Genesisi 24:1-67
24 Abhirahama wainga ava musharuka, ano makore akawanda. Jehovha wainga amukomborera mu zviro zvese.
2 Abhirahama wakavhunja mushandiri wake, mushandiri wo mukuruwane wo panyumba pake, waivonerera zviro zvake zvese kuti: “Ndapota pikai.*
3 Pikai ngo zina ra Jehovha, Mwari wo kudenga no pasi, kuti iwewe auzopsaki no mwana umwe hake wo Vakhanani vandinogarari pakati pavo kuti aite nyamwana yangu.*
4 Asi unodikana kuenda ku nyika yangu, ku ukama hwangu kuti upsakire mukaji, mwana wangu Izaki.”
5 Asi mushandiri wiya wakadavira kuti: “Ndinozoitenyi kudari akaramba kuviya na inini ku nyika ino? Kunanga kuti ndinozoviya kotora mwana wenyu kuti ndiyende naye ku nyika yomakavharo?”
6 Abhirahama wakamudavira kuti: “Audikani kuendesa mwana wangu kondhoyo.
7 Jehovha, Mwari wokumatenga wakandivhisaya ku nyumba ya baba wangu, ku nyika yo ukama hwangu, wobhuya na inini no kupika kondiri kuti: ‘Ndinozopekeja nyika iyi ku mubarihwana wako,’ anozotuma ngirozi yake kuti ikutungamirire. Iwewe unozowanireyo mukaji wo mwana wangu kondhoyo.
8 Kudari mwanakajiwo akaramba kuviya na iwewe, iwewe unonga wasujunuhwa pa mbhiko iyi. Asi audikani kuendeseyo mwana wangu.”
9 Mushandiri wiya wakagondesa Abhirahama, wopika* kuti waizoita zvaavhunjwaro.
10 Ngo kudaro, mushandiri wiya wakatora gumi ro makamera a patarau wake no mushovo wese wo upfumi hwa patarau wake. Perapo wakabata ngwanja woenda Mezopotamiya ku dhorobha ra Nahori.
11 Iyena wakagwadamisa kamera jiya pa mwimbo uri* ngo kunja ko dhorobha. Zuva rainga roda kuvira. Uwu wainga mukuvo unoenda vanakaji kocera kumwa.
12 Perapo iyena wakati: “Jehovha, Mwari wa patarau wangu Abhirahama, ndapota, itanyi kuti zvandiri kuendari koita, zvikwanisike nyamasi. Tatijanyi rudo hucikacinji ka patarau wangu Abhirahama.
13 Ndakaima pa mwimbo wo kumwa,* vasikane vo dhorobha iri vari kuviya kuzocera kumwa.
14 Ngazviitike kudari: Musikane wandinozovhunja kuti: ‘Ndapota, cerai kumwa mujuvi* rako kuti ndimwe.’ Iyena wodavira kuti: ‘Imwanyi, ndinopekejazve kamera jenyu kuti jimwe,’ ngaaite wiya womakasana kuti ave wo mushandiri wenyu Izaki. Nga izvi, ndinozoziva kuti maitira unyasha hucikacinji ka patarau wangu.”
15 Paainga acito apeja kuvereketa, Rabheka wakaviya no juvi* rake pa mapfuji,* iyena wainga mwana wa Bhetuweri. Bhetuweri wainga mwana wa Mirika. Mirika wainga mukaji wa Nahori. Nahori wainga hama ya Abhirahama.
16 Musikane uwu waiseja* maningi, wainga mbhandwe, wainga acito avatana no mwanarume. Iyena wakaenda ku mwimbo* wozaja juvi* rake ngo kumwa perapo wohwirira.
17 Mushandiri wiya wakagogoma woenda ngo kumbeji kwake wonanga kuti: “Ndapota ndipei kumwa padoko iri waro mujuvi* rakoro kuti ndimwe.”
18 Iyena wakadavira kuti: “Imwanyi mambo wangu.” Wakananga izvi ecithura* juvi* riya woridira munyara, womupekeja kuti amwe.
