Genesisi 40:1-23
40 Pasure pazvo, mutungamiriri wo vaperekeri vo doro ra mambo wo Ejipita no mutungamiriri wo vabiki, vakashaishira patarau wavo, mambo wo Ejipita.
2 Ngo kudaro, Faro wakanyangajwa ngo vashandiri vake vaviri ava; mungwariri wo vaperekeri vo doro no mutungamiriri wo vabiki.
3 Iyena wakavafungira mu nyumba yo mutungamiriri wo vangwariri, kwaifungihwaya Josefa.
4 Perapo mutungamiriri wo vangwariri wakagaja Josefa kuti ave navo ecivangwarira, ivona vakagaremo pa mukuvo wakati kuti.*
5 Muperekeri wo doro no mubiki wa mambo wo Ejipita vakafungihwaya, umwe na umwe wavo, wakarota hope pa usiku hwondohwo. Hope ja umwe na umwe jainga no madurujirihwe akasiyana.
6 Kunja no kwaeja, Josefa paakaenda koovavona, wakavona kuti vainga vakasuruvara.*
7 Ngo kudaro, iyena wakavhunjisa vashandiri va Faro, vaingaya vafungihwa na iyena mu nyumba ya patarau wake kuti: “Makasuruvara* ngenyi nyamasi?”
8 Ivona vakamudavira kuti: “Tarota hope, asi atina mundhu anotidurujira.” Josefa wakavavhunja kuti: “Asipi Mwari anodurujira? Ndapota ndiverengerenyi hopejo.”
9 Ngo kudaro, mutungamiriri wo vaperekeri vo doro, wakavhunja Josefa hope jake, kudari: “Zvondakarota nga izvi: Ndakavona pambeji pangu pano muuvha.
10 Pa muuvhewo painga no matavi matatu. Iwona akabuda maruva okura, obara uvha joivha.
11 Kopo ya mambo Faro, yainga mu nyara yangu. Ndakatora uvha ndojisvinira mu kopo ya mambo Faro. Pasure pazvo, ndakavapekejazve.”
12 Josefa wakamuvhunja kuti: “Kudurujihwa kwajo nga uku: Matavi matatu injiku ndhatu.
13 Sure ko njiku ndhatu, mambo Faro anozomubudisa, womuhwirija ku basa renyu. Imwimwi munozoperekererazve mambo Faro inga zvomaiita kare pomaingaya mutungamiriri wo vaperekeri vo doro.
14 Asi, mucazondikanganwa zvikazomufambira ushoni. Ndapota, ndiitirenyivo rudo hucikacinji ngo kuzobhuyavo ngo pamusoro pangu pamberi pa mambo Faro, kuti ndizobudiswe mu ndau ino.
15 Kunasa kunanga, inini ndakaita ngo kubiwa ku nyika yo Vahebheru, apana condakashaisha muno kuti vandidire mu kadheya.”
16 Mutungamiriri wo vabiki paakavona kuti Josefa wadurujira ushoni hope jo muperekeri wo doro, wakamuvhunja kuti: “Zvondakarotavo nga izvi: Ndaithwara zvitengu zvitatu zvo* pau jo kucena pa musoro pangu.
17 Mu citengu* caingaro ngo panyezuru, mainga no mushovo wese wo zvokuha zvakabikihwa mambo Faro, kwaengazve no shiri jaiha zviro zvaingaro mu citengu caingaro pa musoro pangu.”
18 Perapo Josefa wakamudavira kuti: “Kudurujihwa kwajo nga uku: Zvitengu* zvitatu i njiku ndhatu.
19 Pasure po njiku ndhatu, mambo Faro vanozomugura musoro vomukohomera pa mutanda. Shiri jinozoha nyama yenyu.”
20 Njiku yocitatu, yainga njiku yo kubahwa ka Faro. Iyena wakaitira mabuso vashandiri vake vese, wobudisa mutungamiriri wo vaperekeri vo doro no mutungamiriri wo vabiki pamberi po vashandiri vake.
21 Iyena wakahwirija mutungamiriri wo vaperekeri vo doro pa basa rake, woenderera mberi eciperekerera Faro.
22 Asi Faro wakakohomera pa mutanda mutungamiriri wo vabiki, inga zvaakavadurujiraya Josefa.
23 Asi, mutungamiriri wo vaperekeri vo doro aazivi kuceukija Josefa, wakatozomukira kumukanganwa.
Masoko o Pasi
^ Gama ngo Gama: “pa njiku jakati kuti.”
^ Kana: “vakacamwa.”
^ Kana: “makacamwa.”
^ Kana: “sesto ndhatu jo.”
^ Kana: “sesto.”
^ Kana: “zvisesto.”
