Genesisi 1:1-31
1 Pakutanga Mwari wakarura kudenga no pasi.
2 Pasi pano painga pacina ciro, paiita inga bani. Panyezuru po kumwa yakawanda painga pano cidima.* Ngo kudaro, simba ra Mwari raitenderera* panyezuru po kumwa.
3 Mwari wakati: “Ngakuve no ruvheneko.” Ngo kudaro kwakava no ruvheneko.
4 Pasure pazvo, Mwari wakavona kuti ruvheneko wainga wakanaka, Ngo kudaro Mwari wakatanga kuparajanisa ruvheneko no cidima.*
5 Mwari wakadanija ruvheneko kuti Masikati, asi cidima* wakacidanija kuti Usiku. Kwakaita madeko no mangwanani, njiku yo kutanga yapera.
6 Mwari wakati: “Pakati po kumwa ngapawanike ndau yakakura inoparajanisa kumwa imwe no imweni.”*
7 Ngo kudaro, Mwari wakaita ndau yakakura woparajanisa kumwa yo mudenga no kumwa yo pasi. Izvo ndizvona zvakaitika.
8 Mwari wakadura ndau iyi kuti, Denga.* Kwakaita madeko no mangwanani, njiku yo cipiri yapera.
9 Ngo kudaro Mwari wakati: “Kumwa iri pasi po denga, ngaiungane divi rimwe kuti kuwanike ndau yakaoma.” Izvo ndizvona zvakaitika.
10 Mwari wakadanija ndau yakaoma kuti i Pasi, asi divi rakaungana kumwa wakaridanija kuti i Jombe. Ngo kudaro, Mwari wakavona kuti zvese zvainga zvakanaka.
11 Mwari wakati: “Pasi ngapamere sora. Ngapamerezve miti jinobara mbeu no miti jinobara mucero mukuzwirana no mufumbo wajo, ngaibare mucero no mbeu.” Izvo ndizvona zvakaitika.
12 Pasi pakatanga kumera sora, miti jinobara mbeu no miti jinobara mucero no mbeu mukuzwirana no mufumbo wajo. Mwari wakavona kuti zvainga zvakanaka.
13 Kwakaita madeko no mangwanani, njiku yo citatu yapera.
14 Ngo kudaro Mwari wakati: “Ngakuve no zvivheneko ku ndau yakakura yo kudenga, kuti zvikwanise kuparajanisa usiku no masikati. Izvona zvinozoshanda inga zvitatijo zvokuziva ndizvona mukuvo, njiku no makore.
15 Izvona zvinozoshanda inga zvivheneko zvo ndau yakakura yo kudenga kuti zvivheneke pasi pano.” Izvo ndizvona zvakaitika.
16 Mwari wakaita zvivheneko zviviri zvakakura. Cakakura maningi kuti civheneke no masikati. Cakakura padoko kuti civheneke no usiku. Iyena wakaitazve ndhondho.
17 Mwari wakazvidira ku ndau yakakura kudenga kuti zvivheneke pasi pano.
18 Izvona zvaidikana kuvheneka masikati no usiku no kuparajanisa ruvheneko no cidima.* Mwari wakavona kuti zvainga zvakanaka.
19 Kwakaita madeko no mangwanani, njiku yo cirongomuna yapera.
20 Tevere Mwari wakati: “Mukumwa ngamuzare ngo zvisikwa zvinorarama.* Pa nyezuru po nyika, pa ndau yakakura yo mudenga,* ngapawanike zvisikwa zvinomburuka.”
21 Mwari wakarura zvinyama zvikuru zvo mujombe no zvisikwa zvese zvinopona zvinominyana mukumwa no zvisikwa zvese zvino mapapiro,* zvinomburuka pa ndau yakakura yo mudenga, mukuzwirana no mufumbo wazvo. Mwari wakavona kuti zvainga zvakanaka.
22 Ngo kudaro Mwari wakazvikomborera eciti: “Barananyi muwande muzaje kumwa yo mujombe no zvisikwa zvinomburuka ngazvibarane zvizaje nyika.”
23 Kwakaita madeko no mangwanani, njiku yo cishanu yapera.
24 Ngo kudaro, Mwari wakati: “Pasi ngapawanike zvisikwa zvinorarama* mukuzwirana no mufumbo wazvo, zvinyama zvinofuiwa, zvinyama zvinogwezva, zvinyama zvo musora, mukuzwirana no mufumbo wazvo.” Izvo ndizvona zvakaitika.
25 Mwari wakaita zvinyama zvo musora, mukuzwirana no mufumbo wazvo, zvifuyo mukuzwirana no mufumbo wazvo no zvinyama zvese zvinogwezva, mukuzwirana no mufumbo wazvo. Mwari wakavona kuti zvainga zvakanaka.
26 Ngo kudaro, Mwari wakati: “Ngatiite mundhu ngo muezaniso wedu. Wakatojana na itusu. Iyena anozotonga hove jese jo mujombe. Zvisikwa zvese zvinomburuka ku denga, zvifuyo no zvinyama zvese zvinogwezwa pasi.”
27 Mwari wakasika mundhu ngo muezaniso wake. Iyena wakavasika mwanarume no mwanakaji.
28 Kusiyapo izvo, Mwari wakavakomborera, wovavhunja kudari: “Barananyi muwande, muzaje nyika no kuitonga, mutonge hove jo mujombe, zvinyama zvinomburuka kudenga no zvinyama zvese zvinogwezva pasi.”
29 Ngo kudaro, Mwari wakavavhunja kudari: “Ndinomupa muti jese jinobara mbeu, jiri pasi po nyika, muti jese jinobara mucero no mbeu jajo. Ijona jinozoita zvo kuha zvenyu.
30 Zvinyama zvese zvo musora, zvisikwa zvese zvinomburuka kumatenga no zvisikwa zvese zvinogwezva pasi, zvino upenyu, ndinozvipa sora ro pasi kuti zvihe.” Izvo ndizvona zvakaitika.
31 Pasure pazvo, Mwari wakavona kuti zvese zvaainga aita zvainga zvakanaka maningi. Kwakaita madeko no mangwanani, njiku yo citandhatu yapera.
Masoko o Pasi
^ Kana: “cirima.”
^ Kana: “ngo kudaro, mujimu wa Mwari waitenderera.”
^ Kana: “cirima.”
^ Kana: “cirima.”
^ Kana: “kumwa yo mudenga no kumwa yo pasi.”
^ Kana: “Gore.”
^ Kana: “cirima.”
^ Kana: “zvinopona.”
^ Kana: “gore.”
^ Kana: “mapapa.”
^ Kana: “zvinopona.”
