Genesisi 11:1-32
11 Pasi pese painga no ndimi imwe basi no mavereketero amwe.
2 Vandhu pavaifamba kwenda ku mavhazuva, vakawana muterero wo nyika yo Shinari votanga kugaremo.
3 Ivona vakavhunjana kudari: “Viyanyi! Ngatiite zvidhina kuti tizvipise.” Ngo kudaro, ivona vaishandisa zvidhina kuciripi mapuwe. Vaishandisazve thara* kuti vabatanije zvidhina pavainga vacivaka.
4 Ivona vakati: “Viyanyi! Ngatijiitire dhorobha no nyumba yakakura maningi inopsasa kumatenga. Ngatijiitire zina rino nduma. Tikadaro, tinozogara pamwepo, atizondhandhaniki pasi pese.”
5 Jehovha wakabzuka kuti avone dhorobha no nyumba huru yainga yatanga kuvakwa ngo vandhu.
6 Jehovha wakati: “Vandhu ava vari kuzwana. Ivona vari kuvereketa ndumi imwe basi. Vonanyi zvavari kuita! Zvese zvavari kuronga kuita zvinozobudirira, ngokuti vari kuvereketa ndumi imweyo.
7 Viyanyi! Ngatibzuke kuti tisiyanise ndumi yavo, kuti vatame kuzwana.”
8 Jehovha wakavaparajanisa pasi pese. Ngo kudaro, ivona vakasiya kuvaka dhorobha.
9 Ndizvona zvakaitisa kuti dhorobha iri ridanijwe kuti Bhabheri,* ngokuti Jehovha wakasiyanisa ndimi pasi pese. Ndiponazve Jehovha paakavaparajanisa pasi pese.
10 Zvakaitika mu upenyu hwa Semi nga izvi:
Semi wainga waano 100 ro makore paakabara Arifashadhi, pasure po makore maviri, ndambi* no yapera kuitika.
11 Pasure po kubara Arifashadhi, Semi wakavazve no makore anokwana kuita 500. Perapo wakabara vana vorume no vokaji.
12 Arifashadhi wakava no makore anokwana kuita 35, perapo wakabara Shera.
13 Pasure pokubara Shera, Arifashadhi wakavazve no makore anokwana kuita 403. Perapo wakabara vana vorume no vokaji.
14 Shera wakava no makore anokwana kuita 30, perapo wakabara Ebheri.
15 Pasure po kubara Ebheri, Shera wakavazve no makore anokwana kuita 403. Perapo wakabara vana vorume no vokaji.
16 Ebheri wakava no makore anokwana kuita 34, perapo wakabara Peregi.
17 Paakapera kubara Peregi, Ebheri wakavazve no makore anokwana kuita 430. Perapo wakabara vana vorume no vokaji.
18 Peregi wakava no makore anokwana kuita 30, perapo wakabara Reu.
19 Pasure po kubara Reu, Peregi wakavazve no makore anokwana kuita 209. Perapo wakabara vana vorume no vokaji.
20 Reu wakava no makore anokwana kuita 32, perapo wakabara Serugi.
21 Pasure po kubara Serugi, Reu wakavazve no makore anokwana kuita 207. Perapo wakabara vana vorume no vokaji.
22 Serugi wakava no makore anokwana kuita 30, perapo wakabara Nahori.
23 Pasure po kubara Nahori, Serugi wakavazve no makore anokwana kuita 200. Perapo wakabara vana vorume no vokaji.
24 Nahori wakava no makore anokwana kuita 29, perapo wakabara Tera.
25 Pasure po kubara Tera, Nahori wakavazve no makore anokwana kuita 119. Perapo wakabara vana vorume no vokaji.
26 Tera wakava no makore anokwana kuita 70, perapo wakabara Abhirama, Nahori na Harani.
27 Zvakaitika mu upenyu wa Tera nga izvi:
Tera wakabara Abhirama, Nahori na Harani. Harani wakabara Roti.
28 Tera paainga acapona, mwana wake Harani wakatamika mu nyika yaakabarihwa, mu Uri dhorobha ro Vakaradhiya.
29 Abhirama na Nahori vakarovora. Mukaji wa Abhirama waidanijwa kuti Sarai. Mukaji wa Nahori waidanijwa kuti Mirika. Mirika wainga mwana wa Harani. Harani vaingazve baba wa Isika.
30 Sarai wainga shenje,* wainga acina mwana.
31 Tera wakatora mwana wake Abhirama no muzukuru wake Roti mwana wa Harani, na Sarai nyamwana yake,* mukaji wa Abhirama. Vakavha vese pamwepo ku Uri dhorobha ro Vakaradhiya, kuti vaende mu nyika yo Khanani. Pakufamba ko nguva, vakaguma ku Harani, vogara kondhoyo.
32 Makore ese a Tera akava 205. Perapo Tera wakatamika mu Harani.
Masoko o Pasi
^ Kana: “katarau; ukapa.”
^ Zvinoreva kuti, “kutama kuzwana.”
^ Kana: “guwe.”
^ Kana: “ciumba; acikabari.”
^ Kana: “mukajimwana wake.”
