Genesisi 26:1-35
26 Munyikemo makava no njara, kuciripi yakaitikaya mu njiku ja Abhirahama. Izvi zvakaitisa kuti Izaki aende ka Abhimereki mambo wo Vafiristi, waigara Gerari.
2 Jehovha wakamugumira womuvhunja kudari: “Ucaenda ku Ejipita. Endai wogara ku nyika yondinozokutatija.
3 Ivai murendo mu nyika iyi, inini ndinozoenderera mberi ndina iwewe no kukukomborera ngokuti ndinozokupa nyika yese iyi no mubarihwana wako. Ndinozokwanirisa cigondiso condakaita na Abhirahama baba wako cokuti:
4 ‘Inini ndinowanja mubarihwana wako, Iwona unozowanda inga ndhondho jo kumatenga; ndinozopa mubarihwana wako nyika jese iji. Ngo pamusoro po mubarihwana wako, majinja ese o pasi pese anozokomborehwa.’
5 Ngokuti Abhirahama wakazwa izwi rangu, woenderera mberi eciita zvondinoda no kuzwira mupango jangu pomwe no mutemo jangu.”
6 Ngo kudaro, Izaki wakaenderera mberi ecigara Gerari.
7 Vanarume vaigara mu ndauyo pavaimuvhunjisa ngo pamusoro po mukaji wake, Izaki waivadavira kudari: “Iyena i hambzaji yangu.” Ngokuti waithya kunanga kudari: “Iyena mukaji wangu,” ngokuti iyena wakati: “Vandhu vanogara mu ndau iyi vanozondiuraya ngo pamusoro pa Rabheka,” ngokuti wakaseja* maningi.
8 Pasure po mukuvo munganani, Abhimereki mambo wo Vafiristi paaisota ngo pajhanera, wakavona Izaki ecipuruzira mukaji wake Rabheka.
9 Abhimereki wakadanija Izaki ngo kukasika, womuvhunja kudari: “Kunasa kunanga, iyena mukaji wako kamare! Waro ngenyi iwewe wananga kuti: ‘Iyena i hambzaji yangu’?” Izaki wakamudavira kudari: “Inini ndananga izvi ngo kuthya kuuraiwa ngo pamusoro pake.”
10 Asi Abhimereki wakaenderera mberi eciti: “Zvicinyi zvowatiitirari? Izvi zvaizoita kuti ari wese avatane no mukaji wako, zvotiviisira matambujiko!”
11 Abhimereki wakavhunja vandhu kuti: “Wiya anopsasa mwanarume uwu no mukaji wake, anozouraiwa!”
12 Izaki wakatanga kusima mbeu munyikeyo. Mu gore rondhoro kamare, iyena wakakotora zvinopetwa ka 100 kupinda zvaaingaya asima, ngokuti Jehovha waimukomborera.
13 Mwanarumewo wakakhupuka, iyena wakaenderera mberi ecibudirira mbhera kukhupuka maningi.
14 Iyena wakava no mushambi yo mavhuta, n’gombe no kuva no vashandiri vakawanda. Vafiristi vakatanga kumuitira thima ngo ndava yazvo.
15 Ngo kudaro, Vafiristi vakafushira mwimbo* yainga yakaciwa ngo vashandiri va Abhirahama baba wake, mu njiku jake.
16 Abhimereki wakavhunja Izaki kudari: “Budai mu ndharaundha yedui, ngokuti wakura maningi kupinda itusu.”
17 Ngo kudaro, Izaki wakavha mu ndharaundhemo wopinda ku muterero* wo Gerari, wogareyo.
18 Izaki wakacisazve mwimbo* jainga jakaciwa mu njiku ja baba wake Abhirahama, asi Vafiristi vainga vakajifushira pasure po kufa ka Abhirahama. Iyena wakajidanija ngo mazina ainga akaduhwaya ndi baba wake.
