Genesisi 29:1-35
29 Kuvha apo, Jakobe wakaenderera mberi no hwendo hwake. Wakaenda ku nyika yo vandhu vo Kumavhazuva.
2 Ngo kudaro, iyena wakavona mwimbo wainga* musora no mushambi mutatu yo mavhuta yainga yakavata phedopo, ngokuti vainga no cirovejeso co kumwisa mavhuta pamwimbopo.* Mwimbo uwu waifungwa* ngo zibuwe ziguru.
3 Mushambi yese poyaiunganijwa pondhopo, vahavisi vaivhisa zibuwe riya ngo kurimburumbuja, vopekeja kumwa mushambi. Perapo, vaihwirijazve zibuwe riya pamwimbopo.*
4 Jakobe wakavavhunjisa kudari: “Hama jangu, munovha kwapi?” Ivona vakamudavira kudari: “Tinovha Harani.”
5 Iyena wakavavhunjisa kuti: “Munomuziva Rabhani muzukuru wa Nahori?” Ivona vakamudavira kuti: “Tinomuziva.”
6 Iyena wakavhunjisazve kuti: “Ari ushoni hake?” Ivona vakamudavira kuti: “Ari ushoni. Mwana wake Rakeri nga uwo ari kuviyaro no mavhuta!”
7 Perapo iyena wakati: “Aciri masikati. Asipi nguva yo kuunganija mavhuta. Mwisanyi kumwa mavhuta, muende komahavisa.”
8 Ngo ndava yazvo, vakananga kudari: “Atitendehwi kuita zvondhozvo mushambi jese jicito jaunganijwa pamwepo, povhiswa buwe ririwaro panyezuru po mwimbo.* Sure kwazvo, ndipona patinozopekeja kumwa mavhuta.”
9 Paainga acabhuya navo, Rakeri wakaguma no mavhuta a babake, ngokuti iyena wainga muhavisi.
10 Jakobe paakavona Rakeri, mwana wa Rabhani hama ya mai wake no mavhuta a Rabhani, Jakobe wakakhwedera ngo kukasika, wovhisa buwe riya ngo kurimburumbuja, wopekeja kumwa mavhuta a Rabhani hama ya mai wake.
11 Jakobe wakabhejhari Rakeri, wotanga kucema* ngo izwi guru.
12 Jakobe wakavhunja Rakeri kuti wainga mwana wa Rabheka ukama* hwa baba wake. Iyena wakagogoma woenda kovhunja babake.
13 Rabhani paakazwa masoko ngo pamusoro pa Jakobe mwana wo hambzaji yake,* iyena wakabuda ecigogoma kuenda kosongana naye. Iyena wakamukumbatira no kumubhejhari, womutora woenda naye kanyi kwake. Jakobe wakavhunja Rabhani zviro zvese zvainga zvakaitika.
14 Rabhani wakamuvhunja kudari: “Itusu tiri vo ngazi yondhoyo.”* Ngo kudaro, Jakobe wakagara naye mweji wamutero.
15 Rabhani wakati kuna Jakobe: “Audikani kundishandira mahara ngokuti uri wo ukama hwangu* basi. Ndivhunjei, unoda kuti ndikupocerese mutengonyi?”
16 Rabhani wainga no vana vaviri vokaji. Wodangwe waidanijwa Reya, womudoko waidanijwa Rakeri.
17 Asi majiso a Reya aacaiemujepi, kuveni Rakeri waiemuja, iyena wainga musikane wakaseja* maningi.
18 Jakobe wakafa ndi Rakeri, zvokuti wakananga kudari: “Inini ndingashanda makore manomwe kuti ndiwane mwana wenyu wo mudoko Rakeri.”
19 Ngo kudaro, Rabhani wakati: “Zvitori nane kwandiri kutokupekeja kuciripi kupekeja mundhu umweni. Garai na inini.”
20 Jakobe wakashanda makore manomwe kuti awane Rakeri, asi makore aya waimavona inga mashoma ngo pamusoro po rudo hwaainga nahwo na Rakeri.
