Genesisi 25:1-34
25 Abhirahama wakarovorazve mukaji umweni, zina rake rainga Ketura.
2 Pa kufamba ko nguva, Ketura wakabara Zimirani, Jokishani, Medhani, Midhiyani, Ishibhaki na Shuwaa.
3 Jokishani wakazobara Shebha na Dhedhani.
Dhedhani wakabara Vaashuri, Varetushi no Vareumi.
4 Midhiyani wakabara Efa, Eferi, Anoki, Abhidhaa na Eridha.
Vese ava vainga vari vazukuru va Ketura.
5 Tevere, Abhirahama wakapekeja Izaki zvese zvaainga nazvo.
6 Abhirahama wakapekejazve zvipo vana vake vaakabara no vakaji vamweni. Perapo, paainga aciri penye, wakaendesa vana ava, ku nyika yo Kumavhazuva, kwainga ndhambo no mwana wake Izaki.
7 Abhirahama wakava no makore anokwana kuita 175.
8 Tevere, Abhirahama wakafa waa musharuka, iyena wakafa no upenyu hwakanaka, woenda kovigwa ngo mavigihwe akaithwa vandhu vake.
9 Vana vake Izaki na Ishimaeri vakamuviga mu bako ro Makipera raiwanika kumbeji ko Mamure, mu munda wa Efroni mwana wa Zohari Muhiti.
10 Abhirahama wainga akatenga munda uwu no vana va Hiti. Abhirahama wakavigwa mondhomo pamwepo no mukaji wake Sara.
11 Pasure po kufa kwa Abhirahama, Mwari wakaenderera mberi ecikomborera Izaki mwana wa Abhirahama. Izaki wakagara phedo no Bheeri-rahai-roi.
12 Zvakaitika mu upenyu hwa Ishimaeri mwana wa Abhirahama waakabara na Agari Muejipita, waingaya mushandiri wa Sara, nga izvi:
13 Aya ndiona mazina o vana va Ishimaeri, akandandaniswa mukuzwirana no mubarihwana wao: Nebhaiyoti wainga dangwe ra Ishimaeri, tevere Kadhari, Adhibheeri, Mibhisamu,
14 Mishima, Dhuma, Masa,
15 Adhadhi, Tema, Jeturi, Nafishi na Kedhema.
16 Ava ndivona vana va Ishimaeri no mazina avo. Iwona akarongwa mukuzwirana no magariro ovaiita, mutundhu ngo mutundhu pomwe no maakampamento avo. Ndiwona madhodha 12 mukuzwirana no mavhumbo avo.
17 Ishimaeri wakava no makore anokwana kuita 137. Iyena wakafa, woenda kovigwa ngo mavigihwe akaithwa vandhu vake.
18 Mubarihwana yake yaigara ku ndharaundha inotangira ku Havhira, phedo no Shuri, yaigara phedo no Ejipita, mbhera Asiriya. Iyena wakaenda kogara phedo no hama jake.*
19 Zvakaitika mu upenyu hwa Izaki mwana wa Abhirahama nga izvi:
Abhirahama wakabara Izaki.
20 Izaki wainga no 40 o makore paakarovora Rabheka, mwana wa Bhetuweri Muarami wo Padhani-arami, hambzaji* ya Rabhani Muarami.
21 Izaki waindodeketerera Jehovha ngo pamusoro po mukaji wake, ngokuti iyena wainga shenje;* ngo kudaro, Jehovha wakadavira mukumbiro wake, Rabheka mukaji wa Izaki wakaita mimba.
22 Vana vaingaya mundani make vaitakana ngocavo, zvoita kuti iyena anange kudari: “Kana zvakadari ndingararamirenyi* hangu?” Ngo kudaro, iyena wakaenda kovhunjisa Jehovha.
23 Jehovha wakamuvhunja kudari: “Mundani mako munozobuda majinja maviri. Vandhu vaviri vanozobuda mundani mako, vanozoparajana. Jinja rimwe rinozova rakavanga kupinda rimweni, wo mukuru anozoshandira wo mudoko.”
24 Paakakwana mazuva okuti abare, iyena wakabara manyambiri.
25 Ngo kudaro, wakabuda wo kutanga, iyena wainga akapsuka, muviri wake waitojana no nguvo ino mavhiri, iyena wakaduhwa kuti Izau.*
26 Pasure pazvo, munukuna wake wakabahwavo, iyena wakabuda akabatirira cisisinindho ca Izau, ngo kudaro, wakaduhwa zina rokuti Jakobe.* Izaki wainga no 60 o makore Rabheka paakabara vana ava.
27 Vafana ava vakakura. Izau wakava mundhu anokwanisa kunyanga, iyena wainga mundhu anodakarira kunyanga, asi Jakobe wainga ari mundhu acina caanopumbhwa, waigara mu matende.
28 Izaki waida maningi Izau ngokuti waimuviisira nyama kuti ahe, kuveni Rabheka waida maningi Jakobe.
29 Njiku imweni, Jakobe wainga ecibika zvokuha zvake, Izau paakaguma ecivha musora konyanga. Iyena wainga akaremba maningi.
30 Ngo kudaro, Izau wakavhunja Jakobe kudari: “Kasikai, ndapota, ndipekejevo padoko zvokuha zvokupsuka izvoo* zvauri kubikaro, ngokuti ndaremba* maningi!” Ndizvona zvakaitisa kuti iyena aduhwe zina rokuti Edhomi.*
31 Jakobe wakananga kudari: “Cokutanga nditengeserenyi utangwe hwenyu!”
32 Izau wakaenderera mberi eciti: “Inini ndoda kufa wari! Utangwe hunobasarenyi kondiri?”
33 Jakobe wakananga kudari: “Tanganyi ngo kupika!” Ngo kudaro, iyena wakapika, wotengesera Jakobe utangwe hwake.
34 Perapo Jakobe wakatora pau no nyemba jaaibikaya, wopekeja Izau. Izau wakaha, womwira perapo wobata gwanja rake wopinda. Ngo kudaro, Izau aazivi kureremeja utangwe hwake.
Masoko o Pasi
^ Kangaije: “Iyena waigara acikazwani no hama jake jese.”
^ Kana: “hama yokaji.”
^ Kana: “ngokuti iyena aacaibara.”
^ Kana: “ndingaponerenyi.”
^ Zina iri rinoreva kuti “Mavhiri.”
^ Zina iri rinozeva “Wiya wakabata cisisinindo; Anotorera Mundhu Cigaro.”
^ Gama ngo Gama: “zvokupsuka izvi.”
^ Kana: “ndiri kufa ngo njara.”
^ Zina iri rinoreva kuti “Kupsuka.”
