Genesisi 33:1-20
33 Jakobe wakamusa majiso wovona Izau eciviya no vanarume vanokwana kuita 400. Ngo kudaro, Jakobe wakakasha vana vake, vamweni vova na Reya, vamweni na Rakeri, vamweni vova no vashandiri vake vaviri vokaji.
2 Iyena wakatora vashandiri vake vokaji no vana vavo, wovadira ngo kumbeji. Reya no vana vake ngo pakati, Rakeri na Josefa vosara sure.
3 Iyena wakavapindirija, wogwadama kanomwe mbhera woguma phedo no hama yake.
4 Asi Izau wakagogoma kuenda kosongana naye, wogumira kumukumbatira no kumubhejhari, vese vakacema* maningi.
5 Izau paakamusa majiso, wakavona vanakaji no vana, wovhunjisa kudari: “Mbhani ava vounavo wari?” Jakobe wakadavira kudari: “Ndivona vana vakapuwa muranda wenyu ndi Mwari ngo unyasha hwake.”
6 Vashandiri vake vokaji vakakhwedera no vana vavo, vogwadama.
7 Reya no vana vake vakakhwederavo vogwadama. Perapo, Josefa na Rakeri vakakhwederavo vogwadama.
8 Izau wakavhunjisa Jakobe kudari: “Ngenyi watumira vandhu vese vondasonganari navo?” Iyena wakadavira kuti: “Kuti ndiwane unyasha pamberi penyu.”
9 Izau wakazodavira kudari: “Inini ndino zviro zvakawanda hama yangu. Garai nazvo zviro zvakozvo.”
10 Asi Jakobe wakananga kudari: “Mucaita kudaro, ndapota! Kudari ndawana unyasha pamberi penyu, toranyi cipo cangu, ngokuti ndaciviisa kuti ndikwanise kuvona mumeso mwenyu. Ngo kuvona mumeso mwenyu kudari, zvaita inga kuti ndavona mumeso ma Mwari, ngokuti imwimwi mandiashira ushoni kamare.
11 Ndapota, toranyi cipo ici comaviisihwa, ngokuti Mwari wandiitira unyasha, wondipekeja zviro zvese zvondinoda.” Iyena waindomuvangirija mbhera woguma pa kutendera.
12 Pa kufamba ko nguva, Izau wakati: “Ngatimuke tipinde, ndisiyeyi nditungamire.”
13 Asi iyena wakati: “Munozviziva kuti vana vakaremba, cimwenizve ngo cokuti ndino mushambi wo mavhuta no n’gombe jiri kumwisa. Tikajivangirija pa njiku imwe basi, mushambi wese unofa.
14 Ndapota, ndinokumbira kuti mutungamire, asi inini ndinosara ndicifamba padoko-padoko ndiciseseja mushambi wangu no vana, mbhera ndigume ku Seiri komunogararo.”
15 Perapo Izau wakati: “Ndapota, nditenderei kuti ndikusiire vandhu vangu.” Iyena wakadavira kuti: “Mungazviitirenyi henyu? Ndinoda basi kuitihwa unyasha ndimwi.”
16 Pa njiku yondhoyo, Izau wakahwirira Seiri.
17 Jakobe wakaita hwendo mbhera Sukoti, wovaka nyumba yake no kuvaka cibaya* ro zvinyama zvake. Ngo zvakaitisa kuti ndauyo idanijwe kuti Sukoti.*
18 Paakapera kuita hwendo kuvha Padhani-arami, Jakobe wakaguma ushoni ku dhorobha ro Shekemi mu nyika yo Khanani, wovaka akampamento yake phedo no dhorobhero.
19 Pasure pazvo, wakawana minda waakatengesehwa ngo vana va Amori, baba wa Shekemi, ngo mangwenjere anokwana kuita 100, woimisemo tende yake mumindemo.
20 Mumindemo wakavakemo artari woidura zina rokuti Mwari, Mwari wo Vaiziraeri.