21 Perapo Jakobe wakavhunja Rabhani kudari: “Ndipenyi mukaji wangu kuti ndivatane naye, ngokuti makore manomwe* apera.”
22 Ngo kudaro, Rabhani wakakwengweneja vandhu vese vo mundharaundhemo, woita mabuso.
23 Asi co usiku, iyena wakatora mwana wake Reya, wopekeja Jakobe kuti avatane naye.
24 Rabhani wakatorazve mushandiri wake wokaji Ziripa wopekeja Reya mwana wake kuti ave mushandiri wake.
25 Comangwanani, Jakobe wakavona kuti wainga Reya! Ngo kudaro, wakavhunja Rabhani kudari: “Zvicinyi zvomandiitirari? Andizivi kumushandira kuti ndiwane Rakeri? Ngenyi mandicengejera?”
26 Rabhani wakamudavira kuti: “Kwedu kuno, azviiti kuti arovohwe wo mudoko acito warovohwa wo mukuru.
27 Ambai kupejisa mabuso o mucadho uwu ko sumana yese. Pasure pazvo, ndinozokupazve umweni kudari ukandishandirazve makore manomwe.”
28 Jakobe wakatendera zvese zvakanangwa ndi Rabhani, woita mabuso o mucadho ko sumana yese, perapo Rabhani womupekeja Rakeri mwana wake kuti ave mukaji wake.
29 Kusiyapo izvo, Rabhani wakatora mushandiri wake wokaji Bhiriha womupekeja mwana wake Rakeri kuti ave mushandiri wake.
30 Ngo kudaro, Jakobe wakavatanavo na Rakeri. Iyena waida maningi Rakeri kupinda Reya, woshandirazve Rabhani ko makore manomwe.
31 Jehovha paakavona kuti Reya wainga acikadiki ndi Jakobe, wakamuita kuti ave no mimba, asi Rakeri aacaibara.*
32 Ngo kudaro, Reya wakava no mimba, wobara mwana, womudura zina rokuti Rubheni,* wonanga kudari: “Izvi zvaitika ngokuti Jehovha wavona kusuruvara* kwangu. Kuvhira wari mwamunangu anozotanga kundidavo.”
33 Wakavazve no mimba, wobara mwana, wonanga kuti: “Izvi zvaitika ngokuti Jehovha wandizwa, ngokuti andicaidikepi., Asi Mwari wandipekejazve mwana uwu.” Ngo kudaro, wakamudura zina rokuti Simiyoni.*
34 Iyena wakavazve no mimba, wobara mwana, wonanga kuti: “Wari mwamunangu vanozogara phedo na inini, ngokuti ndavabarira vana vatatu.” Ngo kudaro, wakaduhwa zina rokuti Revhi.*
35 Wakavazve no mimba, wobara mwana, wonanga kudari: “Vhaza ino ndinozosimba Jehovha.” Ngo kudaro, wakamudura zina rokuti Judha.* Kuvha apo, wakaima kubara.
Masoko o Pasi
^ Kana: “sime rainga; dima rainga.”
^ Kana: “pasimepo; padimepo.”
^ Kana: “sime iri raifungwa; dima iri raifungwa.”
^ Kana: “pasimepo; padimepo.”
^ Kana: “sime; dima”
^ Kana: “kurira.”
^ Gama ngo Gama: “hama.”
^ Kana: “hama yake yo kaji.”
^ Kana: “itusu tiri vo ukama hwophedo.” Gama ngo Gama: “iwewe kamare uri maphondo angu no nyama yangu.”
^ Gama ngo Gama: “uri hama yangu.”
^ Kana: “wakanyara.”
^ Gama ngo Gama: “ngokuti njiku jangu japera.”
^ Kana: “wainga shenje; wainga ciumba.”
^ Zina iri rinoreva kuti “Vonanyi Mwana.”
^ Kana: “kucamwa.”
^ Zina iri rinoreva kuti “Kuzwa.”
^ Zina iri rinoreva kuti “Kunamirira; Kubatanijwa.”
^ Zina iri rinoreva kuti “Anosimbwa.”