19 Vashandiri va Izaki povainga vecica mu muterero,* vakawana mwimbo* wainga no kumwa yaivhirira.*
20 Vahavisi va Gerari vakatanga kuvereketesana no vahavisi va Izaki, veciti: “Kumweyo ngo yedu!” Ngo kudaro, Izaki wakadura mwimbowo* zina rokuti Ezeki,* ngokuti vakavereketesana na Izaki.
21 Ivona vakaca mwimbo* umweni, asi vakatanga kuvereketesanazve ngo pamusoro pawo. Ngo kudaro, wakaudura zina rokuti Sitina.*
22 Pa kufamba ko mukuvo, iyena wakavha pa ndau yondhoyo woenda koca mwimbo* umweni, asi ivona avazivi kuvereketesana ngo pamusoro pawo. Ngo kudaro, iyena wakaudanija kuti Rehobhoti,* wonanga kuti: “Indava yokuti Jehovha watipekeja ndau huru, wotiita kuti tiwande maningi mu nyika iyi.”
23 Perapo, iyena wakaenda kogara Bheri-shebha.
24 Pa usikuhwo, Jehovha wakamugumira, womuvhunja kuti: “Inini ndini Mwari wa Abhirahama baba wako. Ucathya, ngokuti ndina iwewe, ndinozokukomborera no kuwanja mubarihwana wako ngo pamusoro pa Abhirahama mushandiri wangu.”
25 Ngo kudaro, wakavakepo artari wodanija zina ra Jehovha. Izaki wakavaka tende yake pondhopo, vashandiri vake vakacepo mwimbo.*
26 Pa kufamba ko mukuvo, Abhimereki wakaenda kwaari ecivha ngo Gerari na Ahuzati mupangiri wake, na Fikori mutungamiriri wo masoca ake.
27 Izaki wakavavhunjisa kuti: “Maviirenyi kuno? Andimwipi makandigogomera ku ndharaundha yenyu?”
28 Ivona vakamudavira kudari: “Takavona kuti Jehovha ana iwewe. Ngo kudaro, takavhunjana kudari: ‘Ngatende kozwirana naye no kuita citenderano
29 kuti iwewe auzotiitiri cakashata ngokuti itusu atizivi kukukhuvaza, asi takakuitira zvaushoni ngo kukupindisa mu runyararo. Iwewe wari uri mundhu wakakomborehwa ndi Jehovha.’”
30 Ngo kudaro, iyena wakavaitira mabuso, ivona voha no kumwa.
31 Comangwanani matete, vakafumirisa voitirana mbhiko. Perapo Izaki wakavaeneka, ivona vakapinda mu runyararo.
32 Pa njiku yondhoyo, vashandiri va Izaki vakaviya kuzomuvhunja ngo pamusoro po mwimbo* wovainga vakaca, vomuvhunja kuti: “Tawana kumwa!”
33 Ngo kudaro, iyena wakadura zina ro mwimbo* wiya kuti Shibha. Ndizvona zvakaitisa kuti zina ro dhorobha iri ridanijwe kuti Bheri-shebha mbhera na nyamasi.
34 Izau paainga no 40 o makore, iyena wakarovora vakaji vaviri, umwe waidanijwa kuti Judhiti mwana wa Bheeri Muhiti, umweni waidanijwa kuti Bhazemati mwana wa Eroni Muhiti.
35 Ivona vakahwajisa maningi mwoyo wa Izaki na Rabheka.
Masoko o Pasi
^ Kana: “wakanyara.”
^ Kana: “sime; dima.”
^ Kana: “wadhi.”
^ Kana: “sime; dima.”
^ Kana: “wadhi.”
^ Kana: “sime; dima.”
^ Kana: “yaibuda.”
^ Kana: “simero; dimero.”
^ Gama iri rinoreva “Kupipana.”
^ Kana: “sime; dima.”
^ Gama iri rinoreva “Kupumbha.”
^ Kana: “sime; dima.”
^ Zina iri rinoreva kuti “Ndau Jakakura.”
^ Kana: “sime; dima.”
^ Kana: “sime; dima.”
^ Kana: “sime; dima.”
