Genesisi 22:1-24
22 Pasure pazvo, Mwari wo cokwadi wakaeja Abhirahama. Iyena wakamuvhunja kudari: “Abhirahama!” Abhirahama wakadavira kudari: “Ndiri pano!”
2 Perapo Mwari wakati: “Ndapota, torai mwana wako, mwana wako umwe basi, Izaki, waunodaya maningi. Endai naye ku nyika yo Moriya, kuti umuite cipo kondhono. Unodikana kumuita cipo co kupiswa pa dundhu randinokutatija.”
3 Abhirahama wakamuka comangwanani, wosungira cigariro pa mbongoyo yake. Iyena wakatora varanda vake vaviri na Izaki mwana wake, perapo wakavaja* huni jo kuita ndijona cipo co kupiswa, wobata gwanja woenda kundau yaakavhunjwa ndi Mwari wo cokwadi.
4 Pa njiku yocitatu Abhirahama wakamusa meso ake wovona ndauyo aciri ngo ndhambo.
5 Abhirahama wakavhunja varanda vake kudari: “Imwimwi saranyi pano no mbongoyo iyi. Inini no mujaha uwu, tiri kumboenda inoo konamata Mwari. Tinoviya wari.”
6 Ngo kudaro, Abhirahama wakatora huni jo kuita ndijona cipo co kupiswa, wojithika mwana wake Izaki. Perapo wakatora muriro no cipanga, vopinda vese vovaviri.
7 Perapo Izaki wakavhunjisa baba wake, Abhirahama kudari: “Baba!” Abhirahama wakadavira kudari: “Bhuyai mwanangu!” Izaki wakananga kudari: “Itusu tatora huni no muriro asi vhuta rakona riri kwapi kuti tiriite cipo co kupiswa?”
8 Ngo kudaro, Abhirahama wakananga kudari: “Mwanangu, Mwari anozotipsakira vhuta ratingaita cipo co kupiswa.” Vovaviri vakaenderera mberi vecifamba.
9 Pakupejisira, ivona vakaguma pandau yavakatatijwaya ndi Mwari wo cokwadi. Abhirahama wakavaka artari, worongeja huni ngo panyezuru payo. Perapo iyena wakasunga mukono no makumbo o mwana wake Izaki, womudira pa artari ngo panyezuru po huni.
10 Perapo Abhirahama wakatambaraja nyara yake wobata cipanga kuti auraye mwana wake.
11 Asi ngirozi ya Jehovha, yakadanijira iri ngo kudenga yeciti: “Abhirahama, Abhirahama!” Abhirahama wakadavira kudari: “Ndiri pano!”
12 Ngirozi yakananga kudari: “Ucauraya mujaha uwo. Ucamuita ciri cese haco. Wari ndaakuziva kuti iwewe unothya Mwari. Auzivi kundinyima mwana wako; mwana wako umwe basi.”
13 Abhirahama wakamusa meso ake, wovona civhuta corume cainga cakasungwa ngo nyanga jaco pa pfiba.* Abhirahama wakaenda wocitora kuti acipire inga cipo co kupiswa. Ngo kudaro, mwana wake aazivi kuzopiswa.
14 Abhirahama wakadura ndau iyi zina rokuti Jehovha-jhiree.* Ndizvo.na zvinoitisa kuti mbhera nyamasi uno zvinangwe kudari: “Padundhu ra Jehovha, iyena anozopekeja zvinodiwa.”
15 Ngirozi ya Jehovha yakadanijazve hwocipiri Abhirahama, iri ngo kudenga,
16 yeciti: “Jehovha anoti: ‘Zvecivoneka kuti iwewe auzivi kundinyima mwana wako, mwana wako umwe basi, inini ndinopika kuti
17 inini ndinozokukomborera kamare. Ndinozowanja mubarihwana wako. Iwona unozowanda inga ndhondho jo kumatenga no musanga. Mubarihwana wako unozonyisa madhorobha* o vavengi vako.
18 Majinja ese o pasi pano, anozokomborehwa ngo ndava yo mubarihwana wako. Ngokuti iwewe, wazwa izwi rangu.’”
19 Pasure pazvo, Abhirahama wakahwirira ku varanda vake. Ivona vakamuka voenda vese ku Bheri-shebha. Abhirahama wakaenderera mberi ecigara ku Bheri-shebha.
20 Pasure pa izvi, Abhirahama wakazwa masoko okuti: “Mirika mukaji wa nevanji vako Nahori, wakabara vana ava:
21 Wodangwe ndi Uzi, wocipiri ndi Bhuzi munukuna wa Uzi, wocitatu ndi Kemuweri baba wa Arami,
22 Kesedhi, Azo, Piridhashi, Jidherafi na Bhetuweri.”
23 Bhetuweri wakabara Rabheka. Mirika na Nahori ndivona vakabara vana vasere ava. Nahori wainga nevanji wa Abhirahama.
24 Mbhwere yake yaidanijwa kuti Reumaa, wakabaravo vana ava: Tebha, Gahami, Tahashi na Maaka.
Masoko o Pasi
^ Kana: “wakapaja.”
^ Kana: “fusi.”
^ Gama iri rinoreva kuti “Jehovha Anozopekeja Zvinodiwa; Jehovha Anozoita ciri cese.”
^ Gama ngo Gama: “musuvo.”
