Genesisi 38:1-30
-
Judha na Tamari (1-30)
38 Mu mazuva awo, Judha wakasiya hama jake, woenda kojimika tende yake phedo no mwanarume umweni anodanijwa kuti Hira, Muadhurami.
2 Kondhono, Judha wakavona musikane* umweni wo Mukhanani, anodanijwa kuti Shuwa. Ngo kudaro, wakamutora kuti avatane naye.
3 Iyena wakaita mimba, wobara mwana womudura zina rokuti Ere.
4 Iyena wakaitazve mimba, wobara mwana womudura zina rokuti Onani.
5 Tevere, wakazobarazve mwana umweni, womudura zina rokuti Shera. Judha, wainga ari ku Akizibhi, mukaji wake paakabara Shera.
6 Pakufamba ko nguva, Judha wakapsakira mukaji mwana wake wo dangwe, waidanijwa kuti Ere, musikanewo waidanijwa* kuti Tamari.
7 Asi Ere dangwe ra Judha, waiita zvakashata pamberi pa Jehovha. Ngo kudaro, Jehovha wakamuuraya.
8 Waro Judha wakazovhunja Onani kudari: “Vatanai na mwaramu wako, kuti ugare utaka mukaji wa nevanji wako, umusijire mubarihwana wa nevanji wako.”
9 Asi Onani waizviziva kuti vana vaizobahwaro avacaizovepi vake. Waro paaivatana na mwaramu wake, waidururira pasi mbeu yake, kuti atame kumusijira mubarihwana wa nevanji wake.
10 Zvaaiitaro zvainga zvakashata pamberi pa Jehovha. Ngo kudaro, wakamuuraya.
11 Judha wakavhunja Tamari nyamwana yake* kudari: “Endai kogara uri noni kumuzi ka baba wako mbhera mwana wangu Shera akure.” Ngokuti Judha wairangarira kudari mu mwoyo mwake: ‘Shera mwana wangu anozofavo inga hama yake.’ Ngo kudaro, Tamari wakaenda kogara ka baba wake.
12 Pakufamba ko nguva, mukaji wa Judha, mwana wa Shuwa wakafa. Judha wakatora mukuvo wakati kuti ari pa ciriro. Perapo wakazoenda ku vandhu vaigunda ukuse* wo mavhuta ake ku Timina no mudoni wake Hira, Muadhurami.
13 Tamari wakavhunjwa kudari: “Vatezvara vako vari kwenda Timina kogunda ukuse* wo mavhuta avo.”
14 Ngo kudaro, iyena wakavhisa nguvo jake jo unoni, wofukija kumeso ngo jira, wofuka nguvo imweni. Woenda kogara kumanghwiniro o Enaimi, mucitaka cinoenda* Timina. Ngokuti wainga wavona kuti Shera wainga akura, asi vatezvara vake avazivi kumuita kuti ave mukaji wa Shera.
15 Judha paakamuvona, wairangarira kuti i hure, ngokuti iyena wainga akafukija kumeso kwake.
16 Ngo kudaro, iyena wakaenda kwaari, mumbhiripiri mo citaka,* womuvhunja kuti: “Ndiri kuda kuvatana na iwewe,” ngokuti iyena aacaizvizivepi kuti wainga nyamwana yake.* Asi Tamari wakananga kudari: “Munozondipenyi kudari mukavatana na inini?”
17 Waro Judha wakananga kudari: “Ndinozokupekeja cimbuji co mushambi wangu.” Asi Tamari wakananga kudari: “Waro munondipa cibatiso mbhera munditumire?”
18 Judha wakamuvhunjisa kudari: “Iwewe unoda cibatiso cenyi?” Ngo kudaro, Tamari wakadavira kudari: “Ndinoda mbhete* yenyu yo cigondiso no mudhariya* wenyu no ndonga iri munyara mwenyumo.” Iyena wakamupekeja zvese woenda kovatana naye. Tamari wakaita mimba.
19 Pasure pazvo, Tamari wakamuka wobata gwanja rake wopinda, wovhisa nguvo jiya, wosimira nguvo jake jo unoni.
20 Judha wakatora cimbuji ciya wopekeja mudoni wake Muadhurami, kuti aende kotora zvibatiso zvaakapekeja mwanakaji wiya. Asi iyena aazivi kuzomuwana.
21 Mudoni wa Judha wiya, wakavhunjisa vandhu vaigara mu ndharaundhemo kudari: “Iri kwapi hure yo muthemberi iya, yaigaraya mumbhiripiri mo citaka co* Enaimi?” Asi ivona vakamudavira kudari: “Amuzivi kumbowanika hure yo muthemberi mu ndau muno.”
22 Pakupejisira, mwanarume wiya wakaenda ka Judha womuvhunja kudari: “Andizivi kumuwana mwanakaji wiya. Cimwenizve, vandhu vanogara kondhoyo vananga kuti: ‘Amuzivi kumbova no hure yo muthemberi muno.’”
23 Asi Judha wakananga kudari: “Ngaagare nazvo hake, inini ndaita zvondaikwanisa. Ndakutumira cimbuji kuti uyende komupekeja, asi auzivi kumuwana.”
24 Asi pasure po mweji mutatu, Judha wakavhunjwa kudari: “Tamari nyamwana yenyu yakahura.* Wari yataanomimba.” Waro Judha wakazonanga kudari: “Mubudisenyi kuti apiswe.”
25 Paainga ecibudiswa kunja, iyena wakatumira masoko kuna vatezvara vake okuti: “Inini ndino mimba yo muno wo zviro izvi.” Wotizve: “Nasanyi kuzvivona ushoni, muvone kuti ngozvani: Mbhete* yo cigondiso, mudhariya* no ndonga.”
26 Perapo, Judha wakazvisota wonanga kudari: “Iyena wakarurama kupinda inini, ngokuti andizivi kumupekeja mwana wangu Shera.” Kuvha pondhopo, iyena aazivi kuzovatanazve na Tamari.
27 Poyakaguma nguva yo kubara, iyena wakabara manyambiri.
28 Paainga ecibara, umwe wakabudisa mukono wake kunja. Waro mubeseri* wakatora uruji wokupsukirikira wosunga mukono wo mwana wiya ecinanga kuti: “Uwu ndiyena watanga kubuda.”
29 Asi paakandohwirija mukono wake mukati, hama yake yakabuda. Mubeseri* wonanga kuti: “Wajifunungurira gwanja guru!” Ngo kudaro wakaduhwa zina rokuti Perezi.*
30 Perapo, hama yake yainga no uruji wokupsukirikira yakabudavo, wodanijwa kuti Zera.
Masoko o Pasi
^ Tombozana.
^ Kana: “tombozaneyo yaidanijwa.”
^ Kana: “mukajimwana wake.”
^ Kana: “mandhenga.”
^ Kana: “mandhenga.”
^ Kana: “mu ruwa rinoenda.”
^ Kana: “ruwa.”
^ Kana: “mukajimwanake.”
^ Kana: “aneri.”
^ Kana: “muzororo.”
^ Kana: “ruwa ro.”
^ Kana: “Tamari mukajimwana wenyu wakahura.”
^ Kana: “aneri.”
^ Kana: “muzororo.”
^ Kana: “mucingi; nyamukuta.”
^ Kana: “mucingi; nyamukuta.”
^ Gama iri rinoreva kuti, “Kumweka,” kangaije zviri kuda kunangira kumwesa pokubuda ndipona.
