Genesisi 12:1-20
12 Jehovha wakavhunja Abhirama kuti: “Budai mu nyika yako no pakati po ukama hwako no pamuzi wa baba wako, uende ku nyika yandinozokutatija.
2 Ndinozoita kuti uve jinja guru, ndokukomborera, ndoita kuti zina rako rikure. Vandhu vese vanozokomborehwa ngo ndava yako.
3 Ndinozokomborera vaya vanokukomborera, ndozotuka vaya vanokutuka. Mbhuri jese jo pasi jinozokomborehwa kamare ngo ndava yako.”
4 Ngo kudaro, Abhirama wakapinda inga zvaakavhunjwa ndi Jehovha. Roti wakapindavo naye. Abhirama wainga no makore aikwana kuita 75 paakavha mu Harani.
5 Abhirama wakatora Sarai mukaji wake, Roti mwana wa nevanji wake, zviro zvovainga nazvo no vandhu vovakawana mu Harani, ivona vakaenda mu nyika yo Khanani. Povakaguma mu nyika yo Khanani,
6 Abhirama wakafamba mbhera mu dhorobha ro Shekemi, phedo no miti mukuru jo More. Pa mukuvo wondhowo, Vakhanani vaigara munyikemo.
7 Perapo Jehovha wakabudira Abhirama wonanga kuti: “Nyika iyi ndinozoipekeja mubarihwana wako.” Ngo kudaro, iyena wakavakirepo artari ya Jehovha wakamubudiraya.
8 Pa kufamba ko nguva, iyena wakathutha woenda ku ndau yo matundhu inowanika kumavhazuva ko Bheteri, wodirepo tende yake. Bheteri rainga ngo kumavirira, Ai ngo kumavhazuva. Iyena wakavakirepo artari ya Jehovha pondhopo, wotanga kudanija zina ra Jehovha.
9 Perapo Abhirama wakavhisa matende, woenda ku ndharaundha yo Negebhi, ecindothuthisa matende kuvha pa ndau imwe kuenda pa imweni.
10 Munyikemo makaita njara, Abhirama wakaenda kogara mu nyika yo Ejipita pa mukuvo wakati kuti, ngokuti njara yaikura maningi munyikemo.
11 Povainga voda kuguma mu nyika yo Ejipita, iyena wakavhunja Sarai mukaji wake kuti: “Ndapota ndizwei! Ndinozviziva kuti iwewe uri mwanakaji wakaseja* maningi.
12 Ngo kudaro, Vaejipita vakazokuvona, vanozonanga kuti: ‘Uwu ndiyena mukaji wake.’ Perapo vanozondiuraya, vokusiya uri penye.
13 Ndapota, nangai kuti uri hambzaji* yangu, kuti zvindifambire ushoni ngo ndava yako, nditame kuurawa.”
14 Abhirama paakandoguma Ejipita, Vaejipita vakavona kuti mukaji wake waiseja* maningi.
15 Vatongi va Faro vakamuvonavo, ivona vakatanga kumusimba pamberi pa Faro, ngo kudaro, iyena wakatohwa kuendeswa ku nyumba ya Faro.
16 Faro wakataja ushoni Abhirama ngo ndava ya Sarai. Abhirama wakawana mavhuta, n’gombe, mbongoyo jorume no jokaji, vashandi vorume no vokaji no makamera.
17 Perapo Jehovha wakatambuja maningi Faro no vandhu vo pamuzi pake ngo ndava ya Sarai mukaji wa Abhirama.
18 Ngo kudaro, Faro wakadanija Abhirama womuvhunja kuti: “Zvicinyi zvowandiitirari? Ngenyi auzivi kundivhunja kuti wainga mukaji wako?
19 Ngenyi wakananga kuti, ‘Iyena i hambzaji* yangu?’ Ngo kudaro, ndainga ndoda kumutora kuti ave mukaji wangu. Waro nga uwu mukaji wako. Mutorei upinde!”
20 Ngo kudaro, Faro wakapa mutemo vandhu vake kuti vamupindise, ivona vakamupindisa no mukaji wake no zviro zvese zvaainga nazvo.
