Esdhra 6:1-22
6 Ngo kudaro, Mambo Dhariyo wakavhunja vandhu kuti vapsakisise. Ivona vakapsakisisa zviro zvakatahwa mu ndau inovigihwa upfumi wa mambo mu Bhabhironi.
2 Pakawanika muphukutu mu nyumba ya mambo ku Ekibhatana mu porovhinsiya yo Medhiya. Iwona waitahwa masoko aya:
3 “Mu gore ro kutanga ro kutonga ka Mambo Siro, Mambo Siro vakadira mutemo uu ngo pamusoro po themberi ya Mwari iri mu Jerusarema: ‘Themberi inodikana kuvakiswazve kuti ive ndau yokuitira mupiro. Maambo ayo anodikana kudihwa. Iyona inozoreba makovhadho* anokwana kuita makumatandhatu, yozova no upambhi o makovhadho anokwana kuita makumatandhatu.
4 Inozova no fira ndhatu jo mapuwe akakura no fira imwe yo matabwa. Mutengo wo mare yo kupagari zviro izvi, inozovha mu nyumba ya mambo.
5 Kusiyapo izvo, mujiyo jo goridhi no jo sirivha jo mu nyumba ya Mwari, jakavhiswa ndi Nebhukadhinezari mu themberi yainga mu Jerusarema wojiendesa Bhabhironi, jinozohwirijwa. Ijona jinozodihwa mu ndau yajo mu themberi iri mu Jerusarema jovigwa mu nyumba ya Mwari.’
6 “Ngo kudaro, Tatenai govhernadhori wo ndharaundha yo Mwombera wo Murambo Eufrate pamwepo na Shetari-bhozenai no vadoni vako, avo vainga magovhernadhori madoko o ndharaundha yo Mwombera wo Murambo Eufrate, budanyi kondhoyo.
7 Mucaphingaija mabasa o nyumba ya Mwari iyi. Govhernadhori wo Vajudha no vakuru vo Vajudha, vanozovakisa nyumba iyi pa ndau yayo yokare.
8 Kusiyapo izvo, ndiri kudira mutemo ngo pamusoro po zvamunodikana kuitira vakuru vo Vajudha kuti vaenderere mberi vecivaka themberi ya Mwari. Vanarume ava vanodikana kukasika kupuwa mare inovha mu upfumi wo nyumba ya mambo, zvinoreva mushabo yakatohwa mu ndharaundha yo Mwombera wo Murambo Eufrate kuti vandhu ava, vatame kuimisa basa.
9 Zvese zvavanozokumbira, vanozozvipuwa mukuwo wese, njiku jese zvicikacoti. Vanozopuwa n’gombe jorume, mavhuta orume, zvimavhuta zvorume zvidoko kuitira mupiro wo kupiswa kuna Mwari wo kudenga. Kubatanijavo tirigu, munyu, vhinyu no mafuta mukuzwirana no zvakanangwa ngo vapiri vari mu Jerusarema.
10 Kuti vaenderere mberi veciita mupiro jinodakajisa Mwari wo kumatenga no kuitira mukumbiro mambo no vana vake kuti vave no upenyu hwaushoni.
11 Inini ndinopavo mutemo wokuti ari wese anotama kuzwira mutemo uu, mwamba* wo nyumba yake unozovhiswa, iyena wozokohomehwa pondhopo. Nyumba yake inozoita ratirina yo vandhu vese ngo ndava yo cishaishi ici.
12 Mwari wakaita kuti zina rake rigare mondhomo, ngaauraye mambo ari wese kana mundhu ari wese anotama kuzwira mutemo uu ecida kuphwanya themberi ya Mwari iri mu Jerusarema. Inini Dhariyo ndinodira mutemo uu. Iwona ngautange kushanda ngo kukasika kamare.”
13 Ngo kudaro, Tatenai govhernadhori wo ndharaundha yo Mwombera wo Murambo Eufrate na Shetari-bhozenai no vadoni vavo, vakaita zvese ngo kukasika zvavakavhunjwa ndi Mambo Dhariyo.
14 Vakuru vo Vajudha vakavangiswa ngo masoko o uporofeti akanangwa ndi Agayo na Zakariya muzukuru wa Idho voenderera mberi vecivaka. Basa rakaenderera mberi recifamba. Ivona vakapeja kuvaka mukuzwirana no zvakanangwa ndi Mwari wo Iziraeri no zvakanangwa ndi Siro, Dhariyo na Aritasheshi Mambo wo Persiya.
15 Ivona vakapeja kuvaka themberi mu njiku yo citatu yo mweji wa Adhari,* mu gore rocitandhatu ro kutonga ka Mambo Dhariyo.
16 Ngo kudaro, Vaiziraeri, vapiri, Varevhi no vandhu vamweni vakaviya kuvha kuuranda, vakaita mabuso okufunungura themberi ya Mwari vakadakara.
17 Kuti vatange kushandisa themberi ya Mwari, vakapira mutengo unokwana kuita 100 wo n’gombe jorume, mutengo unokwana kuita 200 wo mavhuta orume, mutengo unokwana kuita 400 wo zvimavhuta zvorume zvidoko. Ivona vakaitazve mupiro kuitira cishaishi co Vaiziraeri vese. Mutengo unokwana kuita gumi na maviri o mabhongo* mukuzwirana no mavhumbo o Vaiziraeri.
18 Vakagaja vapiri mukuzwirana no zvikwata zvavo no Varevhi mukuzwirana no zvikwata zvavo kuti vaite basa ra Mwari mu Jerusarema inga zvakatahwa mu bhuku ra Mosi.
19 Vandhu vainga vakavha kuuranda, vakaita mabuso o Phasika mu njiku gumi na murongomuna yo mweji wokutanga.
20 Vapiri no Varevhi vainga vakacena, vese kamare vainga vakazvicenesa. Ivona vakapa cipo co Phasika kuitira vandhu vese vakavha kuuranda no vadoni vavo vainga vapiri pamwepo na ivona pacavo.
21 Ngo kudaro, Vaiziraeri vakavha kuuranda, vakaha cipo pamwepo no vandhu vaya vakavha ku majinja vakazvicenesa ku zviro zvakasvipa zvo majinja, kuti vabatane navo pakunamata Jehovha Mwari wo Vaiziraeri.
22 Ivona vakaitazve Mutambo wo Pau Jicina Mbijo vakadakara ko njiku nomwe, ngokuti Jehovha wainga wakavaita kuti vadakare, ngokuti wainga wapeyamija mwoyo wa mambo wo Asiriya kuti avabesere. Zvakaita kuti iyena avabesere pa basa ro kuvaka themberi ya Mwari wo cokwadi, Mwari wo Vaiziraeri.
Masoko o Pasi
^ Mutengo unokhwedera kuita 26,7 metro. Vonanyi Masoko Okuengejera B14.
^ Kana: “mupingo.”
^ Vonanyi Masoko Okuengejera B15.
^ Kana: “goto-goto; mbuji jorume.”
