Genesisi 15:1-21
15 Pasure pa izvi, Jehovha wakabhuya na Abhirama mu civoniso womuvhunja kudari: “Ucathya Abhirama. Inini ndinozokujivirira.* Mupfupo wako unozova mukuru maningi.”
2 Abhirama wakadavira kuti: “Jehovha Mambo Mukuru-kuru, zvicinyi zvamunozondipekeja zvecivoneka kuti inini andina mwana? Mugari wo utaka hwo nyumba yangu, ndi Eriyezeri mwanarume wo Dhamasko.”
3 Abhirama wakaengejera eciti: “Amuzivi kundipejeka mwana. Mushandi wangu, ndiyena anozondigara utaka.”
4 Asi Jehovha wakamudavira kuti: “Mushandi uwu aazokugari utaka. Mwana wako ndiyena anozokugara utaka.”
5 Iyena wakatora Abhirama woenda naye kunja womuvhunja kuti: “Ndapota, sotai kumatenga, uverenge ndhondho kudari wecijikwanisa.” Perapo wakamuvhunjazve kuti: “Vana vako vanozowandavo maningi.”
6 Abhirama wakatenda Jehovha, wonangwa kuti mururami.
7 Iyena wakaengejera eciti: “Ndini Jehovha wakakuvhisa ku nyika yo Uri yo Vakaradhiya kuti ndikupejeke ndau iyi kuti iite yako.”
8 Ngo kudaro, Abhirama wakati: “Jehovha Mambo Mukuru-kuru, ndinozvizivisa kudini kuti ndau iyi inozova yangu?”
9 Iyena wakadavira kuti: “Nditorerei civhuta cokaji cino makore matatu, cimbuji cokaji cino makore matatu, civhuta corume cino makore matatu, cigovora no cinjiva.”
10 Abhirama wakatora zvinyama zvese izvi wozviceka ngo pakati. Wotora dimbu rimwe wodira divi rimwe, dimbu rimweni ngo divi rimweni. Asi cigovora no cinjiva aazivi kuzviceka-ceka.
11 Ngo kudaro, shiri jinoha nyama, jakatanga kubzuka jeciha zvinyama zvakafa. Asi Abhirama waindojirinda.
12 Zuva parainga roovira, Abhirama wakavata hope huru. Ngo kudaro, wakagumihwa ngo cidima* cikuru maningi caithyisa.
13 Perapo iyena wakati kuna Abhirama: “Zivai kuti mubarihwana wako unozova vandhu vo nyikanja mu nyika iciripi yavo. Vandhu vo kondhoyo vanozovaita varanda no kuvatambuja ko makore anokwana kuita 400.
14 Asi inini ndinozotonga jinja ro vandhu vavanozoshandiraro. Pasure pazvo, ivona vanozopinda no upfumi hwakawanda.
15 Iwewe unozofa uno runyararo, waamusharuka, wovigwa.
16 Asi ivona vanozoviya kuno pa mubarihwana wo cirongomuna. Ngokuti kuposa ko Vaamori, akuto kwashatisisa.”
17 Zuva no ravira kosvipisisa, pakabuda coto cainga no usi no mwenje* waibwaka. Icona cakapinda ngo pakati po matimbu o zvinyama.
18 Pa njiku yondhoyo, Jehovha wakaita citenderano na Abhirama, wonanga kudari: “Ndinozopa mubarihwana wako nyika iyi. Kuvhira ku murambo wo Ejipita mbhera ku murambo mukuru wo Eufrate.
19 Nyika yandinozovapa inyika yo Vakeni, yo Vakenizi, yo Vakadhimoni,
20 Vahiti, Vaperezi, Varefaimi,
21 Vaamori, Vakhanani, Vagirigashi no Vajebhusi.”
Masoko o Pasi
^ Gama ngo Gama: “inini ndiri muvhiko wako.”
^ Kana: “cirima.”
^ Kana: “zenje; masasira.”
