Genesisi 19:1-38
19 Ngirozi mbiri jiya jakaguma Sodhoma zuva no ravira. Roti wainga akagara pa musuvo wo Sodhoma. Paakajivona, wakaenda kosongana najo. Naaguma kondhoyo, wakagwadama kumeso kwake kopsasa pasi.
2 Iyena wakajivhunja kudari: “Ndapota majimambo angu, viyanyi kanyi ko muranda wenyu, mukaguma munozosamba makumbo enyu perapo movata. Munozofumira mecipinda.” Ijona jakadavira kuti: “Atidi, tinoenda kovata pa gwanja.”
3 Iyena wakajivangirija mbhera woenda najo kanyi kwake. Wakanasirira mabuso, wobika pau jicina mbijo, ijona jakaha.
4 Vacito vapinda kovata, vanarume vo Sodhoma, kuvhira ku vadoko mbhera ku madhodha, vakatendeneja nyumba iyi vobatana vese veciita bope.
5 Ivona vaindodanija Roti vecinanga kudari: “Vari kwapi vandhu vanghwinaya mumba mako madeko ano? Vaviisei kunja kuti tivatane navo.”
6 Ngo kudaro, Roti wakabuda kunja wofunga musuvo kuti abhuye navo.
7 Iyena wakati: “Ndapota hama jangu, mucaita zvakashata.
8 Ndapota, ndino vana vaviri vokaji. Ivona vaciri mbhandhwe.* Ndapota ndisiyenyi ndivaviise kunja kuno, kuti muvaite zvamunodaro. Asi mucaita ciri cese ku vanarume vari mukati umu. Ngokuti ivona vaviya kuzozorora mumba mangu basi.”
9 Ngo kudaro, ivona vakati: “Reyai apa!” Ivona vakaengejera veciti: “Iwewe uri munyikanja. Wakaviya kuzogara kuno. Wari iwewe woda kutitonga? Waro tinoda kukuitira zvakashata maningi kupinda zvataizoitira ivona.” Vese vakabatana votendeneja Roti kuti vaphwanye musuvo.
10 Ngo kudaro, vanarume vaingaya mukati, vakabudisa mukono. Ivona vakabata Roti vomukwevera mukati, perapo vofunga musuvo.
11 Ivona vakaitisa kuti vandhu vaingaya pa musuvo po nyumba vave mapofu. Kuvhira ku vana vadoko mbhera kumadhodha, zvoita kuti varembe ngo kumbharambhasira* vecipsaka musuvo.
12 Vanarume vainga na Roti vakamuvhunja kudari: “Uno ukama huri hwese muno? Torai vakwambo vako, vana vako vorume no vokaji, no ukama hwako hwese uri mudhorobha, kuti mubude mu ndau iyi!
13 Itusu tinozopwanya ndau iyi, ngokuti kukhara ko vandhu ngo pamusoro po vandhu ava kwakura maningi pamberi pa Jehovha, zvoita kuti Jehovha atitume kuti tiphwanye dhorobha iri.”
14 Ngo kudaro, Roti wakabuda woenda kovhunja vakwambo vake vaida kuzorovora vana vake, ecindovavhunja kudari: “Kasikanyi! Budanyi mu ndau iyi, ngokuti Jehovha ari kuda kuphwanya-phwanya dhorobha iri.” Asi vakwambo vake vaivona inga kuti iyena waitamba.
15 Zuva porakatanga kubuda, ngirozi jakavangirija Roti jeciti: “Kasikai, torai mukaji wako no vana vako vaviri vokaji vari wari pano, kuti imwimwi mutame kuuraiwa ngo pamusoro po ushaishi hwo dhorobha iri.”
16 Zvecivoneka kuti iyena wainonoka, vanarume vaya vakabata mukono wake, mukono wo mukaji wake no jo vana vake vaviri vokaji, vovabudisa no kuvadira kunja ko dhorobha, ngokuti Jehovha wainga avaitira unyasha.
17 Povainga vabudiswa kunja ko dhorobha, ngirozi imwe yakamuvhunja kuti: “Tizai kuti upone! Ucasota sure. Ucaimazve pa divi riri rese ro dhistritu, tizirai ku ndharaundha yo matundhu kuti utame kuurawa.”
