Esdhra 8:1-36
8 Musoro jo mbhuri jo kudivi ro kumajibaba na vaya vakataririswa mukuzwirana no mbhuri javo, vakavha na inini ku Bhabhironi mu mukuvo wo utongi hwa Mambo Aritasheshi nga ava:
2 Pa mubarihwana wa Fineya painga na Gerishomi; pa mubarihwana wa Itamari painga na Dhanyeri; pa mubarihwana wa Dhavhidhi painga na Atushu;
3 pa mubarihwana wa Shekaniya wo vana va Paroshi painga na Zakariya pamwepo no vanarume vanokwana kuita 150 vakataririswa naye;
4 pa mubarihwana wa Pahati-mowabhi painga na Eriyehowenai mwana wa Zerahiya, pamwepo no vanarume vanokwana kuita 200 vakataririswa naye;
5 pa mubarihwana wa Zatu painga na Shekaniya mwana wa Jahazieri, pamwepo no vanarume vanokwana kuita 300 vakataririswa naye;
6 pa mubarihwana wa Adhini painga na Ebhedhi mwana wa Jonatani, pamwepo no vanarume vanokwana kuita 50 vakataririswa naye;
7 pa mubarihwana wa Erami painga na Jeshaya mwana wa Ataria pamwepo no vanarume vanokwana kuita 70 vakataririswa naye;
8 pa mubarihwana wa Shefatiya painga na Zebhadhiya mwana wa Mikaeri, pamwepo no vanarume vanokwana kuita 80 vakataririswa naye;
9 pa mubarihwana wa Jowabhi painga na Obhadhiya mwana wa Jehiyeri, pamwepo no vanarume vanokwana kuita 218 vakataririswa naye;
10 pa mubarihwana wa Bhani painga na Sheromiti mwana wa Jozifiya, pamwepo no vanarume vanokwana kuita 160 vakataririswa naye;
11 pa mubarihwana wa Bhebhai painga na Zakariya mwana wa Bhebhai, pamwepo no vanarume vanokwana kuita 28 vakataririswa naye;
12 pa mubarihwana wa Azigadhi painga na Johanaa mwana wa Akatani, pamwepo no vanarume vanokwana kuita 110 vakataririswa naye;
13 mazina a vaya vakahwirira pa kupejisira pa mubarihwana wa Adhonikami nga aya: Erifereti, Jeiyeri, Shemaya, pamwepo no makumatandhatu o vanarume vakataririswa navo;
14 pa mubarihwana wa Bhigivhai painga pana Utai na Zabhudhi, pamwepo no vanarume vanokwana kuita 70 vakataririswa navo.
15 Ndakavaunganija phedo no murambo waipopoma kwenda ku Ahavha, togarepo njiku ndhatu. Asi pandakapsakisisa pakati po vandhu no vapiri, andizivi kuwana Murevhi ari wese.
16 Ngo kudaro, ndakadaninjisa Eriyezeri, Ariyeri, Shemaya, Erinatani, Jaribhi, Erinatani, Natani, Zakariya na Meshuramu, ava vainga vanarume vaitungamirira. Ndodaninjisazve Joyaribhi na Erinatani, ava vainga vajijisi.
17 Ngo kudaro, ndakavatumira kuna Idho mutungamiriri wo ndau inodaninjwa kuti Kasifiya. Inini ndakavavhunja kuti vakumbire Idho, hama jake no vashandi* vo mu themberi vainga mu Kasifiya kuti vativiisire vashandi kuitira themberi ya Mwari wedu.
18 Zvecivoneka kuti nyara ya Mwari wedu yainga pakati pedu, ivona vakatitumira Sherebhiya, mwanarume wainga akangwara, pamwepo no vana vake no hama jake. Vese pamwepo vainga gumi na vasere. Sherebhiya wainga mwana wa Mahiri, Mahiri wainga muzukuru wa Revhi, Revhi wainga mwana wa Iziraeri.
19 Vakatumirazve Ashabhiya, iyena wainga na Jeshaya Mumerari, pamwepo no hama jake no vana vake. Vese pamwepo vainga makumaviri o vanarume.
20 Kwaingazve no vashandi* vo muthemberi vanokwana kuita 220. Dhavhidhi no vatongi vakavapa basa ro kubesera mabasa o Varevhi. Vese vakagajwa mukuzwirana no mazina avo.
21 Ndakazivisa kuti tizire* pondhopo, phedo no murambo Ahavha, kuti tizvidodokese pamberi pa Mwari wedu no kukumbira ndhungamiriro kuitira hwendo hwataizoita no vana vedu kubatanijavo no zviro zvedu.
