Genesisi 32:1-32
32 Jakobe wakabata gwanja wopinda. Ngirozi ja Mwari jakasongana naye.
2 Jakobe paakandovona ngirozi jiya, iyena wakananga kudari: “Iyi i Akampamento ya Mwari!” Ngo kudaro, iyena wakadura ndau iyi zina ro kuti Mahanaimi.*
3 Tevere, Jakobe wakatuma ndhumwa kuti jiyende kuno hama yake Izau ku nyika yo Seiri mu ndharaundha yo Edhomi.
4 Iyena wakavavhunja kudari: “Izvi ndizvona zvamunodikana kuvhunja mambo wangu Izau, ‘Mushandiri wenyu Jakobe wananga kudari: “Inini ndakagara* na Rabhani kuvhira kare mbhera wari.
5 Inini ndakawana n’gombe, mbongoyo, mavhuta, no vashandiri vorume no vokaji. Asi ndamutumira masoko aya kuti ndiwane unyasha pamberi penyu mambo* wangu.”’”
6 Pakufamba ko nguva, ndhumwa jakaviya kuna Jakobe jonanga kudari: “Itusu tavonana navo hama yenyu Izau. Ivona vari kutoviya wari no vandhu vanokwana kuita 400 kuti vaviye kuzovonana na imwimwi.”
7 Jakobe wakathya maningi wothimwa-thimwa. Ngo kudaro, iyena wakapaura vandhu vaainga navo pomwe no mavhuta no n’gombe no makamera, woita akampamento mbiri.
8 Iyena wakati: “Kudari Izau akahwisa akampamento imwe, imweni inosara.”
9 Pasure pazvo, Jakobe wakananga kudari: “Nandi Mwari wa baba wangu Abhirahama na baba wangu Izaki, nandi Jehovha, imwimwi muri kundivhunja kuti, ‘Hwirirai kunyika yako ku ukama hwako. Inini ndinozokubesera kuti ugare ushoni,’
10 inini andifaneri kuashira rudo hwenyu hucikacinji no kugondeka kwamunoita ku mushandiri wenyu. Pandakaambuka murambo wo Jordhani, inini ndainga ndino ndonga iyi basi. Asi wari ndaano Akampamento mbiri.
11 Ndiri kumukumbira kuti mundiponese munyara ja nevanji wangu Izau. Inini ndiri kuvathya maningi. Ngokuti ivona vangaviya votaka inini no vanakaji no vana.
12 Imwimwi makananga kudari: ‘Zvokadi kamare inini ndinozokubesera kuti ugare ushoni. Ndinozoita kuti vana vako vawande maningi inga musanga wo mujombe zvokuti auverengeki.’”
13 Iyena wakavatepo usiku hwondhohwo. Perapo wakatora zvinyama zvinganani kuti zvipuwe Izau nevanji wake:
14 200 o mbuji jokaji, 20 o makoto-koto,* mavhuta okaji anokwana kuita 200, 20 o mavhuta orume,
15 30 o kamera jinomwisa no vana vajo, 40 o n’gombe jokaji, 10 ro mwombe* jorume, 20 o mbongoyo jokaji no 10 ro mbongoyo jo rume.
16 Iyena wakapekeja mushambi jiyani ku vashandiri vake, mushambi umwe na umwe, perapo wovavhunja kudari: “Tungamiranyi, mushambi iyi aivhiri kufamba phedo no phedo asi ngaifambe ndhambo na ndhambo.”
17 Iyena wakavhunja wokutanga kudari: “Kudari ukasongana na nevanji wangu Izau, perapo vokuvhunjisa kudari, ‘iwewe uri mushandiri waani? Uri kuenda kwapi? Mushambi waunawo waro ngowani? Uri kuenda nawo kwapi?’
18 Iwewe unodikana kunanga kudari: ‘Inini ndiri mushandiri wo mushandiri wenyu Jakobe, ivona vanasirira mushambi uwu kuti vamupekeje. Ivona vari kutotevera sure kwangu.’”
19 Iyena wakavhunjazve wocipiri no wocitatu no vese vainga vecikumbza mushambi kudari: “Mukambhera ngo kusongana na nevanji wangu Izau, vavhunjenyi masoko ondhowo.
20 Munodikanazve kuvavhunja kudari: ‘Mushandiri wenyu Jakobe ari kutevera sureyo.’” Ngokuti iyena wairangarira kudari: ‘Kudari ndikavafidhira* ngo zvipo izvi, ndoenda kovonana navo, ivona vangazondiashira ushoni.’
21 Ngo kudaro, zvipo zviya zvakatungamira, iyena wosara mu akampamento miya usikuhwo.
22 Pa kufamba ko nguva mu usiku hwondhohwo, Jakobe wakamuka wotora vakaji vake vaviri no vashandiri vake vaviri vokaji, wotorazve vana vake vanokwana kuita 11, woambuka murambo unodaninjwa kuti Jabhoki.
23 Ngo kudaro, iyena wakavatora wovaambusa mu murambowo no zvese zvaainga nazvo.
24 Pejisire, Jakobe wakasara ega. Perapo mwanarume umweni wakaviya wotakana naye mbhera kunja koeja.
25 Mwanarume wiyana paakavona kuti aaripi kukwanisa kunyisa Jakobe, wakamupsasa mu cihunu.* Cihunu cake cakanyeya paainga ecitakana naye.
26 Pasure pazvo, mwanarume wiya wakati: “Ndiregerei ndipinde ngokuti mbai-mbaipano koda kueja.” Asi Jakobe wakati: “Mucizivi kundikomborera, andizomuregeri.”
27 Mwanarume wiya wakamuvhunjisa kudari: “Zina rako ndiwe ani?” Iyena wakadavira kudari: “Ndini Jakobe.”
28 Mwanarume wiya wakati: “Zina rako arizodanijwizve kuti Jakobe, asi rinozozwi Iziraeri,* ngokuti iwewe wahwisana na Mwari no vandhu wovanyisa.”
29 Jakobe wakamuvhunjisa kudari: “Ndapota zina renyuvo ndimwi ani?” Asi mwanarume wiya wakati: “Ngenyi uri kuda kuziva zina rangu?” Perapo mwanarume wiya wakamukomborera pondhopo.
30 Ngo kudaro, Jakobe wakadura ndau iyi zina rokuti Peniyeri,* ngokuti iyena wakananga kudari: “Inini ndakwanisa kuvonana na Mwari meso ngo meso.”
31 Zuva rainga recibuda paainga ecivha Penuweri,* asi iyena wainga ecithobinya ngokuti cihunu* cake cainga canyeya.
32 Ndizvona zvinoitisa kuti vana vo Vaiziraeri, mbhera na nyamasi uno avahi mujira jiri mu cihunu,* ngokuti ndipona pakaremajwaya Jakobe.
Masoko o Pasi
^ Zina iri rinoreva kuti, “Akampamento Mbiri.”
^ Kana: “ndakagara ndiri murendo.”
^ Kana: “mambo.”
^ Kana: “mbuji yo rume.”
^ Kana: “n’gombe.”
^ Kana: “ndikavadhyekera.”
^ Vonanyi Kudurujihwa ko Magama.
^ Zina iri rinoreva kuti, “Wiya Anohwisana na Mwari” kana “Mwari Anohwa.”
^ Zina iri rinoreva kuti: “Kumeso ka Mwari.”
^ Kana: “Peniyeri.”
^ Vonanyi Kudurujihwa ko Magama.
^ Vonanyi Kudurujihwa ko Magama.
