Genesisi 31:1-55
31 Pakufamba ko nguva, Jakobe wakazwa zvakanangwa ngo vana va Rabhani kuti: “Jakobe waunganija zviro zvese zva baba wedu. Upfumi hwese hwaaunganijari, ngo hwa baba wedu.”
2 Jakobe paaisota kumeso ka Rabhani waivona kuti mavonero aaimuita andiopi aaimuita kareko.
3 Pakupejisira, Jehovha wakazovhunja Jakobe kuti: “Hwirirai ku nyika yo majibaba ako, ku ukama hwako, inini ndinozoenderera mberi ndina iwewe.”
4 Perapo, Jakobe wakatuma ndhumwa kuti iyende kodanija Rakeri na Reya kuti vaende kumahavo kwaaihavisa mushambi wake,
5 Iyena wakavavhunja kuti:
“Ndavona kuti mavonero ari kundiita baba wenyu acinja, asi Mwari wa baba wangu ana inini.
6 Imwimwi munozviziva ushoni kuti ndakashandira baba wenyu ngo simba rangu rese.
7 Baba wenyu vakada kundicengeja vocinja mupocero wangu ko vhaza jinokwana kuita gumi, asi Mwari aazivi kuvatendera kuti vandikhuvaze.
8 Povainanga kuti ‘zvinyama zvese zvino zvimavara zvidoko zvaizova mupocero wako,’ mushambi wese waibara zvivana zvino zvimavara zvidoko. Asi povainanga kuti ‘zvinyama zvese zvino mutaro-mutaro zvinozova mupocero wako,’ mushambi wese waibara zvivana zvino zvimutaro-mutaro.
9 Ngo kudaro, Mwari waindotora mushambi wa baba wenyu ecindondipekeja.
10 Nguva jimweni, mushambi powaida kuvevejana, ndakavata ndorota kuti zvinyama zvorume zvaiendeyo waro zvainga zvo zvimavara zvidoko, zvomutaro-mutaro no makhamba-makhamba.
11 Perapo, ngirozi ya Mwari wo cokwadi yakandidanija kuti, ‘Jakobe!’ inini ndodavira kuti, ‘Ndauwe.’
12 Iyona yakati: ‘Ndapota musai majiso ako, vonai. Zvinyama zvese zvorume zviri kuendaro kumushambi ngo zvo zvimavara zvidoko, zvimutaro-mutaro no zvo makhamba-makhamba, ngokuti ndavona zvese zvaari kukuitira Rabhani.
13 Ndini Mwari wo cokwadi wo Bheteri kawakazojaya buwe kuti rive rocirangarijo wondiitira mbhiko. Waro mukai, budai mu nyika iyi uhwirire mu nyika yawakabarihwa.’”
14 Rakeri na Reya vakamudavira kuti: “Itusu aticinazve utaka pamuzi pa baba wedu.
15 Avaripi havo kutivona inga vandhu vo nyikanja? Ngokuti vakatitengesa vopera kuha mare yavakaashiraro.
16 Upfumi hwese hwakatorehwari baba wedu ndi Mwari, ngo hwedu no hwo vana vedu. Ngo kudaro, itanyi zvese zvamakavhunjwaro ndi Mwari.”
17 Perapo, Jakobe wakamuka ngo kukasika wopakija vana vake no vakaji vake pa kamera.
18 Iyena wakatanga kukumbza* mushambi jake, mushambi jaakawana mu nyika yo Padhani-arami no upfumi hwake hwese hwaainga nahwo, wopinda ka Izaki babake mu nyika yo Khanani.
19 Rabhani wainga aenda kogunda ukuse hwo* mavhuta. Rakeri wakaba zvithombe* zva baba wake.
20 Kusiyapo izvo, Jakobe wakacengeja Rabhani Muarami, ngokuti wakapinda acizivi kueneka.
21 Iyena wakatiza woambuka Murambo,* iyena no zviro zvese zvaainga nazvo. Perapo, wakaenda ku ndharaundha yo Giriyadhi yainga no matundhu.
