Genesisi 23:1-20
-
Rufu hwa Sana no kuvigwa kwake (1-20)
23 Sara wakava no 127 o makore. Aya akava makore o upenyu hwake.
2 Sara wakafira mu Kiriyati-aribha, kana kuti Hebheroni, mu nyika yo Khanani. Abhirahama wakatanga kucumba Sara no kucema.*
3 Abhirahama wakavha painga no mutembo wo* mukaji wake, woenda kovhunja vana va Hiti kuti:
4 “Inini ndiri munyikanja no murendo pakati penyu. Ndipenyi ndau kuti ndiite svipa,* ndivigiremo mutembo wangu.”*
5 Vana va Hiti vakadavira Abhirahama kuti:
6 “Izwanyi mambo wangu. Imwimwi muri mundhu wa Mwari* pakati pedu. Mungaviga henyu mutembo wenyu* mu svipa* yakanaka maningi pa svipa jatinajo wari. Apana angamurambira svipa yake kuti mutame kuviga mutembo wenyu.”*
7 Ngo kudaro, Abhirahama wakamuka, wokotama pamberi po vandhu vo nyikeyo, ku vana va Hiti.
8 Wakavavhunja kuti: “Kudari mukanditendera kuti ndivige mukaji wangu, ndizwenyi, kumbiranyi Efroni mwana wa Zohari
9 kuti anditengesere bako rake riya ro Makipera, riri mumbhiripiri mo munda wake. Ngaanditengesere ngo mutengo wo mare yo sirivha warinotengeswa ndiwona, kuti ive ndau yandinovigira vandhu vakafa.”
10 Efroni wainga akagara pakati po vana va Hiti. Ngo kudaro, Efroni Muhiti wakadavira Abhirahama vana va Hiti vecizvizwa, pambeji po vandhu vese vainghwina mu dhorobha rake, eciti:
11 “Andizvopi mambo wangu! Ndizwenyi. Ndinomupekeja mundewo no bako ririmo waro. Ndinomupekeja pamberi po vana vo vandhu vangu. Viganyi henyu mukaji wenyu.”
12 Abhirahama wakagwadama pamberi po vandhu vo nyikeyo.
13 Iyena wakavhunja Efroni kudari: “Ndapota, ndizwei! Ndinozokupa mare yo sirivha inokwana mutengo wo mindewo. Itorei kuti ndivigiremo mukaji wangu.” Paakananga izvi, vandhu vese vaizvizwa.
14 Efroni wakadavira Abhirahama kudari:
15 “Mambo wangu, ndizwenyi. Munda uwu unoita 400 o mashekeri* o sirivha. Asi aasisiri maningi pakati pangu na imwimwi. Endanyi henyu mooviga mukaji wenyu.”
16 Abhirahama wakazwa zvakanangari Efroni, wopima mutengo wo mare yo sirivha inokwana kuita 400 o mashekeri* o sirivha akanangwaya ndi Efroni, vana va Hiti vecizvizwa, mukuzwirana no mupimo unotendehwa ngo vatengesi.
17 Efroni wakatengesa munda wake wo Makipera, wainga uri phedo no Mamure. Munda, mapako no muti jese jainga jiri mundharaundha iyi, zvakaziviswa kuti zvainga
18 zva Abhirahama pamberi po vana va Hiti no vandhu vese vainghwina pa musuvo wo dhorobha.
19 Perapo Abhirahama wakaviga mukaji wake Sara mu bako ro munda wo Makipera unowanika pambeji po Mamure, kana kuti Hebheroni, mu nyika yo Khanani.
20 Ngo kudaro, munda no bako raingemo, zvakapekejwa Abhirahama ngo vana va Hiti kuti zviite ndau yo kuvigira vakafa.
Masoko o Pasi
^ Kana: “kurira.”
^ Kana: “no tembe yo.” Gama ro kuti tembe rinonagira muviri wo mundhu wakafa.
^ Kana: “maziyara.”
^ Kana: “tembe yangu.” Gama ro kuti tembe rinonagira muviri wo mundhu wakafa.
^ Kangaije: “Muri dhodha guru.”
^ Kana: “tembe yenyu.” Gama ro kuti tembe rinonagira muviri wo mundhu wakafa.
^ Maziyara.
^ Kana: “tembe yenyu.”
^ Shekeri imwe yairema 11,4 g. Vonanyi Masoko Okuengejera B14.
^ Shekeri imwe yairema 11,4 g. Vonanyi Masoko Okuengejera B14.
