Genesisi 18:1-33
18 Jehovha wakabudira Abhirahama ngo pamamiti makuru o Mamure. Abhirahama waigara ngo pamusuvo wo tende. Izvi zvakaitika comasikati kamare.
2 Iyena wakaringisa, wovona vanarume vatatu vakaima ngo ndhambo. Paakavavona, wakavha pamusuvo wo tende ecigogoma kuenda kosongana navo, wogwadama pasi.
3 Perapo wakati: “Jehovha, kudari nomandiitiravo unyasha, ndapota mucapinda mucizivi kuima pa mushandiri wenyu.
4 Ndapota, nditenderenyi ndimuviisire zvikumwa padoko, musambe makumbo enyu;* perapo mugare pasi po miti uwu.
5 Zvecivoneka kuti maguma pa mushandiri wenyu, nditenderenyi kuti ndimuviisire zvokuha padoko kuti muwane simba. Perapo mungapinda henyu.” Ivona vakadavira kuti: “Zvakanaka. Itai zvowanangaro.”
6 Ngo kudaro, Abhirahama wakagogoma kuenda mu tende mainga na Sara, womuvhunja kuti: “Torai upfu hwakaceta hunokwana kuita kiru* gumi na mbiri kasikai, uhunasirire, ubike zvokuha.”
7 Tevere Abhirahama wakagogoma kuenda ku mushambi, wosana cin’gombe cakanuna, cino nyama yaushoni. Wakacipekeja mubeseri wake perapo wocinasirira ngo kukasika.
8 Iyena wakatora mantega, mukaka* no cimwana co n’gombe* caanasiriraya, wovaperekerera kuti vahe. Perapo wakagara navo pavaihiraro, pasi po miti wiya.
9 Ivona vakamuvhunjisa kuti: “Ari kwapi Sara mukaji wako?” Iyena wakadavira kuti: “Ari mu tende.”
10 Ngo kudaro, umwe wavo wakaenderera mberi eciti: “Pa nguva iyi yo gore rinozari, inini kamare ndinozoviyazve, Sara anozova no mwana.” Sara waizvizwa pamusuvo wo tende, yaiwanika sure ko mwanarumewo.
11 Abhirahama na Sara vainga vaamadhodha, vaano makore akawanda. Sara wainga waguma kubara.*
12 Sara wakatanga kuseka ega eciti: “Inini ndaadhodha, mambo wangu waadhodhavo. Inini ndingazowanadi mudakaro wakadaro?”
13 Perapo Jehovha wakavhunja Abhirahama kudari: “Ngenyi Sara waseka eciti: ‘Ndizvonadi kuti ndinobara mwana ndaadhodha rakadari?’
14 Kuno ciro cicikaitiki kuna Jehovha? Pa nguva iyi yo gore rinozari ndinozoviyazve, Sara anozova no mwana.”
15 Asi ngokuti Sara waithya, wakakanija eciti: “Inini andizivi kuseka!” Iyena wakati: “Hina! Iwewe waseka.”
16 Vanarume ava povakamuka kuti vapinde, vakaringa Sodhoma, Abhirahama wakavaperekeja.
17 Jehovha wakati: “Ndinozoenderera mberi ndecifisira Abhirahama zvondiri kuendari koita here?
18 Ngokuti Abhirahama anozova jinja guru, rino simba, majinja ese o pasi anozokomborehwa ngo ndava yake.
19 Ngokuti ndakamusana* kuti avhunje vana vake no vopamuzi pake zvandinoda inini Jehovha ngo kuita zvakanaka no zvakarurama, kuti inini Jehovha ndiite zvandakagondesa Abhirahama.”
20 Perapo Jehovha wakati: “Kukhara* ko vandhu ngo pamusoro po Sodhoma no Gomora kwakura maningi, zvishaishi zvavo zvakuravo.
21 Ndinozoderuka* kuti ndivone dangani vari kuita mukuzwirana no kucema* kwandiri kuzwari. Kudari vaciripi kuzviita, ndinozozviziva.”
22 Perapo vandhu vaya vakapinda voenda Sodhoma, asi Jehovha wakasara na Abhirahama.
23 Abhirahama wakakhwedera, wonanga kuti: “Munozopejadi kamare vandhu vakarurama pondhopo no vandhu vakashata?
24 Ngatiti mudhorobhemo muno 50 o vandhu vakarurama. Munozovauraya, motama kuregerera ndauyo ngo ndava yo 50 o vandhu varimo waro?
25 Andingarangariri kuti mungaita ngo njira iyi; kuuraya vandhu vakarurama pondhopo no vandhu vakashata zvoita kuti zvinoitihwa mundhu wakanaka zvoita zvondhozvo zvinoitihwavo mundhu wakashata! Imwimwi amuzoiti kudaro. Mutongi wo nyika yese angakonehwa kuita zvakarurama?”
26 Jehovha wakadavira kuti: “Kudari ndikawana 50 o vandhu vakarurama mudhorobha ro Sodhoma, ndinozoregerera ndauyo yese ngo ndava yavo.”
27 Asi Abhirahama wakanangazve kudari: “Ndapota, ndiregererenyi ngo kuda kubhuya na imwimwi Jehovha, kuveni inini ndiri bukuta no marota.
28 Ngatiti mudhorobhemo muno varurami vanokwana kuita 45. Maizophwanya-phwanya dhorobhero ngo ndava yo vandhu vashanu vanokarairaro?” Iyena wakadavira kuti: “Andizoriphwanyi kudari ndikawana varurami vanokwana kuita 45.”
29 Asi iyena wakabhuyazve naye eciti: “Ngatiti 40 o vandhu vakarurama.” Iyena wakadavira kuti: “Andizoriphwanyi ngo ndava yo 40 varimo waro.”
30 Abhirahama wakaenderera mberi eciti: “Jehovha, ndapota mucanyangajwa, asi ndiregerenyi ndienderere mberi ndicivereketa: Ngatiti mawanika 30 basi o varurami.” Iyena wakadavira kuti: “Andizoriphwanyi ngo ndava yo 30 varimo waro.”
31 Asi wakaenderera mberi eciti: “Ndapota, munondiregerera ngo kuda kubhuya na imwimwi Jehovha: Ngatiti muna 20 basi o varurami.” Iyena wakadavira kuti: “Andizoriphwanyi ngo ndava yo 20 varimo waro.”
32 Pakupejisira wakati: “Jehovha, ndapota mucanyangajwa, nditenderenyi kuti ndivereketezve kamwe basi: Ngatiti mawanika basi 10 ro varurami.” Iyena wakadavira kuti: “Andizoriphwanyi ngo ndava yo 10 varimo waro.”
33 Jehovha paakapera kubhuya na Abhirahama, wakapinda, Abhirahama wakahwirira kanyi kwake.
Masoko o Pasi
^ Kana: “muphoze.”
^ Kana: “mupimo mutatu jinodanijwa kuti seya.” Seya imwe yaizaja mujiyo unonghwina ritru 7,33. Vonanyi Masoko Okuengejera B14.
^ Kana: “mahe.”
^ Thoyo; buru.
^ Gama ngo Gama: “Sara wainga waguma kuita mukuzwirana no zvinoitwa ngo vanakaji.” Izvi zvinoreva kuti wainga waguma kutevera mweji.
^ Gama ngo Gama: “ndakamuziva.”
^ Kana: “kun’gun’guta.”
^ Kana: “ndinozobzuka.”
^ Kana: “kurira.”
