Genesisi 17:1-27
17 Abhirama paainga no makore anokwana kuita 99, Jehovha wakamugumira womuvhunja kudari: “Ndini Mwari wo Masimba Ese. Fambai pamberi pangu. Uve mundhu acina ndava.
2 Ndinozoita citenderano na iwewe. Perapo ndinozokupa vana vakawanda maningi.”
3 Ngo kudaro, Abhirama wakagwadama, wosikimara.* Perapo Mwari wakaenderera mberi ecinanga kudari:
4 “Vonai, citenderano cangu inini na iwewe nga ici: Iwewe unozova baba wo majinja mazinji.
5 Zina rako aricazovizve Abhirama* iwewe unozodanijwa kuti Abhirahama.* Ngokuti inini ndinozokuita baba wo majinja mazinji.
6 Inini ndinozokupekeja vana vakawanda maningi kuti uve baba wo majinja. Majimambo anozovha kwauri.
7 “Ndinozokwanirisa citenderano candaita na iwewe no vana vako, mbhera ku mubarihwana yavo, inga citenderano cicikaperi kuti ndive Mwari kwauri no kumubarihwana wako.
8 Inini ndinozopekeja iwewe no vana vako nyika iyi yauri kugarari inga murendo, nyika yese yo Khanani, kuti ive utaka hucikaperi. Inini ndinozova Mwari wavo.”
9 Mwari wakaenderera mberi ecivhunja Abhirahama kudari: “Iwewe unodikana kukwanirisa citenderano cangu. Iwewe no vana vako mbhera ku mubarihwana yavo.
10 Citenderano candinoita na iwewe pamwe no vana vako, camunodikana kukwanirisa mwese, nga ici: Mwanarume wese anodikana kusokwa.*
11 Munodikana kuceka ganda* ro kumbeji ko hwanarume hwenyu. Zvondhozvo zvinozovonesa kuti imwimwi makaita cintenderano na inini.
12 Mwana worume akabahwa woita njiku sere, kuvhira ku mubarihwana ngo mubarihwana; mwana worume wese wakabarihwa pamuzi pako, no mwana wakabarihwa ku nyika jimweni asi woita ngo kutengwa, iyena anodikana kusokwa.*
13 Mwanarume wese wakabarihwa pamuzi pako no mwanarume wese wakaita ngo kutengwa ngo mare yako, anodikana kusokwa.* Citenderano cangu cakatahwa mu nyama yenyu, cinozova citenderano cicikaperi.
14 Kudari mwanarume acizivi kusokwa* akatama kusokwa,* iyena anodikana kuurawa pakati penyu. Ngokuti iyena waphwanya citenderano cangu.”
15 Perapo Mwari wakaenderera mberi ecivhunja Abhirahama kudari: “Mukaji wako Sarai,* auvhiri kumudanijazve kuti Sarai. Ngokuti zina rake wari, raakuzwi Sara.*
16 Inini ndinozomukomborera. Ndinozoita kuti akubarire mwana. Inini ndinozomukomborera, woita kuti majinja ese no majimambo o vandhu, abahwe ndiyena.”
17 Ngo kudaro, Abhirahama wakagwadama wosikimara,* wotanga kuseka ecinanga kudari ngo mumwoyo make: “Mwanarume ano 100 ro makore angabarazve? Kana kuti Sara ano 90 o makore zvingakwanisika kuti abarezve?”
18 Ngo kudaro, Abhirahama wakavhunja Mwari wocokwadi kuti: “Ndapota! Komboreranyivo Ishimaeri!”
19 Ngo kudaro, Mwari wakananga kudari: “Mukaji wako Sara anozobara mwana. Iwewe unozomudura zina ro kuti Izaki.* Inini ndinozoita citenderano na iyena; citenderano cicikaperi no mubarihwana wake.
20 Zvawanangari no ndava ya Ishimaeri, ndazvizwa. Vonai! Inini ndinozomukomborera. Iyena anozobara vana vakawanda maningi. Anozobara vana vanokwana kuita 12 vanozova madhodha. Ndinozomuita kuti ave jinja guru.
21 Asi inini ndinozoita citenderano na Izaki, mwana waunozobarihwa ndi Sara pa mukuvo uno wo gore rinozari.”
22 Mwari paakapera kubhuya na Abhirahama wakabata gwanja wopinda.
23 Perapo Abhirahama wakatora Ishimaeri mwana wake, no vanarume vese vakabahwa pa muzi pake, no vese vaakatenga ngo mare vainga pamuzi pa Abhirahama, wovaceka ganda ro kumbeji ko hwanarume hwavo pa njiku yondhoyo kamare inga zvaakavhunjwa ndi Mwari.
24 Abhirahama wainga ano 99 o makore o kubahwa paakasokwa.*
25 Mwana wake Ishimaeri, wainga ano 13 paakasokwa.*
26 Abhirahama no mwana wake Ishimaeri, vakasokwa* mu njiku yondhoyo kamare.
27 Vanarume vese vakabahwa pamuzi pake no vanarume vese vakatengwa ngo mare, vakasokwa* pamwepo na iyena.
Masoko o Pasi
^ Kana: “wokhodomara.”
^ Zina iri rinoreva kuti “Baba Vanokhwijirijwa.”
^ Zina iri rinoreva kuti “Baba wo Vandhu Vazinji.”
^ Kana: “kucekwa suna.”
^ Kana: “dovo.”
^ Kana: “kucekwa suna.”
^ Kana: “kucekwa suna.”
^ Kana: “kucekwa suna.”
^ Kana: “kucekwa suna.”
^ Zina iri kangaije ringareva kuti “Kunesana.”
^ Zina iri rinoreva kuti “Mwana Wokaji wa Mambo.”
^ Kana: “wokhodomara.”
^ Zina iri rinoreva kuti “Kuseka.”
^ Kana: “paakacekwa suna.”
^ Kana: “paakacekwa suna.”
^ Kana: “vakacekwa suna.”
^ Kana: “vakacekwa suna.”
