Esteri 1:1-22
1 Mu njiku ja Asuwero,* zvinoreva Asuwero waitonga mu porovhinsiya jinokwana 127 kuvhira Indiya mbhera Etiyopia,
2 mu njiku jokuti iyena waigara pa ndau yake yo kutonga ku Shushani,*
3 mu gore ro citatu ro kutonga kwake, iyena wakaitira mabuso nduna jake no vashandi. Nduna jo masoca o Persiya no o Medhiya, vandhu vanoreremejwa no vatongi vo porovhinsiya vaingavo pondhopo.
4 Iyena wakavakhombija upfumi hwo umambo hwake hwainga no nduma. Wakapeja njiku zinji, jinokwana kuita 180, acivakhombija kureremejwa no kukura ko umambo hwake.
5 Pasure po njiku iji, mambo wakaitira mabuso vandhu vese vainga mu Shushani* pa mazuva manomwe, kutangira madhodha mbhera ku vana vadoko, paruvanje wo jhardhim wo nyumba yake.
6 Paruvanje wo jhardhim, painga pakanemeswa ngo nguvo jakanaka, jakaithwa ngo thonje, jakadihwa kori yo burumu, josungwa ngo zvimapote zvakatetepa zvopsukirikira. Izvona zvakasimijwa pa zvibato* zvo sirivha, zvodihwa pabiravira ro mapuwe anomonikira. Paingazve no zvigariro zvo goridhi no sirivha, panyezuru po mapuwe anodanijwa porofiri, mapuwe anomonokira, maperora no mapuwe anomonokira o kusvipa.
7 Vhinyu yaiperekehwa mu kopo jo goridhi. Kopo imwe na imwe yaisiyana no imweni. Vhinyu ya mambo ndiyona yaiperekehwa maningi mukuzwirana no zvaainga nazvo.
8 Vese vaimwa ngo kuteveja kuda kwavo, ngokuti mambo wainga akavhunja vatungamiriri vo pa nyumba yake kuti vavhunje vandhu kuti vaite zvavanoda.
9 Vahosi Vhasti vakaitiravo mabuso vanakaji pa nyumba ya mambo Asuwero.
10 Pa njiku yo cinomwe, mwoyo wa mambo pawainga wakadakara ngo ndava yo vhinyu, wakatuma vatungamiriri vanomwe Mehumani, Bhizita, Aribhona, Bhigita, Abhagita, Zetari na Karikasi vaishanda pa nyumba ya mambo Asuwero,
11 kuti vaviise vahosi Vhasti pamberi pa mambo, vakasimira resu* ro umambo, kuti vakhombije vandhu vese no nduna, kuseja* kwavo, ngokuti ivona vaiseja maningi.
12 Asi vahosi Vhasti vairamba kuviya mambo paaindotumira nduna jake jo umambo. Ngo kudaro, mambo wakanyangajwa maningi wobwaka ngo ushungu.
13 Mambo wakadaninja vazivi vaiziva ushoni mutemo, ngo kuti ndava jese ja mambo jaidikana kutongwa pamberi po vazivi vo mupango no vomutemo.
14 Vandhu vo phedo vaaishanda navo vainga Karishena, Shetari, Adhimata, Tarishishi, Meresi, Marisena na Memukani. Nduna nomwe iji jo Persiya no Medhiya jaitendehwa kuvona mambo ngokuti ijona jainga no zvigaro zvakakhwirira mu umambo.
15 Mambo wakavavhunjisa kudari: “Mukuzwirana no mutemo, vahosi Vhasti vanodikana kuithwenyi? Ngokuti ivona avazivi kuzwira zvakanangwa ndi mambo Asuwero ecituma nduna jake jo umambo.”
16 Memukani wakadavira pamberi pa mambo no po nduna jese kudari: “Vahosi Vhasti avazivi kushaishira mambo basi, vashaishiravo nduna jese no vandhu vese vanogara mu porovhinsiya ja mambo Asuwero.
17 Ngokuti zvavaita vahosi Vhasti zvinozozivika ngo vanakaji vese, na ivona vanozoshoravo majimwamuna avo vecinanga kudari: ‘Mambo Asuwero wakatumira vahosi Vhasti kuti vaviye pamberi pake asi ivona vakaramba.’
18 Pa njiku yondhoyo kamare, vakaji vese vo nduna jo Persiya no Medhiya vakambhera ngo kuzvizwa zwaithwaro mbhahosi vanozoitiravo zvondhozvo majimwamuna avo anoshanda inga nduna ja mambo. Kunozova no kushohwa kukuru no kunyangaja.
19 Mambo ngaanange masoko anozotahwa mu mutemo yo Persiya no yo Medhiya kuti itame kucinjwa. Votara kudari: Vhasti aacazoviizve pamberi pa mambo Asuwero. Mambo anozopa uhosi mwanakaji umweni wakanaka kupinda iyena.
20 Mutemo wa mambo paunozozivika mu utongi hwake hwese, vanakaji vese vanozoreremeja majimwamuna avo, kutangira vakuru mbhera ku vadoko.”
21 Masoko aya akadakajisa mambo no nduna jake. Mambo wakaita zvakananga Memukani.
22 Ngo kudaro, mambo wakatumira karata ku porovhinsiya jese jo utongi hwake. Porovhinsiya imwe na imwe ngo matariro ayo no ndumi yo vandhu vayo yecinanga kudari: Mwanarume anodikana kutonga pa muzi pake ecibhuya ndumi yo jinja rake.
Masoko o Pasi
^ Zvinozivika kuti ndi Shershe wo kutanga, mwana wa Dhariyo Mukuru (Dhariyo Istaspe).
^ Kana: “Suza.”
^ Kana: “Suza.”
^ Kana: “zviradhondo.” Izvi zvakatojana no mbhete.
^ Kana: “jira.”
^ Kana: “kunyara.”
