Genesisi 3:1-24
3 Nyoka ndiyona yainga yakangwara maningi kupinda zvinyama zvese zvo musora zvainga zvakaitwa ndi Jehovha Mwari. Ngo kudaro, nyoka yakati ku mwanakaji: “Ndizvonadi kamare kuti Mwari wakamuvhunja kuti amudikani kuha mucero jo muti jese jo mu munda?”
2 Asi mwanakaji wakavhunja nyoka kudari: “Itusu tinotendehwa kuha mucero jese jo mu munda.
3 Asi Mwari wakatirambisa mucero umwe wo muti uri pakati po munda, eciti: ‘Amudikani kuha mucero wo muti uwu, nee kuupsasa, ngo kuti munozofa.’”
4 Nyoka yakananga kudari kuno mwanakaji: “Zvokadi kamare, imwimwi amuzofi.
5 Ngokuti Mwari anoziva kuti pa njiku yamunozoha mucero uwu, meso enyu anozofununguka, motojana na Mwari, moziva zvakanaka no zvakashata.”
6 Ngo kudaro, mwanakaji wakavona kuti muti wiya, wainga wakanaka maningi kuti uhiwe, iwona waidakajisa meso. Zvokadi muti wondhowo waidakajisa maningi kuusota. Iyena wakakava* mucero wiya, wouha. Perapo, wakazopekejavo mwamunake paainga naye, mwamunake wakatangavo kuuha.
7 Meso avo akafununguka, voziva kuti vainga mitu. Ngo kudaro, ivona vakatanga kusona masakani o mufigu kuti vafukije umitu hwavo.
8 No papera mukuvo wakati kuti, ivona vakazwa izwi ra Jehovha paainga ecifamba-famba mu munda. Iyi yainga nguva yo kuti mapepo ainga ecitaka co masikati. Mwanarume no mukaji wake, vakafindarira* Jehovha Mwari, pakati po miti yo mu munda.
9 Jehovha Mwari waindodanija Mwanarume wiya eciti: “Uri kwapi?”
10 Pakupejisira iyena wakazodavira kuti: “Ndarizwa izwi renyu mu munda, asi ndaithya, ngokuti ndainga mitu, ndizvona zvandiitisa kuti ndifindare.”*
11 Ngo kudaro, Mwari wakamuvhunjisazve kuti: “Ndiyani wakuvhunja kuti uri mitu? Waha mucero wiya wondakakuvhunjaya kuti ucauha here?”
12 Mwanarume wakadavira kuti: “Mwanakaji womakandipekejaya kuti agare na inini, ndiyena wandipa mucerowo kuti ndihe, ngo kudaro, ndauha.”
13 Jehovha Mwari wakavhunja mwanakaji kudari: “Zvicinyi zvowaitari?” Mwanakaji wakadavira kuti: “Nyoka ndiyona yandicengeja, ndizvona zvandiitisa kuti ndiuhe.”
14 Ngo kudaro, Jehovha Mwari wakavhunja nyoka kuti: “Ngokuti iwewe waita izvi, watukwa pakati po zvifuyo zvese no zvinyama zvese zvo musora. Iwewe unozogwezva ngo ndani yako, unozoha mavhu njiku jese jo upenyu hwako.
15 Ndinozodira ruvengo pakati pako no mwanakaji, no pakati po mubarihwana* wako no mubarihwana wake. Mubarihwana wake unozocangaja* musoro wako, iwewe unozoruma cisisinindho cake.”
16 Mwari wakavhunja mwanakaji kudari: “Ndinozoengejera kuhwaja ko mimba yako, iwewe unozohwajihwa maningi pa kubara. Unozodazve maningi kugara no mwamuna wako, zve iyena anozokutonga.”
17 Mwari wakavhunja Adhamu kudari: “Zvecivoneka kuti iwewe wazwira zvakananga mukaji wako, woha mucero wo muti wandakakuvhunja kuti,’ audikani kuha mucero wo muti uwu,’ mavhu ngaatukwe ngo ndava yako. Kuti uhe mucero inovha pasi, unodikana kusurura ziya njiku jese jo upenyu hwako.
18 Pasi panozomera muzwa no mufumbo wese wo sora rinobaya. Iwewe unozoha zvinomera mu munda no musora.
19 Unozosurura ziya kuti uwane cokuha, mbhera uhwirire ku mavhu ko wakavha. Iwewe uri mavhu, unozohwirirazve ku mavhu.”
20 Pasure pa izvi, Adhamu wakadura mukaji wake kuti Evha,* ngokuti iyena waizova mai wo vandhu vese.
21 Jehovha Mwari wakaitira Adhamu no mukaji wake nguvo jakareba jo matovo kuti avasimije.
22 Ngo kudaro, Jehovha Mwari wakati: “Mundhu waezana na itusu, woziva zvakanaka no zvakashata. Wari, kuti iyena atame kwendazve kookava* mucero wo muti wo upenyu, wouha, wova no upenyu ucingaperi . . .”
23 Ngo kudaro, Jehovha Mwari wakavagogomera mu munda wo Edheni, kuti vaende korima mavhu ovakaitwa ndiona.
24 Ngo kudaro, iyena wakagogomera mundhu, wodira makherubhi ngo kumavhazuva ko munda wo Edheni, no banga raicetuka-cetuka, raitenderera mukuvo wese, kuti ringwarire gwanja raiyenda ku muti wo upenyu.
Masoko o Pasi
^ Kana: ”wakakhava.”
^ Kana: “vakavanda.”
^ Kana: “ndivande.”
^ Gama ngo gama: “mbeu.”
^ Kana: “unozokwiya-kwiya.”
^ Zina iri rinoreva kuti Anopona.
^ Kana: “kokhava.”
