Esdhra 4:1-24
4 Vavengi vo Vajudha no va Bhenjamini, pavakazwa kuti vandhu vainga vakaviya kuvha kuuranda vainga vecivakisazve themberi ya Jehovha Mwari wo Vaiziraeri,
2 vakaenda kuna Zorobhabheri ngo kukasika no kumusoro jo mbhuri jo kudivi ro kumajibaba, vovavhunja kudari: “Ngativake tese, ngokuti kudari inga ndimwi, itusu tinonamata Mwari wenyu no kumuitiravo mupiro kuvhira mu njiku ja Esarihadhoni mambo wo Asiriya wakativiisa kuno.”
3 Ngo kudaro, Zorobhabheri na Jeshuwa no musoro jimweni jo mbhuri jo kudivi ro majibaba o Vaiziraeri, vakavadavira kudari: “Imwimwi amuzobatani na itusu pakuvaka themberi ya Mwari wedu, ngokuti itusu tega tinozovaka themberi ya Jehovha Mwari wo Vaiziraeri, inga zvotakavhunjwa ndi Mambo Siro, mambo wo Persiya.”
4 Vandhu vo nyika jaivatendeneja, vaienderera mberi vecirembesa vandhu vo Judha no kueja kuvaita kuti vasiye basa rokuvaka.
5 Ivona vakapagari vapangiri kuti vavhiringije mazano avo njiku jese ja mambo Siro, mambo wo Persiya, mbhera mu utongi hwa Dhariyo, Mambo wo Persiya.
6 Paakatanga kutonga Asuwero, ivona vakatara masoko okupumbha vagari vo Judha no vo Jerusarema.
7 Mu njiku ja Aritasheshi Mambo wo Persiya, Bhishirami, Miteredhati, Tabheeri, no vadoni vavo vamweni vakatara karata voitumira kuna mambo Aritasheshi. Ivona vakaisanduja kuiendesa mu ndumi yo Ciaramaiki, veciitara ngo maretera o Ciaramaiki.*
8 * Rehumi mutungamiriri wa govhernadhori na Shimishai mutari, vakatarira Mambo Aritasheshi karata inopumbha Jerusarema, vecinanga kudari:
9 (Karata yaivha kuna Rehumi mutungamiriri wa govhernadhori na Shimishai mutari no vadoni vavo vamweni, kubatanijavo vatongi, magovhernadhori, vatari, vandhu vo Ereki, Vabhabhironi, vagari vo Suza, zvinoreva, va Erami,
10 no majinja amweni akatohwa ndi mambo mukuru ano nduma Asenapari kwenda kuuranda, omadira mu madhorobha o Samariya no mu ndharaundha jimweni jo Mwombera wo Murambo Eufrate.) Zvino wari,
11 masoko ovakatara mu karata yovakatumira nga aya:
“Kuna Mambo Aritasheshi, vashandiri vake no vandhu vo mundharaundha yo Mwombera wo Murambo Eufrate.
12 Mambo ngaazive kuti Vajudha vakavhaya kondhoyo, voviya mu ndharaundha yedu, vaguma mu Jerusarema. Ivona vari kuvakisa dhorobha rakashata ro kupanduka, vecipejesa kuvakisa mupfimbiji no kudira maambo.
13 Mambo ngaazive izvi, kudari dhorobha iri no mupfimbiji jaro zvikapera kuvakwa, ivona avazoshabizve, avazopagari muhengo, avazopagarizve mushabo wo muzvitaka. Zviro zvakadari zvinozoita kuti mu ndau munovigihwa mare yo majimambo, mutame ciri cese.
14 Zvecivoneka kuti tinopocera mare yo mu nyumba ya mambo, tavona kuti azvizivi kunaka kugara takanyarara tecivona upfumi wa mambo wecivhiringijwa. Ngo kudaro, tatumira masoko aya kuna mambo,
15 kuti zvipsakisiswe mu bhuku ro zviitiko ro majicekuru enyu. Imwimwi munozovona mu bhuku ro zviitiko kuti dhorobha iri idhorobha ro vapanduki, rinopeja upfumi hwo majimambo no hwo maporovhinsiya. Kuvhira kare, dhorobha iri rinogara vandhu vanopandusa vamweni. Ndizvona zvakaita kuti irona riphwanyiwe.
16 Tinoda kuzivisa mambo kuti dhorobha iri no mupfimbiji jaro zvikapera kuvakiswa, imwimwi amuzokwanisi kuvonerera ndharaundha yo Mwombera wo Murambo Eufrate.”
17 Mambo wakatumira masoko kuna Rehumi mutungamiriri wa govherinadhori na Shimishai mutari, no vadoni vavo vamweni vaigara mu Samariya no mativi amweni o ndharaundha yo Mwombera yo Murambo Eufrate, eciti:
“Mucungamijo!
18 Karata yamakatara motitumira yakaverengwa mu njira yakajeka* pamberi pangu.
19 Ndakaita kuti kupsakisiswe, kovoneka kuti dhorobha iri kuvhira kare rinogara recimukira majimambo, irona rinopanduka no kuhwisa majimambo.
20 Mu Jerusarema mainga muno majimambo ano simba aitonga ndharaundha jese jo Mwombera wo Murambo Eufrate. Vandhu vaishaba, veciita muhengo no kupagari mushabo wo muzvitaka ku majimambo aya.
21 Ngo kudaro, ipanyi mutemo kuti basa iri riime, kuti dhorobha iri ritame kuvakiswazve mbhera ndipe mutemo umweni.
22 Ivanyi no cokwadi kuti shwiro iyi aizorejwi-rejwi, kuti upfumi wa mambo utame kuvhiringijwa.”
23 Ngo kudaro, karata ya mambo Aritasheshi payakapera kuverengwa pamberi pa Rehumi na Shimishai mutari pamwepo no vadoni vavo, ivona vakaenda ngo kukasika ku Vajudha ku Jerusarema vokamisa basa rokuvaka ngo hasha.
24 Ngo kudaro, basa ro kuvaka themberi ya Mwari mu Jerusarema rakaima. Rakaenderera mberi rakaima mbhera gore rocipiri ro kutonga ka Dhariyo, mambo wo Persiya.
Masoko o Pasi
^ Kangaije: “karata iyi yakatahwa ngo ndumi yo Ciaramaiki tevere yozosandujwa.”
^ Esdhra 4:9 mbhera 6:18 yatahwa ngo Ciaramaiki.
^ Kangaije: “yakasandujwa yoverengwa.”