22 Pa njiku yo citatu, Rabhani wakavhunjwa kuti Jakobe watiza.
23 Ngo kudaro, iyena wakatora hama* jake, womutevera pa mumango* wo njiku nomwe, womubatira mu ndharaundha yo Giriyadhi yainga no matundhu.
24 Perapo Mwari wakagumira Rabhani Muarami muhope cousiku womuvhunja kuti: “Bhasopai zvauri kudaro kuvhunja Jakobe, azvinenyi kuti zvakanaka kana zvakashata.”
25 Ngo kudaro, Rabhani wakakhwederera Jakobe, Jakobe paainasirira tende yake pa dundhu. Rabhani no hama jake vakagara pa ndharaundha yo Giriyadhi yainga no matundhu.
26 Perapo Rabhani wakavhunja Jakobe kuti: “Mbzinyi zvawaitari? Ngenyi wandicengeja wotora vana vangu inga vasungwi vatohwa ku hondo?
27 Ngenyi wakapinda ngo cifise-fise wondicengeja ngo kutama kundivhunja? Kudari nowakandivhunja, taizoenekana takadakara teciimba ndumbo, kurija ngoma no cimadangari.
28 Asi iwewe auzivi kundipa mukana wo kubhejhari vazukuru* vangu no vana vangu. Wakaita zvourethe.
29 Inini ndinokwanisa kukukhuvaza, asi Mwari wa baba wako wakabhuya na inini usiku hwaperari wondivhunja kuti: ‘Bhasopai zvauri kudaro kuvhunja Jakobe, azvinenyi kuti zvakanaka kana zvakashata.’
30 Wari uri kupinda ngokuti uri kuda kwenda kovona kanyi ka baba wako, waro wazobirenyi zvimwari zvangu?”
31 Jakobe wakadavira Rabhani kuti: “I ndava yokuti ndaithya. Ndairangarira kuti ‘maizonditorera vana venyu ngo hasha.’
32 Ari wese wamunowanaro no zvimwari zvenyuzvo ngaaurawe. Waro psakanyi zviro zvenyu zvamunorangariraro kuti ndinazvo, hama jenyu jecivona, mutore zviro zvenyu.” Jakobe aacaizvizivepi kuti Rakeri wakazviba.
33 Ngo kudaro, Rabhani wakanghwina mu tende ya Jakobe, mutende ya Reya no mutende yo vashandiri vaviri vokaji vaya, asi aazivi kuzviwana. Perapo, wakabuda mutende ya Reya wonghwina mutende ya Rakeri.
34 Pamukuvo uwu, Rakeri wainga wakatora zvithombe zviya wozvidira mucitengu co vanakaji cinosungihwa pa kamera wozvigarira. Ngo kudaro, Rabhani wakapsaka mukati mo tendeyo yese asi aazivi kuzviwana.
35 Perapo, Rakeri wakavhunja babake kudari: “Mucandicamwira mambo wangu, andikwanisi kumuka pamberi penyu, ngokuti ndiri kuhwaja ndhendha yo vanakaji.” Ngo kudaro, iyena wakanasa kupsaka, asi aazivi kuwana zvithombe zviya.
36 Jakobe wakanyangajwa wotanga kuvereketera Rabhani. Jakobe wakavhunja Rabhani kuti: “Ndamushaishirenyi? Muri kunditevererenyi makanyangajwa?
37 Waro maperaro kuthetha zviro zvese zvandinazvo, ngocapi ciro co kanyi kwenyu comawana? Cidirenyi apa pamberi po hama jenyu no hama jangu kuti ijona jititonge tovaviri.
38 Pa 20 o makore pondaingari na imwimwi, mavhuta enyu no mbuji jenyu azvizivi kusvoja.* Inini andizivi kuha vhuta ro mushambi wenyu nee rimwe haro.
39 Inini andizivi kumuviisira cinyama cakarumwa ngo cikara. Ndaipagari cinyama cese cairumwa. Kudari cinyama caibiwa no usiku kana no masikati, maindipagarisi.