19 Paakapeja kumupekeja kumwa, iyena wakati: “Ndinocerazve kumwa kuti ndipekeje kamera jenyu mbhera jikwane.”
20 Ngo kudaro, iyena wakakasika kutora kumwa yaingaya mujuvi* wodhubhuzira mu ndau inomwira kumwa zvinyama. Wogogoma kwenda kumwimbo* kocera kumwa eciviya, mbhera kamera jese jopera kumwa kumwa.
21 Pamukuvo wese uwu, mwanarume wiya waimusota ecikahamara akanyarara, ecida kuvona kuti Jehovha waita kuti hwendo hwake hufambe ushoni kana kuti aazivi.
22 Kamera pojakapera kumwa kumwa, mwanarume wiya wakatora biriku* imwe yo pamiro yo goridhi inorema mutengo wo bindikati ro shekeri* no purusera mbiri jo goridhi jinorema mutengo wo gumi ro mashekeri,*
23 womuvhunjisa kuti: “Ndapota ndivhunjei, uri mwana waani? Kanyi ka babako kuno ndau yatingavata usiku huno?”
24 Iyena wakamudavira kuti: “Ndiri mwana wa waa Bhetuweri. Va Bhetuweri vainga mwana waa Mirika mukaji waa Nahori.”
25 Iyena wakaengejera kuti: “Kanyiyo tino mahavo,* zvokuha no ndau yo kuvata usiku huno.”
26 Perapo, mwanarumewo wakagwadama, wosikimara* pamberi pa Jehovha
27 wonanga kuti: “Ngaasimbhwe Jehovha, Mwari wa patarau wangu Abhirahama, ngokuti wakaenderera mberi eciitira rudo hucikacinji no kuva wakagondeka ka patarau wangu. Jehovha wanditungamirira mbhera ku nyumba yo hama ya patarau wangu.”
28 Musikane uwu wakagogoma kuenda kovhunja ukama hwake ngo pamusoro po zviro izvi.
29 Rabheka wainga no hama yaidanijwa Rabhani. Rabhani wakagogoma kuenda kosongana no mwanarume waengaya ku mwimbo.*
30 Paakavona biriku* yo mumiro no purusera zvainga mu nyara jo hambzaji* yake no paakazwa hambzaji yake Rabheka, acinanga kuti: “Mwanarume uwu wandivhunja zvakati no zvakati,” iyena wakagogoma kuenda kosongana naye, paaingaya wakaima pamutivi po kamera jiya.
31 Iyena wakamuvhunja kuti: “Imwimwi makakomborehwa ndi Jehovha, ngatipinde. Muri kundoimirenyi pano? Inini ndapera kunasirira nyumba no ndau yo kudira kamera.”
32 Mwanarume wiya wakanghwina mumba, kamera josujunuhwa, jopuwa mahavo* no zviro zvimweni zvinohiwa ngo zvinyama. Perapo mwanarume wiya wakapuwa* kumwa kuti aphoze* no vandhu vaainga navo.
33 Asi paakapuwa zvokuha, iyena wakati: “Andizohi ndicito ndabhuya zvondinodari kunanga.” Ngo kudaro, Rabhani wakati: “Zvinangei!”
34 Iyena wakati: “Inini ndiri mushandiri wa Abhirahama.
35 Jehovha wakakomborera maningi patarau wangu, iyena wakavakhupusa ngo kuvapa mavhuta, mwombe, sirivha, goridhi, vashandiri vokaji no vorume, kamera no mbongoyo.
36 Kusiyapo izvo, Sara mukaji wa patarau wangu wakavabarira mwana paainga waamusharuka. Patarau wangu vanozopekeja mwana uwu zviro zvese zvovanazvo.
37 Ngo kudaro, patarau wangu vakandiitisa mbhiko veciti: ‘Iwewe audikani kupsaka vana vo Vakhanani kuti vaite nyamwana yangu,* Vakhanani vondinogarari pakati pavo.
