Esdhra 9:1-15
9 Zviro izvi pazvakapera kuitika, vatungamiriri vakaviya kondiri vonanga kudari: “Vaiziraeri, vapiri no Varevhi avazivi kuparajana no vandhu vo ndharaundha jakavatendeneja nee no zvirovejeso zvavo zvinonyangajisa, zvirovejeso zvo Vakhanani, zvo Vahiti, zvo Vaperezi, zvo Vajebhusi, zvo Vaamoni, zvo Vamowabhi, zvo Vaejipita no zvo Vaamori.
2 Ivona no vana vavo vakarovora vanakaji vo nyika iji. Wari, mubarihwana wakacena wabatana no vandhu vo nyika jakavatendeneja. Vatungamiriri no magovhernadhori madoko ndivona vakanyanya kuita zviito izvi zvo kutama kugondeka.”
3 Pandakazwa izvi, ndakamwesa nguvo yangu no hanju yangu. Ndakavhita vhuji rangu no ndevhu jangu. Ndakagara pasi ndecineseka maningi.
4 Vese vaireremeja* masoko a Mwari wo Iziraeri vakaungana pamberi pangu ngo ndava yo kutama kugondeka ko vandhu vainga vakavha ku uranda. Inini ndakaenderera mberi ndakagara pasi ndecineseka maningi mbhera comadeko pa nguva yaiithwa mupiro yo mucece.
5 Poyakaguma nguva yo kuita mupiro yo mucece co madeko, ndakamuka pa ndau yandainga ndakagara ndecineseka maningi, ndino nguvo yangu no hanju yangu yakamweka. Ndakagwadama ndotambanuja nyara yangu kuna Jehovha Mwari wangu.
6 Inini ndakati: “Mwari wangu, ndakanyowejeka maningi zvokuti andikwanisi kumusota, ngokuti zvishaishi zvedu zvawandisisa mbhera kuguma pa musoro jedu. Ndava jedu jaita mututu mbhera kuguma kumatenga.
7 Kuvhira mu njiku jo majicekuru edu mbhera nyamasi, ndava yedu iri kundokura. Ngo ndava yo zvishaishi zvedu, itusu, majimambo edu no vapiri vedu tiri kudihwa mu nyara jo majimambo o nyika jimweni, teciurawa ngo banga, teciendeswa ku uranda, tecitorehwa zviro zvedu no kunyowejwa inga zviri kuitika nyamasi.
8 Asi wari Jehovha Mwari wedu watiitira unyasha pa nguva shoma, ngo kutendera kuti papone vandhu vashoma no kutipekeja ndau yakangwaririka pa ndau yenyu yakaceneswa, kuti itusu tidakare maningi kamare. Mwari wedu watiita kuti tizorore padoko pa uranda hwedu.
9 Ngokuti pikija tiri varanda, Mwari wedu aazivi kutisiya mu uranda, asi ngo rudo hwake hucikacinji iyena wakatikhombijira unyasha pamberi po majimambo o Persiya kuti ativangise no kuvaka themberi ya Mwari wedu, no kuvakisazve mathere ayo, kuti atipe mupfimbiji wo mapuwe* mu Judha no mu Jerusarema.
10 “Asi wari Mwari wedu, pasure po zviro izvi zvese, ngozvapi zvatingananga? Ngokuti itusu takasiya mupango yenyu,
11 yamakatipa mecishandisa vashandiri venyu vaporofeti meciti: ‘Nyika yamuri kunghwina aizivi kucena, ngo ndava yo kutama kucena ko vandhu vo nyika jakaitendeneja no zvirovejeso zvavo zvinonyangajisa. Ivona vakaizaja yese kamare ngo zviro zvicizivi kucena.
12 Mucatendera kuti vana venyu vokaji varovohwe ngo vana vavo vorume, nee kutendera kuti vana venyu vorume varovore vana vavo vokaji. Nee amudikani kuvabesera kuti vabudirire no kuva no runyararo. Mukaita kudaro, munozova no simba, munozoha zviro zvakanaka zvo nyika iyi no kuitora kuti ive yo vana venyu kwenda no kwenda.’
13 Asi pasure po zviro zvese zvakatiitikira ngo ndava yo zviito zvedu zvakashata no ndava yedu yakakura, imwimwi Mwari wedu amuzivi kutihwirijira mukuzwirana no zvishaishi zvedu. Makaita kuti itusu tiriyari pano tipone.
14 Kureva kuti tinozotama kuzwira mupango yenyu toita zvitenderano no vandhu vano zvirovejeso zvinonyangajisa? Kureva kuti amucaizonyangajwa moguma pakutiuraya motama kusiya na umwe hake ecipona?
15 Jehovha Mwari wo Iziraeri, imwimwi makarurama ngokuti vamweni vedu tiri kupona mbhera nyamasi. Tiri pamberi penyu inga vandhu vano ndava, pikija hazvo zvicikakwanisiki kuima pamberi penyu ngo ndava yo zvishaishi zvedu.”
