Genesisi 14:1-24
14 Mu njiku ja Amiraferi mambo wo Shinari, Ariyoki mambo wo Erazari, Khedhoraomeri mambo wo Erami na Tidhari mambo wo Goimi,
2 manjimambo aya akaita hondo na Bhira mambo wo Sodhoma, Bhirisha mambo wo Gomora, Shinabhi mambo wo Adhima, Shemebheri mambo wo Zebhoimi na mambo wo Bhera, kana kuti Zowari.
3 Majimambo ese aya akabatana mu Muterero wo Sidhimi, kana kuti Jombe ro Munyu.*
4 Pa makore 12, majimambo aya akabatira Khedhoraomeri, asi akamupandukira pa gore ro ci 13.
5 Ngo kudaro, pa gore ro ci 14, Khedhoraomeri no majimambo aibatana naye vakaviya, vonyisa Varefaimi mu Ashiteroti-kanaimi, Vazuzimi mu Kami, Vaemimi mu Shavhe-kiriyataimi,
6 no Vahori mu ndharaundha yavo yo matundhu o Seiri mbhera Eri-parani, iri mu zvipare.
7 Ivona vakahwirira sure voguma Eni-mishapati, kana kuti Kadheshi, vonyisa ndharaundha yese yo Vaamareki no yo Vaamori vanogara mu Hazazoni-tamari.
8 Pa mukuvo uwu, mambo wo Sodhoma wakaenda koita hondo, wakaendavo na mambo wo Gomora, mambo wo Adhima, mambo wo Zebhoimi na mambo wo Bhera, kana kuti Zowari. Ivona vakarongana kuti vahwisane navo mu Muterero wo Sidhimi,
9 vakahwisana na Khedhoraomeri mambo wo Erami, Tidhari mambo wo Goimi, Amiraferi mambo wo Shinari na Ariyoki mambo wo Erazari. Majimambo marongomuna ecihwisana no majimambo mashanu.
10 Muterero wo Sidhimi waizara ngo mwimbo jo namo,* majimambo o Sodhoma no Gomora akada kutiza, owiremo. Vaya vakasara vakatizira ku ndharaundha yo matundhu.
11 Perapo vanyisi vakatora upfumi hwese hwo Sodhoma no Gomora no zvokuha zvaingemo, vopinda.
12 Ivona vakatorazve Roti, mwana wo hama ya Abhirama waigaraya mu Sodhoma no upfumi wake, vopinda.
13 Pasure pazvo, mwanarume umweni wakapona wakaviya, wovhunja Abhirama Muhebheru. Iyena wainga pakati po miti mukuru ja Mamure, Muamori, hama ya Eshikori na Aneri. Vandhu ava vaibatana na Abhirama.
14 Ngo kudaro, Abhirama wakazwa kuti mwana wo hama yake watohwa wopinda koitwa muranda. Iyena wakaunganija vandhu vake vakajijiswa, vashandiri vanokwana kuita 318 vakabahwa pa nyumba yake, woteverera vavengivo mbhera Dhani.
15 Nohwaausiku, iyena wakakasha zvikwata zvake zvo masoca, iyena no vashandiri vake vakahwisa vavengi ava, wovanyisa. Wakavateverera mbhera Hobha, kunowanika kanjikazi ko Dhamasko.
16 Iyena wakatora upfumi hwese, wotorazve Roti mwana wo hama yake, upfumi hwake, vanakaji no vandhu vamweni.
17 Abhirama paakaviya kuvha konyisa mambo Khedhoraomeri no majimambo ainga naye, mambo wo Sodhoma wakaenda kosongana na Abhirama pa Muterero wo Shavhe, kana kuti Muterero wa Mambo.
18 Merekizedheki mambo wo Saremi wakaviisa zvokuha no vhinyu. Iyena wainga mupiri wa Mwari Mukuru-Kuru.
19 Perapo wakamukomborera eciti:
“Ngaakomborehwe Abhirama ndi Mwari Mukuru-Kuru,Wakaita kudenga no nyika;
20 Ngaasimbwe Mwari Mukuru-Kuru,Wakupari vavengi vako!”
Abhirama wakamupa cogumi co zvese.
21 Pasure pazvo, mambo wo Sodhoma wakavhunja Abhirama kuti: “Ndipei vandhuvo. Asi torai upfumi hwese huite hwako.”
22 Asi Abhirama wakavhunja mambo wo Sodhoma kuti: “Ndinomusa nyara yangu kuti ndiite mbhiko kuna Jehovha Mwari Mukuru-Kuru, Wakaita kudenga no nyika,
23 kuti andizotori ciro ciri cese cako, kuvhira ku ciuruji mbhera ku cipote co magwada* ako, kuti utame kuzonanga kuti: ‘Ndakakhupusa Abhirama.’
24 Andizotori ciri cese kuciripi zviro zvahiwari ngo majaha aya. Ngo divi ro vandhu vaendari na inini, Aneri, Eshikori na Mamure, ngavatorevo zviro zvavo.”
