Esteri 2:1-23
2 Pasure po zviitiko izvi, ushungu wa Mambo Asuwero pawainga wagajana, iyena wakaceujika zviro zvainga zvaithwa ndi Vhasti no zvavainga vasunga kumuitira.
2 Vashandi vo phedo va mambo vakananga kudari: “Mambo anodikana kupsangihwa mbhandwe no jiri vasikane vakaseja.*
3 Mambo ngaagaje vatungamiriri mu porovhinsiya jese jo utongi hwake, kuti vaunganije mbhandwe jese jakaseja* jo vasikane ku Shushani* ku nyumba yo vanakaji. Ivona vanozongwarihwa ndi Egai mukuru-kuru* wa mambo anovonerera vanakaji. Ivona vanozoashira mafuta anozoita kuti muviri javo jiseje* maningi.
4 Mbhandwe inozodakajisa mambo, ndiyona inozoita vahosi pa ndau ya Vhasti.” Masoko aya akadakajisa mambo, wotozviita.
5 Mushushani* mainga muno Mujudha umweni waidaninjwa Mordhekai mwana wa Jairi. Jairi wainga mwana wa Shimei. Shimei wainga mwana wa Kishi mu Bhenjamini.
6 Iyena wainga wakatohwa ndi Nebhukadhinezari Mambo wo Bhabhironi kuvha mu Jerusarema, pamwepo na vaya vakaendeswa ku uranda na Jekoniya* mambo wo Judha.
7 Iyena wakarera Hadhasa,* zvinoreva Esteri mwana wo hama ya baba wake,* ngokuti iyena wainga afihwa ndi baba na mai. Esteri wainga musikane wakaseja* maningi. Mordhekai wakamurera inga mwana wake pasure pokufa ka babake na mai wake.
8 Masoko a mambo no mutemo po zvakatokoteswa, vasikane vazinji vaitohwa kwendeswa Shushani* ku nyumba ya mambo kuti vangwarihwe ndi Egai. Esteri wakatohwavo kwenda ku nyumba ya mambo kuti angwarihwe ndi Egai mungwariri wo vanakaji.
9 Musikane uwu wakadakajisa maningi Egai, woitihwa unyasha ndiyena. Ngo kudaro iyena wakakasikira kunasirira kuti aende koozojwa mafuta kuti aseje* maningi, kupuwa zvokuha zvaushoni no kumusanira vasikane vanomwe mu nyumba ya mambo kuti vamushandire. Iyena wakamuthuthisa* no vasikane vanomwe vaimushandiraya kuti vaende ku nyumba yakanakisisa yo vanakaji.
10 Esteri aazivi kuvhunja ari wese ngo pamusoro po vandhu vake kana ukama hwake, ngokuti Mordhekai wakamuvhunja kuti atame kuzvivhunja ari wese.
11 Njiku jese Mordhekai waifamba pa ruvanje hwo nyumba yo vanakaji kuti azive magariro akaita Esteri no zvaimuitikira.
12 Musikane wese acito aenda ka mambo Asuwero, waidikana kupeja mweji gumi na muviri acinyariswa inga zvaaitwa vanakaji. Kunyariswa kwaaidikana kuitwa nga uku wari: Waidikanaka kupeja mweji mutandhatu acizojwa mafuta anozwi mira. Opejazve mweji mutandhatu acizojwa ngo mafuta o muti jinonuhira no mafuta amweni aaizojwa kuti aseje.*
13 Perapo musikane waizova wakanasiririka kuti aende kuna mambo. Ciri cese caaizokumbira waizopuwa acivha ku nyumba yo vanakaji kwenda ku nyumba ya mambo.
14 Iyena wainghwina mu nyumba ya mambo co madeko, comangwanani wohwirira ku nyumba yocipiri yo vanakaji yaingwarihwa ndi Shaashigazi, muranda* waingwarira vakaji vamweni va mambo. Iyena aacaihwirirazve ka mambo acikazivi kudakarihwa maningi ndi mambo naacizivizve kutumihwa mundhu kuti aende koomudana.
15 Pakaguma vhaza ya Esteri mwana wa Abhihairi hama ya Mordhekai, waakatora Mordhekai kuti aite mwanake, iyena wakaenda ka mambo wotama kukumbira ciri cese kuciripi zvaakavhunjwa ndi Egai muranda* wa mambo waingwarira vanakaji. (Pa mukuvo wondhowo, mundhu wese waivona Esteri waimudakarira.)
16 Esteri wakatohwa kwenda ka mambo Asuwero ku nyumba yake yo umambo pa mweji wocigumi, mweji wa Tebheti* mu gore rocinomwe ro kutonga kwake.
17 Mambo wakada maningi Esteri kupinda vanakaji vamweni, iyena wakaitihwa unyasha ndiyena kupinda mbhandwe jimweni. Ngo kudaro wakamusimija jira ro umambo mu musoro, womuita vahosi kuciripi Vhasti.
18 Mambo wakaitira mabuso makuru vandhu vaaitonga navo no vashandiri vake, mabuso a Esteri. Iyena wakazivisa rusujunuko hwo vasungwi vese mu porovhinsiyejo, wopekeja zvipo mukuzwirana no zviro zvainga na mambo.
19 Mbhandwe pajakaviiswa pa vhaza yocipiri, Mordhekai waigara pa musuvo wa mambo.
20 Esteri aazivi kubhuya zviri zvese ngo pamusoro po ukama hwake no vandhu vo kwaakavha inga zvaakavhunjwa ndi Mordhekai. Esteri wakaenderera mberi eciita zvese zvaakavhunjwa ndi Mordhekai inga zvaaita paaikorondhwa ndiyena.
21 Mu njiku ijo, Mordhekai paaigara pa musuvo wa mambo, Bhigitani na Tereshi vakanyangajwa voita zano rokuuraya Mambo Asuwero. Ivona vaitonga na mambo, vecishanda inga vangwariri vo musuvo.
22 Asi Mordhekai paakazviziva wakavhunja vahosi Esteri ngo kukasika. Esteri wakavhunja mambo ngo zina ra Mordhekai.
23 Ngo kudaro, shwiroyo yakapsakisiswa zvozoguma pakuvoneka kuti ndizvonadi. Vanarume vaviri ava vakakohomehwa pa mutanda. Zvese zvakaitikari zvakatahwa mu bhuku ro zvakaitika zvo mu nguveyo pamberi pa mambo.
Masoko o Pasi
^ Kana: “vakanyara.”
^ Kana: “jakanyara.”
^ Kana: “Suza.”
^ Gama ngo Gama: “ngomwa.” Vonanyi Kudurujihwa ko Magama pa gama rokuti “ngomwa.”
^ Kana: “jinyare.”
^ Kana: “Musuza.”
^ Anodaninjwazve Jehoyakini pana 2 Majimambo 24:8.
^ Kana: “baba mukuru kana baba mudoko.”
^ Kana: “wakanyara.”
^ Zvinoreva: “Muti wo Mukute.”
^ Kana: “Suza.”
^ Kana: “anyare.”
^ Kana: “wakafurujwa.”
^ Kana: “anyare.”
^ Gama ngo Gama: “ngomwa.” Vonanyi Kudurujihwa ko Magama pa gama rokuti “ngomwa.”
^ Gama ngo Gama: “ngomwa.” Vonanyi Kudurujihwa ko Magama pa gama rokuti “ngomwa.”
^ Vonanyi Masoko Okuengejera B15.