18 Roti wakajivhunja kudari: “Inoo akuiti ndapota Jehovha!
19 Ndapota, maitira unyasha mushandiri wenyu. Mandiitira usizi hwakakura, mondisiya ndiri penye. Asi andikwanisi kutizira mundharaundha yo matundhu, ngokuti ndiri kuthya kuwihwa ngo dambujiko iri ndofa.
20 Inoo kuno cidhorobha cidoko, icona ciri phedo, ndapota, nditenderenyi kuti nditizireyo, icona cidhorobha cidoko basi, ndinozoponereyo.”
21 Iyona yakati: “Zvakanaka, ndinozokuitirazve unyasha wo kutama kuphwanya-phwanya dhorobha rowanangaro.
22 Kasikai! Tizirai kondhoyo, ngokuti andikwanisi kuita ciri cese ucito wagumeyo.” Ndizvona zvakaitisa kuti adanije ndauyo kuti Zowari.*
23 Zuva rainga rabuda Roti paakaguma Zowari.
24 Ngo kudaro, Jehovha wakanisa muriro no enshofre mu Sodhoma no Gomora. Zvaivha kudenga kuna Jehovha.
25 Ngo kudaro, wakapisa ngo muriro madhorobha aya, dhistritu yese, no vese vaigara mu madhorobha aya no zvese zvaimera mondhomo.
26 Asi mukaji wa Roti wainga ngo sure kwake, wakasota sure, iyena wakapinduka* wova cituka co munyu.
27 Abhirahama wakafumira woenda pa ndau yaaingaya akaima na Jehovha.
28 Abhirahama paakasota Sodhoma no Gomora no dhistritu yese yo Jordhani, wakavona zviro zvinothyisa. Iyena wakavona usi hwakasvipa, hwaidari inga usi hwo forno.
29 Mwari wakaphwanya madhorobha o dhistritu yo kwaigara Roti. Asi iyena wakaceukija zvakakumbira Abhirahama, zvomuita kuti abudise Roti mu dhorobha raaizoda kuphwanya.
30 Pakufamba ko nguva, Roti wakavha Zowari no vana vake vokaji, woenda kogara ku ndharaundha yo matundhu, ngokuti iyena waithya kugara Zowari. Ngo kudaro, iyena wakaenda kogara mubako no vana vake vaviri vokaji.
31 Dangwe rakavhunja womudoko kudari: “Baba vaadhodha. Nyika iyi aina vanarume kuti tivatane navo inga zvinoitwa pasi pese.
32 Viyai tipekeje vhinyu baba wedu kuti vamwe. Perapo tovatana navo kuti timusijire mubarihwana wavo.”
33 Ngo kudaro, pa usiku hwondhohwo, ivona vakarejeresa baba wavo ngo vhinyu. Perapo wo dangwe wakanghwina wovatana na baba wake. Asi babevo avazivi kuiziva nguva yaavatana navo no nguva yaamuka.
34 Pa njiku yo cipiri, wodangwe wakavhunja munukuna wake kuti: “Inini ndakavatana na baba usiku hwaperari, ngativapekejezve vhinyu usiku huno. Perapo unozonghwina wovatana navo. Ngo kudaro, tinozomusijira mubarihwana wavo.”
35 Pa usiku hwondhohwo, vakaitazve zvondhozvo, vopekeja baba wavo vhinyu. Perapo wo mudoko wakaenda kovatana navo. Asi babevo avazivi kuiziva nguva yaavatana navo no nguva yaamuka.
36 Ngo kudaro, vana vaviri va Roti vakava no mimba ya baba wavo.
37 Mwana wo dangwe wakabara mwana womudura zina rokuti Mowabhi. Iyena ndiyena baba wo Vamowabhi vanyamasi uno.
38 Munukuna wake wakabara mwana womudura zina rokuti Bheni-ami. Ndiyena baba wo Vaamoni vanyamasi uno.
Masoko o Pasi
^ Kana: “ivona avato vavatana no vanarume.”
^ Kana: “kukarangaja.”
^ Zvinoreva kuti, “Cidoko.”
^ Kana: “wakaphinduka.”