40 Comasikati ndaipsa ngo zuva. Cousiku ndecitondhorehwa, hope ajicaiviyepi.
41 Izvi zvakaitika pa 20 o makore pandainga pa muzi penyu. Ndakamushandira ko makore anokwana kuita 14 kuti ndiwane vana venyu vovaviri, makore 6 kuti ndiwane mavhuta enyu. Imwimwi makacinja mupocero wangu ko gumi ro vhaza.
42 Kudari Mwari wa baba wangu, Mwari wa Abhirahama, anoreremejwaya ndi Izaki aacaingepi ku divi rangu maizondipindisa ndicina ciro. Mwari wakavona kutambujika kwangu no kusurura ziya kondaiita, ngo zvakamuitisa kuti amupangire usiku hwaperari.”
43 Perapo, Rabhani wakadavira Jakobe kuti: “Vasikane ava, vana vangu, vana vavovo ngo vangu, mushambi uwu nghwangu, zviro zvese zvauri kuvonari apa mbzangu no vana vangu. Icinyi cingandiitisa kuti ndivaitire zvakashata no vana vavovo vovakabarari?
44 Waro izai tiite citenderano inini na iwewe. Citenderano ici cinozoita ucapupu pakati pedu.”
45 Ngo kudaro, Jakobe wakatora buwe woriimisa kuti rive buwe ro cirangarijo.
46 Perapo, Jakobe wakavhunja hama jake kuti: “Bojeranyi mapuwe!” Ivona vakabojera mapuwe vomaita mututu. Pasure pazvo, vakahira panyezuru po mapuweo.
47 Rabhani wakadanija mututu wiya kuti Jegari-sahadhuta,* asi Jakobe wakaudanija kuti Garedhi.*
48 Perapo, Rabhani wakati: “Mututu wo mapuwe uwu unoita ucapupu pakati pangu na iwewe nyamasi.” Ngo zvakaitisa kuti audure zina rokuti Garedhi,
49 no zina rokuti Murindiri, ngokuti wakati: “Jehovha ngaenderere mberi acivonerera inini na iwewe patinonga takaparajana.
50 Kudari ukashaisha kutaja vana vangu, kudari ukaenda korovora vanakaji vamweni kuti vaende koita mbhwere jo vana vangu ava, pikija pacina mundhu umweni pakati pedu, ucakanganwa kuti Mwari anozova capupu pakati pedu.”
51 Rabhani wakaenderera mberi ecivhunja Jakobe kuti: “Uri pano mututu wo mapuwe uwu. Riri pano buwe ro cirangarijo rondaimisari pakati pangu na imwimwi.
52 Mututu wo mapuwe uwu ndiwona capupu. Buwe ro cirangarijo iri rinoita ucapupu kuti inini andizopindiriji mututu womapuwe uwu, kuti ndize kokukhuvaza. Iwewe auzopindirijivo mututu wo mapuwe uwu no buwe ro cirangarijo iri kuti uviye kondikhuvaza.
53 Mwari wa Abhirahama, Mwari wa Nahori na Mwari wo majibaba avo, ngaaite mutongi pakati pedu.” Jakobe wakapika nga wiya anoreremejwa ndi Izaki baba wake.
54 Pasure pazvo, Jakobe wakaita mupiro pa dundhu iri, wokoka hama jake kuti jihe zvokuha. Ngo kudaro, ivona vakaha vovata padundhupo usiku hwondhohwo.
55 Asi Rabhani wakamuka comangwanani wobhejhari vazukuru* vake no vana vake vokaji wovakomborera. Perapo, Rabhani wakapinda kwenda kanyi kwake.
Masoko o Pasi
^ Kana: “kukumba.”
^ Kana: “mandhenga o.”
^ Kana: “zvithombe zvopamuzi; zvithombe zvo materafimu.”
^ Kana kuti, Eufrati.
^ Kana: “ukama.”
^ Kana: “musango.”
^ Gama ngo Gama: “vana.”
^ Kana: “kurasha.”
^ I gama ro Ciaramaika rinonanga kuti “Njama yo Zvapupu.”
^ I gama ro Cihebheru rinonanga kuti “Njama yo Zvapupu.”
^ Gama ngo Gama: “vana.”
