenyi kuti ari kugara kwapi, mavhizinyu ake ngaamubese ngo kumupa sirivha, goridhi, zviro zvimweni no mushambi. Kubatanijavo no mupiro yavanopira ku themberi ya Mwari wo cokwadi, iri mu Jerusarema.’”
5 Ngo kudaro, musoro jo mbhuri jo ku divi ro majibaba o Judha no o Bhenjamini, kubatanijavo vapiri no Varevhi , pamwepo na vese vaya vokuti Mwari wo Cokwadi wakavangisa cido cavo, vakanasirira kuti vaende kovakisa themberi ya Jehovha, iri mu Jerusarema.
6 Mavhizinyu avo ese akavabesa ngo kuvapa mujiyo jo sirivha, mujiyo jo goridhi, zviro zvimweni, mushambi no zviro zvo mutengo mukuru, kubatanijavo no mupiro jese javaipira.
7 Mambo Siro wakatuma vandhu kuti vaende kotora mujiyo jo mu themberi ya Jehovha jainga jakatohwa ndi Nebhukadhinezari mu Jerusarema woenda kojidira mu nyumba ya mwari wake.
8 Siro mambo wo Persiya, wakagaja Miteredhati mungwariri wo upfumi kuti avhise mujiyojo. Iyena wakajiverenga jese wopekeja Sheshibhazari dhodha ro Judha.
9 Mujiyo jakaverengwa nga iji: Mujiyo jo goridhi jakaita inga sestu jinokwana kuita 30, mujiyo jo sirivha jakaita inga sestu jinokwana kuita 1.000, mujiyo jakaita inga sestu jaishandiswa kuitira kucinja mujiyo jimweni jinokwana kuita 29,
10 zvitijhera zvo goridhi zvinokwana kuita 30, zvitijhera zvo sirivha zvaikwana kuita 410 no mujiyo jimweni jaikwana kuita 1.000.
11 Mujiyo jese jo goridhi no jo sirivha jaikwana kuita 5.400. Sheshibhazari wakajitora jese pa mukuvo wokuti varanda vaivha ku Bhabhironi vecienda ku Jerusarema.
