Esteri 3:1-15
3 Pasure pa izvi, mambo Asuwero wakakhwija Amani mwana wa Amedhata mu Agagi. Wakamukhwija ngo kumudira pacigaro ciri panyezuru po vandhu vese vaaitonga navo.
2 Vashandi vese va mambo vainga pa musuvo, vaigwadama no kukotama pamberi pa Amani kudari inga zvakanangwa ndi mambo. Asi Mordhekai wairamba kukotama no kumugwadamira.
3 Ngo kudaro, vashandi va mambo vainga pa musuvo pake, vakavhunjisa Mordhekai kudari: “Ngenyi iwewe auzwiri mutemo wa mambo?”
4 Ivona vaimuvhunjisa izvi njiku ngo njiku, asi iyena acaivapurukira. Perapo, vakavhunja Amani kuti avone kuti zviri kuitari Mordhekai zvaizosiiwa kana kuti haiwa, ngokuti iyena wainga akavavhunja kuti iyena wainga Mujudha.
5 Amani paakavona kuti Mordhekai ari kuramba kukotama no kumugwadamira, iyena wakanyangajwa maningi.
6 Asi iyena wakavona kuti azvikwani basi kuuraya Mordhekai, ngokuti wainga akavhunjwa kuti iyena wainga Mujudha. Ngo kudaro, Amani wakapsaka njira jokupeja Vajudha vese vari mu utongi hwa mambo Asuwero no kupeja ukama hwese hwa Mordhekai.
7 Mu gore ro cigumi napiri ro kutonga ka mambo Asuwero, mu mweji wokutanga, mweji wa Nisani, kwakakhandihwa puri, zvinoda kureva kuti sorti, pamberi pa Amani kuti vazive njiku no mweji. Sorti yakawira pa mweji wo cigumi napiri, mweji wa Adhari.*
8 Amani wakananga kudari kuna mambo Asuwero: “Kuno vandhu vakawanda vari pakati po vandhu vo porovhinsiya jamunotongari, mutemo javo jakasiyana maningi no mutemo jo vandhu vese. Ivona avazwiri mutemo ja mambo, kuvasiya kudaro zvinokhanganisa maningi kuda ka mambo.
9 Kudari ngo kuda kwenyu mambo, ngakuithwe kuti kutahwe mutemo unonanga kuti vapejwe vese. Inini ndinozopagari vandhu vanoshanda na mambo ngo mutengo unokwana kuita 10.000 zvo matarenta* o sirivha kuti vamadire munovigihwa mare yo umambo.”
10 Mambo wakavhisa mbhete* ino cidhindho yainga munyara make woipa Amani muvengi wo Vajudha mwana wa Amedhata mu Agagi.
11 Mambo wakati kuna Amani: “Sirivha no vandhu zviri mu nyara mako, itai zvaunovona kuti zvakanaka.”
12 Vatari va mambo vakadanijwa mu njiku gumi na ndhatu yo mweji wokutanga. Ivona vakatara mutemo jese ja Amani jaiyenda ku vatongi vo umambo, vatongi vo maporovhinsiya no vatongi vo vandhu vakasiyana-siyana. Muporovhinsiya imwe na imwe, yainga no phepha rayo, vandhu vo zvikwata zvakasiyana-siyana, vainga no phepha ravovo mu ndimi yavo. Mutemo jakatahwaro, jakatahwa ngo zina ra Mambo Asuwero, jodhindhwa ngo mbhete* ino cidhindho ca mambo.
13 Karata jakatumihwa ngo ndhumwa mu porovhinsiya jese ja mambo. Vopuwa mutemo wo kupeja, kuuraya no kuparaja Vajudha vese, majaha no madhodha, vana no vanakaji, mu njiku imwe basi, njiku gumi natatu yo mweni wo cigumi napiri, mweji wa Adhari no kutora zviro zvavo.
14 Masoko o zvakatahwari aidikana kutokoteswa inga mutemo wo prorovhinsiya jese, oziviswa vandhu vese kuti vagare vakaronga kuitira njiku iyi.
15 Ndhumwa jakaenda ngo kukasika ngo kuteveja mutemo wa mambo. Mutemo wakatokoteswa mu Shushani,* dhorobha ra mambo. Perapo mambo na Amani vakagara pasi vomwa, asi dhorobha ro Shushani,* raiita joweyowe.
Masoko o Pasi
^ Vonanyi Masoko Okuengejera B15.
^ Tarenta rimwe rairema kiru jinokwana kuita 34,2. Vonanyi Masoko Okuengejera B14.
^ Kana: “aneri.”
^ Kana: “aneri.”
^ Kana: “Suza.”
^ Kana: “Suza.”