22 Ndakaita nyowa yo kukumbira mambo masoca no vapakiri vo haci kuti vatingwarire ku vavengi vataizosongana navo mugwanja. Zvecivoneka kuti tainga takavhunja mambo kudari: “Nyara yakanaka ya Mwari wedu iri panyezuru po vese vaya vanomupsaka. Asi simba rake no ushungu hwake zvinohwisa vese vaya vanomusiya.”
23 Ngo kudaro, takazira,* tokumbira Mwari wedu ngo pamusoro pazvo. Iyena wakazwa kudeketera kwedu.
24 Pakati po vatungamiriri vo vapiri ndakasana gumi na vaviri. Ivona vainga ava: Sherebhiya, Ashabhiya no hama javo jinokwana kuita gumi.
25 Ndakavapimira sirivha, goridhi no mujiyo jainga mu themberi ya Mwari wedu, jakapihwa ndi mambo, vapangiri vake, vatungamiriri vake no Vaiziraeri vese.
26 Ndakapima no kuvapekeja matarenta o sirivha anokwana kuita 650, mujiyo jo sirivha jairema matarenta* maviri jinokwana kuita 100 no matarenta o goridhi anokwana kuita 100.
27 Kusiyapo izvi, ndakavapa makumaviri o zvitijhera zvo goridhi zvainga no mutengo o madhariko* anokwana kuita 1.000. Ndovapazve mujiyo muviri jo utare hwakaperera waimonikira kori yo kupsuka. Mujiyo iji jaisisira maningi inga goridhi.
28 Ndakavavhunja kudari: “Imwimwi muri vakacena va Jehovha, mujiyo yakacenavo. Sirivha no goridhi ndi mupiro yo kuzvipira kuna Jehovha Mwari wo majicekuru enyu.
29 Nasanyi kutaja zviro izvi mbhera zvipimwe mu themberi ya Jehovha pamberi po vatungamiriri vo vapiri, pamberi po Varevhi, no pamberi po vatongi vo musoro jo mbhuri jo kudivi ro majibaba o Vaiziraeri vari mu Jerusarema.”
30 Vapiri no Varevhi vakatora sirivha, goridhi no mujiyo jainga jakapimwa kuti vaende najo ku Jerusarema, mu themberi ya Mwari wedu.
31 Pa njiku gumi na mbiri yo mweji wo kutanga, takabuda pa murambo wa Ahavha toenda ku Jerusarema. Nyara ya Mwari wedu yainga nesu, iyena wakatiponesa mu nyara jo vavengi no ku vaya vaitifindarira mu makwanja.
32 Takaguma ku Jerusarema togareyo njiku ndhatu.
33 Pa njiku yo cirongomuna, takapima sirivha, goridhi no mujiyo mu themberi ya Mwari wedu, tozvipekeja mupiri Meremothi mwana wo mupiri Urija. Iyena wainga na Eriyazari mwana wa Fineya. Waingazve no Varevhi ava: Jozabhadhi mwana wa Jeshuwa na Nowadhiya mwana wa Bhinuyi.
34 Zvese zvakaverengwa no kupimwa. Mupimo wazvo zvese wakatarihwa.
35 Vaya vakavha ku uranda vainga varanda vakaita mupiro wo kupiswa kuna Mwari wo Vaiziraeri. Vakapira zvivana zvo mavhuta zvinokwana kuita gumi na zviviri kuitira Vaiziraeri vese, makumatandhatu na mapfumbamwe o mavhuta, makumanomwe na nomwe o mavhuta o rume no gumi na maviri o mabhongo* inga mupiro wo cishaishi. Zvese izvi inga mupiro wokupiswa kuna Jehovha.
36 Ngo kudaro, takapekeja masoko a mambo ku vavonereri va mambo no ku magovhernadhori o ndharaundha yo Mwombera wo Murambo Eufrate. Ivona vakabesera vandhu no themberi ya Mwari wo cokwadi.
Masoko o Pasi
^ Kana: “Vanetinimi.” Gama ngo Gama: “Vandhu vakapuwa Mwari kuti vamushandire.”
^ Kana: “Vanetinimi.” Gama ngo Gama: “Vandhu vakapuwa Mwari kuti vamushandire.”
^ Kana: “tisanye.”
^ Kana: “takasanya.”
^ Tarenta rimwe rairema kiru jinokwana kuita 34,2. Vonanyi Masoko Okuengejera B14
^ Dhariko rainga moweda wo goridhi ro ku Persiya. Vonanyi Masoko Okuengejera B14.
^ Kana: “goto-goto; mbuji yo rume.”
