Genesisi 20:1-18
-
Sara anoponeswa mu nyara ja Abhimereki (1-18)
20 Abhirahama wakathutha woenda kogara ku nyika yo Negebhi. Iyena wakagara pakati po Kadheshi no Shuri. Paaigara Gerari,
2 Abhirahama wakaphindazve kunanga ngo pamusoro pa Sara eciti: “Iyena i hambzaji* yangu.” Ngo kudaro, Abhimereki mambo wo Gerari, wakatumira vandhu kuti vaende komutora kuti vaviye naye.
3 Perapo Mwari wakagumira Abhimereki muhope cousiku, womuvhunja kudari: “Kunasa kunanga iwewe wapera kufa ngo ndava yo mwanakaji uwu wawatorari, zvecivoneka kuti iyena wakacadha; ngo wo mwanarume umweni.”
4 Asi Abhimereki wainga acito avatana na Sara. Ngo kudaro, wakati: “Jehovha munozourayadi kamare jinja ricina ndava?
5 Abhirahama aazivi kundivhunja kuti ‘Iyena i hambzaji* yangu’? Na Saravo aazivi kundivhunja kuti ‘Iyena ndi nevanji wangu’? Ndazviita ndicikarangariri kuti ndiri kushaisha. Ndicikazivi kuti ndiri kuposa.”
6 Mwari wo cokwadi wakamuvhunja muhope kudari: “Ndinozviziva kuti iwewe wazviita ucikazvizivi kuti uri kushaisha. Ngo zvandiitisa kuti ndikurambise kuti utame kundishaishira. Ndophinga kuti utame kumupsasa.
7 Wari hwirijai mukaji wo mundhu ngokuti iyena muporofeti. Iyena anozokuitira mukumbiro wokudeketera. Iwewe unozoenderera mberi wecipona. Kudari ukatama kumuhwirija, zivai kuti unozofa, iwewe no vandhu vaunavo.”
8 Abhimereki wakamuka comangwanani wodanija vashandiri vake vese, wovavhunja zvese izvi. Ivona vakathya maningi.
9 Perapo Abhimereki wakadanija Abhirahama womuvhunja kudari: “Zvicinyi zvawatiitirari? Ndakushaishirenyi kuti undivisire cishaishi cakakurisa kudari, inini no umambo hwangu? Zvowandiitirari azvizivi kunaka.”
10 Abhimereki wakaenderera mberi ecivhunjisa kudari: “Weciitari izvi, wainga no cinangwa cenyi?”
11 Abhirahama wakadavira kudari: “I ndava yokuti inini ndakarangarira kuti: ‘Vandhu vanogarari mu ndau iyi, avathyi Mwari, ivona vanozondiuraya ngo ndava yo mukaji wangu.’
12 Kusiyapo izvi, iyena i hambzajidi yangu, mwana wa babangu, asi atizivi kubahwa mundani mondhomo. Iyena wakazova mukaji wangu.
13 Mwari, paakandiita kuti ndibude kanyi ka baba wangu, ndogara ndecifuruka, ndakamuvhunja kudari: ‘Ndiitirei rudo hucikacinji ngo njira iyi: Kwese kwatinoenda nangai kudari: “Ava ndi nevanji wangu.”’”
14 Perapo Abhimereki wakatora mavhuta, n’gombe, vashandiri vorume no vokaji, wovapekeja Abhirahama. Perapo womuhwirijira Sara mukaji wake.
15 Kusiyapo izvo, Abhimereki wakananga kudari: “Nyika yangu nga iyi, garai pa ndau yaunoda.”
16 Perapo wakavhunja Sara kudari: “Ndiri kupekeja nevanji wako 1.000 co mare yo sirivha. Izvo zvinoda kuvonesa kuti iwewe auna ndava ku vandhu vese vaunavo no vandhu vamweni. Apana anozokupseruja.”
17 Abhirahama wakatanga kuita mukumbiro wokudeketera kuna Mwari wo cokwadi. Mwari, wakarapa Abhimereki, mukaji wake no vashandiri vake vokaji, votanga kubara vana.
18 Ngokuti Jehovha wainga waita kuti vanakaji vese vo nyumba ya Abhimereki vatame kubara, ngo ndava ya Sara mukaji wa Abhirahama.