38 Audikani. Asi unodikana kuenda ku nyumba ya babangu, kuukama hwangu, kuti upsakireyo nyamwana yangu.’*
39 Asi inini ndakadavira patarau wangu kuti: ‘Ndinozoitenyi kudari mwanakajiwo akaramba kuviya na inini?’
40 Ivona vakandivhunja kuti: ‘Jehovha, wondinofambari pamberi pake, anozotuma ngirozi yake kuti iyende na iwewe, yozoita kuti hwendo hwako hukufambire ushoni, iwewe unodikana kupsaka nyamwana yangu* ku ukama hwangu, ku nyumba ya babangu.
41 Iwewe unozosujunuhwa pa mbhiko yako kudari ukaenda ku ukama hwangu, votama kukupekeja mwanakajiwo. Zvikaitika kudaro, iwewe unonga wasujunuhwa pa mbhiko yako.’
42 “Pondaguma ku mwimbo* nyamasi, ndananga kuti: ‘Jehovha Mwari wa patarau wangu Abhirahama, kudari mukaita kuti hwendo hwangu hufambe ushoni,
43 ngazviitike kudari: Vonanyi kuti ndakaima pa mwimbo* pano. Mwanakaji anozoviya kocera kumwa, wandinozovhunja kuti: “Ndapota, ndipevo kumwa padoko mu juvi rakoro kuti ndimwe,”
44 iyena wodavira kuti: “Imwanyi, ndinozocererazve kumwa kamera jenyu,” mwanakaji endhowo ngaave wiya wakasanwa ndi Jehovha kuti ave mukaji wo mwana wa patarau wangu.’
45 “Ndicito ndapeja kuvereketa mu mwoyo mangu, ndipona paazogumavo Rabheka ano juvi pa pfuji* rake. Iyena woenda ku mwimbo,* wotanga kucera kumwa. Inini ndonanga kudari: ‘Ndapota, ndipevo kumwa.’
46 Ngo kukasika, iyena wazodereja juvi kuvha pa pfuji rake* eciti: ‘Imwanyi, ndinoenda kocererazve kamera enyu.’ Perapo inini ndoimwa, iyena woenda kocererazve kamera jiya.
47 Pasure pazvo ndamuvhunjisa kuti: ‘Uri mwana waani?’ Iyena wodavira kuti: ‘Ndiri mwana waa Bhetuweri. Va Bhetuweri vainga mwana waa Nahori vavakabara naa Mirika.’ Inini ndazomusimija biriku* no purusera mu mukono make.
48 Inini ndogwadama, no kukotama pamberi pa Jehovha, ndosimba Jehovha, Mwari wa patarau wangu Abhirahama, wanditungamiriraya mu gwanja raushoni kuti nditore mwana wo hama ya patarau wangu kuti aite nyamwana yavo.*
49 Waro ndivhunjenyi kudari mecida kuitira rudo hucikacinji patarau wangu no kuva makagondeka kovari; kudari mucikadi, ndivhunjenyi kuti ndipsake kokwenda.”
50 Rabhani na Bhetuweri vakadavira kuti: “Izvi zviri kutungamirihwa ndi Jehovha. Itusu atikwanisi kukutendera kana kukurambira.
51 Rabheka nga uwu wakagarari. Mutorei upinde naye, ngaave mukaji wo mwana wa patarau wako, inga zvanangaro Jehovha.”
52 Mushandiri wa Abhirahama paakandozwa masoko aya, wakagwadama ngo kukasika pamberi pa Jehovha.
53 Mushandiri wiya wakatanga kuvhisa zviro zvo* sirivha, goridhi no nguvo, wozvipekeja Rabheka, wopekejazve hama ya Rabheka na mai wake zvipo zvo mutengo mukuru.
54 Pasure pazvo, muranda wiya no vandhu vaainga navo vakaha no kumwa, vovata usikuhwo.
Muranda wiya paakamuka comangwanani, wakati: “Ndiregerenyi ndihwirire ka patarau wangu.”
55 Hama ya Rabheka na mai wake vakati: “Taida kugarazve no musikane uwu gumi ro njiku basi. Perapo anozopinda.”
56 Muranda wiya wakati: “Mucandinonokera, ngokuti Jehovha waita kuti hwendo hwangu hufambe ushoni. Ndipindisenyi kuti ndihwirire ka patarau wangu.”
