Genesisi 30:1-43
30 Rakeri paakavona kuti aaripi kukwanisa kubarira mwana Jakobe, wakava no ushanje na yaya wake. Wakatanga kuvhunja Jakobe kudari: “Ndipenyivo vana, ngokuti mukatama kudaro ndinozofa.”
2 Ngo kudaro, Jakobe wakanyangajwa maningi ngo pamusoro pa Rakeri, womuvhunja kudari: “Ndini Mwari here wakakuitisaro kuti utame kubara vana?”
3 Ngo kudaro, iyena wakananga kudari: “Ari pano mushandiri wangu Bhiriha. Vatananyi naye kuti iyena andibarire vana, kuti ndivevo no vana vecibahwa ndiyena.”
4 Ngo kudaro, Rakeri wakatora Bhiriha mushandiri wake womupekeja Jakobe kuti aite mukaji wake. Jakobe wovatana naye.
5 Bhiriha wakava no mimba, wobarira mwana Jakobe.
6 Tevere, Rakeri wakananga kudari: “Mwari waita mutongi wangu, iyena wazwazve izwi rangu, zvokuti iyena wandipekeja mwana.” Ndizvona zvakaitisa kuti iyena amudure zina rokuti Dhani.*
7 Bhiriha mushandiri wa Rakeri, wakaitazve mimba, wobarira Jakobe mwana wocipiri.
8 Rakeri wakananga kudari: “Inini ndakahwa hondo huru na yaya wangu, ndowina.” Ngo kudaro, iyena wakamudura zina rokuti Naftari.*
9 Reya paakavona kuti waguma kubara vana, iyena wakatora mushandiri wake Ziripa, womupekeja Jakobe kuti aite mukaji wake.
10 Ziripa mushandiri wa Reya wakabarira Jakobe mwana.
11 Reya wakananga kudari: “Makorokoto!” Ngo kudaro, iyena wakamudura zina rokuti Gadhi.*
12 Sure kwazvo, Ziripa mushandiri wa Reya, wakabarirazve Jakobe mwana wocipiri.
13 Tevere, Reya wakananga kudari: “Ndakadakara maningi, zvokuti vanakaji vese vanozonanga kuti inini ndiri mundhu wakadakara.” Ngo kudaro, wakamudura zina rokuti Azeri.*
14 Mu njiku jo kukotohwa ko tirigu, Rubheni waifamba-famba mu munda wowana mucero jo mandragora.* Wakajitora wopinda najo kuna Reya, mai wake. Perapo, Rakeri wakavhunja Reya kuti: “Ndapota, ndipei mucero munganani jo mandragora* javiyaro no mwanako.”
15 Asi Reya wakamudavira kudari: “Zvawakanditoreraya mwamuna wangu azvikwani? Uri kudazve kutora no mandragora aviyari no mwana wangu?” Rakeri wakati: “Zvakanaka. Iyena anozoviya kovata na iwewe usiku huno, kuti ndiwane mandragora aviya no mwana wako.”
16 Jakobe paaiviya kuvha ku maminda comadeko, Reya wakaenda koosongana naye womuvhunja kudari: “Unozovatana na inini usiku huno ngokuti ndakutenga ngo mandragora o mwana wangu.” Ngo kudaro, iyena wakaenda kovata naye usiku hwondhohwo.
17 Mwari wakazwa Reya no kumudavira. Iyena wakava no mimba, wobarira Jakobe mwana wocishanu.
18 Reya wakati: “Mwari wandipekeja mupocero wangu. Ngokuti ndapekeja mwamuna wangu mushandiri wangu.” Ngo kudaro, wakamudura zina rokuti Isakari.*
19 Reya wakavazve no mimba, wobarira Jakobe mwana wocitandhatu.
20 Tevere Reya wakananga kudari: “Mwari wandipa, hina kupa inini. Mwari wandipa cipo cakanaka maningi. Wari uno, mwamuna wangu vaakundidavo maningi ngokuti ndavabarira vana vatandhatu.” Ngo kudaro, iyena wakamudura zina rokuti Zebhuroni.*
21 Pasure pazvo, iyena wakabarazve mwana wokaji womudura zina wokuti Dhaina.
22 Pejisire, Mwari wakaceukija Rakeri. Mwari wakazwa no kumudavira womuita kuti aitevo mimba.
23 Iyena wakaita mimba, wobara mwana. Perapo wakananga kudari: “Mwari wavhisa kupserujwa kwangu!”
24 Ngo kudaro, iyena wakamudura zina rokuti Josefa,* eciti: “Jehovha wandiengejerazve mwana umweni.”
25 Rakeri paakapera kubara Josefa, pondhopo kamare Jakobe wakavhunja Rabhani kudari: “Ndiregerenyi ndiende kanyi, ku nyika yangu.
26 Ndipekejenyi vakaji vangu no vana vangu, vondakamushandiraya kuti ndivawane, kuti ndipinde. Imwimwi munonasa kuzviziva kuti inini ndakamushandira.”
