Esdhra 5:1-17
5 Tevere, muporofeti Agayo no muporofeti Zakariya, vakaporofeta ku Vajudha vainga Mujudha no mu Jerusarema, ngo zina ra Mwari wo Vaiziraeri wainga pakati pavo. Zakariya wainga muzukuru wa Idho.
2 Pondhopo, Zorobhabheri mwana wa Saratiyeri na Jeshuwa mwana wa Jehozadhaki vakatangazve kuvakisa themberi ya Mwari mu Jerusarema. Vaporofeti va Mwari vainga pondhopo vecivabesa.
3 Pa mukuvowo, govhernadhori Tatenai, Shetari-bhozenai no vadoni vavo vakaenda kovavhunjisa kudari: “Ndiyani wakamutendera kuti muvakise themberi iyi no kupejisa basa?”
4 Vakavhunjisazve kudari: “Ngoapi mazina o vandhu vari kushanda pa basa iri ro kuvaka?”
5 Asi Mwari wainga ecitungamirira vakuru vo Vajudha. Apana wakavaimisa mbhera Dhariyo aashire masoko ngo pamusoro po shwiro iyi no kumadavira.
6 Aya ndiwona masoko ari mu karata yakatumihwa kuna Mambo Dhariyo ndi Tatenai govhernadhori wo ndharaundha yo Mwombera wo Murambo Eufrate, Shetari-bhozenai no vadoni vavo, avo vainga magovhernadhori madoko o ndharaundha yo Mwombera wo Murambo Eufrate.
7 Mu karata yavakatumira ivona vakatara masoko ainanga kudari:
“Kuna Mambo Dhariyo:
“Runyararo ngauve nemwi!
8 Mambo ngaazive kuti itusu takaenda ku porovhinsiya yo Judha, ku themberi ya Mwari mukuru. Iyona iri kuvakiswa pecishandiswa mapuwe makuru no matabwa. Mapuwe aya no matabwa zviri kudihwa mu mabiravira. Vandhu vari kuita basa ngo mwoyo wese, irona riri kubudirira maningi kamare ngokuti ivona vari kushanda ngo simba.
9 Takavhunjisa vakuru vavo kudari: ‘Ndiyani wakamutendera kuti muvake themberi iyi no kupejisa basa?’
10 Takavavhunjisazve mazina avo kuti timadire pa karata iyi, kuti imwimwi mambo muzive kuti ndiyani vanarume vari kutungamirira basa iri.
11 Ivona vakatidavira kudari: ‘Itusu tiri vashandiri va Mwari wo kumatenga no wo panyika. Tiri kuvakisa themberi yakambovakwazve kare kamare. Iyona yakavakwa no kupejiswa ndi mambo mukuru wo ku Iziraeri.
12 Waro, zvecivoneka kuti majibaba edu akacamwisa Mwari wo kumatenga, iyena wakavadira mu nyara ja Nebhukadhinezari Mukaradhiya, Mambo wo Bhabhironi. Iyena wakaphwanya-phwanya themberi iyi wotorazve vandhu ovaendesa ku uranda ku Bhabhironi.
13 Asi pa gore rokutanga ro kutonga ka Siro Mambo wo Bhabhironi, iyena wakaita kuti kutahwe mutemo kuti themberi iyi ya Mwari ivakiswezve.
14 Kunja kwa izvi, Mambo Siro wakavhisa mu themberi yo Bhabhironi mujiyo jo goridhi no jo sirivha jo mu themberi ya Mwari, jainga jakatohwa ndi Nebhukadhinezari mu themberi yo Jerusarema ojiendesa mu themberi yo ku Bhabhironi. Mujiyo iji jakatohwa jopekejwa mwanarume anozwi Sheshibhazari,* wainga akagajwa inga govhernadhori ndi mambo Siro.
15 Siro wakamuvhunja kudari: “Torai mujiyo iji uende kojidira mu themberi iri mu Jerusarema. Themberi ya Mwari ngaivakiswezve pa ndau yayo yokare.”
16 Ngo kudaro, Sheshibhazari wakaviya odira maambo o themberi ya Mwari mu Jerusarema. Iyona iri kuvakwa kuvhira mukuvo wondhowo mbhera wari, asi aito yapera.’
17 “Wari, kudari zvakamunakira mambo, tumanyi vandhu kuti vapsakisise zvakatahwa zviri mu upfumi hwo nyumba ya mambo kondhoyo ku Bhabhironi. Kuti tivone dangani Mambo Siro wakaita mutemo waitendera kuti themberi ya Mwari ivakiswezve mu Jerusarema. Tevere, mambo titumirenyi cisungo cenyu ngo pamusoro po shwiro iyi.”
Masoko o Pasi
^ Kangaije Zorobhabheri anonangwa pana Esdhra 2:2; 3:8.
