Genesisi 13:1-18
13 Abhirama wakavha Ejipita woenda Negebhi. Iyena, mukaji wake no zviro zvese zvaainga nazvo kubatanijavo na Roti.
2 Abhirama waikhupuka maningi. Ngokuti wainga no mushambi, sirivha no goridhi.
3 Iyena waindothuthisa tende yake kuvha pa ndau imwe kwenda pa ndau imweni paaifamba ecivha Negebhi kwenda Bheteri, mbhera paakaguma pa ndau yaimbonga no tende yake, pakati po Bheteri no Ai.
4 Apa ndipona paakavakaya artari. Pondhopo Abhirama wakadanija zina ra Jehovha.
5 Roti waifambaya na Abhirama, wakavavo no mavhuta, n’gombe no matende.
6 Ngo kudaro, nyika yavaingaro yainga icikakwanizve kuti vagare vese pa ndau yondhoyo. Zviro zvavo zvainga zvawanda maningi. Zvoita kuti vatame kugarazve vese.
7 Izvi zvakaitisa kuti vahavisi vo zvifuyo zva Abhirama no vahavisi zvo zvifuyo zva Roti vavereketesane. (Pa mukuvo uwo, Vakhanani no Vaperezi vaigara mu nyikemo.)
8 Ngo kudaro, Abhirama wakavhunja Roti kuti: “Ndapota, apadikani kuva no kuvereketesana pakati pangu na iwewe, nee pakati po vahavisi vangu no vako, ngokuti tiri hama no hama.
9 Nyika yese airipi pamberi pako? Ndapota parajanai na inini. Kudari ukaenda ku mukono boshwe, inini ndinozoenda ku mukono muho. Kudari ukaenda ku mukono muho inini ndinozoenda ku mukono boshwe.”
10 Roti wakamusa majiso wovona kuti dhistrito yese yo Jordhani mbhera Zowari, yainga yakazara ngo mutota.* Ndau iyi yaiita inga munda* wa Jehovha no nyika yo Ejipita, (Jehovha acito aphwanya-phwanya Sodhoma no Gomora.)
11 Perapo Roti wakakheta dhistritu yese yo Jordhani. Iyena wakathuthisa tende jake woenda kumavhazuva. Ngo kudaro, ivona vakaparajana.
12 Abhirama wakagara mu nyika yo Khanani. Asi Roti wakagara pakati po madhorobha o dhistritu iri. Pakupejisira, wakadira tende yake phedo no Sodhoma.
13 Asi vandhu vo Sodhoma vainga vakashata. Ivona vaishaishira maningi Jehovha.
14 Jehovha wakavhunja Abhirama paakapera kuparajana na Roti kuti: “Musai majiso ako pa ndau yauri waro, usote kanjikazi, kakusi, kumavhazuva no kumavirira.
15 Ngokuti nyika yese yauri kuvonaro ndinozokupekeja no mubarihwana wako kuti ive ndhaka yako mbhera na rini.
16 Ndinozoita kuti mubarihwana wako, uezane no bukuta ro nyika. Kudari aripo anokwanisa kuverenga bukuta ro nyika, mubarihwana wako unozoverengekavo.
17 Mukai ufambe mu nyika iyi, kureba kwayo no upambhi hwayo. Ngokuti ndinozokupa nyikeyo.”
18 Abhirama wakaenderera mberi ecigara mu matende. Pa kufamba ko nguva wakaenda kogara pakati po muti mukuru jo Mamure jiri mu Hebheroni. Iyena wakavakira Jehovha artari pondhopo.
