Genesisi 16:1-16
-
Agari na Ishimaeri (1-16)
16 Sarai mukaji wa Abhirama aacainga no mwana. Asi wainga no mushandiri wokaji wo Ejipita waidanijwa kuti Agari.
2 Perapo Sarai wakati kuna Abhirama: “Ndapota ndizwenyi! Jehovha wakaita kuti nditame kuva no vana. Ngo kudaro, vatananyi no mushandiri wangu, kangaije ndingavavo no mwana ngo pamusoro pake.” Abhirama wakazwira Sarai.
3 Abhirama naagara gumi ro makore mu nyika yo Khanani, Sarai mukaji wake, wakamupekeja Agari, mushandiri wake wo ku Ejipita, kuti ave mukaji wake.
4 Ngo kudaro, iyena wakavatana na Agari woita mimba. Paakaziva kuti waano mimba, wakatanga kushora Sarai.
5 Sarai wakavhunja Abhirama kuti: “Kutambujika kwandiri kuitari i ndava yenyu. Inini ndini ndakamupa mushandiri wangu, asi iyena paakaziva kuti waano mimba, wakatanga kundishora. Jehovha ngaatonge kuti ndiyani ano razau, ndini kana kuti ndimwi.”
6 Ngo kudaro, Abhirama wakavhunja Sarai kuti: “Izwai! Mushandiri wako ari munyara jako. Itai zvaunoda kwaari.” Perapo Sarai wakashupha Agari, iyena wotiza.
7 Pakufamba ko nguva, ngirozi ya Jehovha yakamuvona ari pandau inobuda kumwa mu zvipare. Ndau iyi, iri mugwanja ro kwenda Shuri.
8 Iyona yakamuvhunjisa kuti: “Agari mushandiri wa Sarai, uri kuvha kwapi? Uri kwenda kwapi?” Iyena wakaidavira kuti: “Ndiri kutiza va Sarai.”
9 Ngirozi ya Jehovha yakamuvhunja kuti: “Hwirirai ka Sarai, ujidodokese kwaari.”
10 Perapo ngirozi ya Jehovha yakati: “Ndinozowanja maningi mubarihwana wako, zvokuti apana anozokwanisa kuuverenga.”
11 Ngirozi ya Jehovha yakaengejera yeciti: “Wari iwewe waano mimba. Unozobara mwana. Unodikana kumudura zina rokuti, Ishimaeri,* ngokuti Jehovha wazwa kutambujika kwako.
12 Iyena anozoita inga mbongoyo* yo musora ku vandhu. Anozohwisana no vandhu vese. Vandhu vese vanozohwisana naye. Iyena anozogara divi rake raega. Hama jake* jogara ngo divi rimweni.”
13 Perapo Agari wakadanija zina ra Jehovha waaibhuyaya nae, eciti: “Imwimwi muri Mwari anovona,” ngokuti iyena wakati: “Ndini kamare ndiri kukwanisari kuvona Mwari iyena acindivona here?”
14 Ngo zvakaitisari kuti mwimbo* uwu udanijwe kuti Bheeri-rahai-roi.* (Mwimbo* uwu unowanika pakati po Kadheshi no Bheredhi.)
15 Ngo kudaro, Agari wakabarira Abhirama mwana wo rume. Abhirama wakadura mwana wake waakabarihwa ndi Agari kuti Ishimaeri.
16 Abhirama wainga no 86 o makore okubahwa Agari paakamubarira Ishimaeri.
Masoko o Pasi
^ Rinoreva kuti, “Mwari Anozwa.”
^ Vamweni vanorangarira kuti pari kunangihwa dhuva. Kangaije zvinoda kunangira mundhu anoita zvake zvaega, acikazwani no vamweni.
^ Kangaije: “iyena aazozwani no hama jake.”
^ Kana: “sime.”
^ Zvinoreva kuti “Mwimbo wa Wiya Anopona Ari Kundivona.”
^ Kana: “sime.”