57 Ivona vakati: “Ngatidanije musikanewo tizwe ndiyena.”
58 Ivona vakadanija Rabheka, vomuvhunjisa kuti: “Unoda kuenda no mwanarume uwu?” Iyena wakadavira kuti: “Hina ndinoda.”
59 Ngo kudaro, ivona vakapindisa hambzaji* yavo Rabheka, mushandi* wa Rabheka, mushandiri wa Abhirahama no vandhu vaainga navo.
60 Ivona vakakomborera Rabheka, veciti: “Hambzaji* yedu, barai zviuru no zviuru zvo vana, mubarihwana wako ngaugare utaka madhorobha* o vaya vanounyenya.”
61 Perapo Rabheka no mubeseri wake vakamuka, vopakira kamera, votevera mwanarume wiya. Ngo kudaro, mushandiri wiya wakatora Rabheka, wopinda.
62 Izaki wainga wavha ku ndharaundha yo Bheeri-rahai-roi, ngokuti waigara ku nyika yo Negebhi.
63 Izaki waivha kopasiyari mu maminda zuva no ravira kuti arangarijisise. Paakasota, wakavona kamera jiciviya!
64 Rabheka paakasotavo, wakavona Izaki, wobzuka pa kamera ngo kukasika.
65 Iyena wakavhunjisa mushandiri wiya kuti: “Ndiyani mwanarume ari kufambaro mu maminda eciviya kotitandamija?” Mushandiri wiya wakati: “Ndi patarau wangu.” Ngo kudaro, Rabheka wakatora jira rake wojifukija kumeso.
66 Mushandiri wiya wakavhunja Izaki zvese zvaakaita.
67 Izaki wakatora Rabheka woenda naye mu tende ya Sara, mai wake. Ngo kudaro, iyena wakatora Rabheka womuita mukaji wake. Izaki wakada maningi Rabheka, perapo wotondhojwa maningi ndiyena ngokuti mai vakona vainga vafa.
Masoko o Pasi
^ Gama ngo Gama: “dirai nyara pasi po mutezo wangu.” Zvinovoneka kuti aya ainga manera okugondesa mbhiko.
^ Kana: “vaite mukajimwana wangu.”
^ Gama ngo Gama: “wakadira nyara pasi po mutezo wake.” Zvinovonesa kuti aya ainga manera o kugondesa mbhiko.
^ Kana: “pa sime riri; pa dima riri.”
^ Kana: “pa sime; pa dima.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “pa makhaja.”
^ Kana: “wainyara.”
^ Kana: “ku sime; ku dima.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “ashitura.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “ku sime; ku dima.”
^ Kana: “mbhete.”
^ Shekeri imwe yairema 11,4 g. Vonanyi Masoko Okuengejera B14.
^ Shekeri imwe yairema 11,4 g. Vonanyi Masoko Okuengejera B14.
^ Gama ngo Gama: “uswa, maushwa.”
^ Kana: “kukhodomara.”
^ Kana: “sime; dima.”
^ Kana: “mbhete.”
^ Kana: “hama.”
^ Gama ngo Gama: “uswa, maushwa.”
^ Kangaije zviro izvi zvakaitwa ndi Rabhani.
^ Kana: “ashambe makumbo; apuruze.”
^ Kana: “mukajimwana wangu.”
^ Kana: “mukajimwana wangu.”
^ Kana: “kupsaka mukajimwana wangu.”
^ Kana: “sime; dima.”
^ Kana: “sime; dima.”
^ Kana: “khaja.”
^ Kana: “sime; dima.”
^ Kana: “makhaja ake.”
^ Kana: “mbhete.”
^ Kana: “mukajimwana wavo.”
^ Kana: “kuvhisa zvinemeso zvo.”
^ Kana: “hama.”
^ Kana kuti, makayaya wake.
^ Kana: “hama.”
^ Gama ngo Gama: “musuvo.”