27 Perapo Rabhani wakamuvhunja kudari: “Kudari ndikava no unyasha pamberi pako, zviri kuitikari zvinondivonesa kuti* Jehovha ari kundikomborera ngo pamusoro pako.”
28 Iyena wakati: “Nangai mupocero waunoda, inini ndinozokupekeja.”
29 Ngo kudaro, Jakobe wakamuvhunja kuti: “Imwimwi munozviziva mashandire andaiita kwamuri no mawandire ari kuita mushambi wenyu mu nyara jangu.
30 Mushambi wenyu wainga mudoko ndicito ndaviya pano, asi wari uno mushambi wenyu wakura no kuwanda, Jehovha ari kumukomborera kuvhira pandakaguma pano. Waro ndinozoshandiravo rini muzi wangu?”
31 Rabhani wakananga kudari: “Waro ndokupekejenyi?” Asi Jakobe wakati: “Apana camunodikana kundipekeja! Inini ndingahwirirazve kohavisa mavhuta enyu no kumangwarira, kudari mukandiitira ciro ici:
32 Inini ndinozonghwina mu mushambi wenyu nyamasi. Imwimwi pauranyi mavhuta ano zvimavara zvidoko no makhamba-makhamba no zvimavhuta zvese zvakapsuka zvosvipirikira. Pakati po mbuji, pauranyi mbuji jese jokaji jino makhamba-makhamba no zvimavara zvidoko. Kuvhira wari, izvi ndizvona zvinozova mupocero wangu.
33 Kururama* kwangu kunozovoneka pa njiku yomunozoviya kuzovona mupocero wangu. Kudari mukakhanda mbuji jokaji jicina mavara no makhamba-makhamba no zvimavhuta zvicizivi kupsuka zvosvipirikira, inini ndinonga ndazviba.”
34 Ngo kudaro, Rabhani wakananga kudari: “Zvakanaka! Ngatiite zvowanangaro.”
35 Pa njiku yondhoyo, Rabhani wakapaura magotokoto ese ainga no zvimavara no mbuji jokaji jino zvimakhamba-makhamba, no mavhuta ano civara cakacena no ainga akapsuka osvipirikira, womapekeja mwana wake kuti amangwarire.
36 Tevere, wakapindisa mavhuta a Jakobe pa mumango* unofambhwa njiku ndhatu no mavhuta ake. Asi Jakobe wakaenderera mberi ecihavisa mavhuta a Rabhani.
37 Jakobe wakatema muti muvishi jo muestoraki, muamendowa no womupurani. Iyena wakaceca mateme o mativi amweni o mitijo, woita kuti divi rakacena rivoneke.
38 Tevere iyena wakatora muti jaakacecaya wojidira pamberi po mushambi, kuti pajinoviya kuzomwa kumwa, jivevejerane panyezuru po muti jiya.
39 Mushambi jaivevejerana pamberi po muti jiya, zvoita kuti jibare vana vano zvimutaro-mutaro, zvimavara zvidoko no makhamba-makhamba.
40 Jakobe wakapaura zvimavhuta izvi, wozvisikisa zvogara kumbeji ko mushambi wo zvinyama zva Rabhani, zvainga no zvimutaro-mutaro no zvokupsuka zvosvipirikira. Perapo Jakobe wakaparajanisa mushambi wake, iwona auzivi kuzobatanazve no mushambi wo mavhuta a Rabhani.
41 Nguva jese nyama jakavanga pajaida kuveveja, Jakobe waidira zvimuti pambeji po zvinyama, mu mujiyo jaimwihwa kumwa ngo zvinyama izvi, kuti jiveveje pambeji po zvimuti.
42 Asi zvinyama zvakarembejeka pazvainga zvecida kuvevejerana, iyena aacaidirepi zvimuti zviyana. Izvi zvaiitisa kuti vana vo zvinyama zvakarembejeka zvive zva Rabhani, asi vana vo zvinyama zvakavanga zvive zva Jakobe.
43 Ngo njira iyi, Jakobe waibudirira maningi, mushambi wake wakakura, wova no vashandiri vorume no vokaji, kamera no mbongoyo.
Masoko o Pasi
^ Zina iri rinoreva kuti “Mutongi.”
^ Zina iri rinoteva kuti “Hondo Jangu.”
^ Zina iri rinoreva kuti “Makorokoto.”
^ Zina iri rinoreva kuti “Mudakaro; Kudakara.”
^ Vanakaji vaiha mucero uwu, vecirangarira kuti vaizobesehwa kuti vabate pamuviri.
^ Vanakaji vaiha mucero uwu, vecirangarira kuti vaizobesehwa kuti vabate pamuviri.
^ Rinoreva kuti: “Iyena Mupocero Wangu.”
^ Zina iri rinoreva kuti “Kudiwavo.”
^ Zina iri ndikona kugurisihwa ko zina rokuti Josifiya, rinoreva kuti “Jehovha ngaaengejere.”
^ Kana: “zviri kuitikari, ucapupu hwokuti.”
^ Kana: “kugondeka.”
^ Kana: “musango.”
