Genesisi 42:1-38
42 Jakobe paakazwa kuti Ejipita kuno zvokuha, wakavhunja vana vake kudari: “Ngenyi muri kugara makandosotana?”
2 Iyena wakatizve: “Ndakazwa kuti kuno zvokuha ku Ejipita. Endanyi! Titengerenyi zvokuha, kuti tipone, titame kufa ngo njara.”
3 Ngo kudaro, gumi ro hama ja Josefa jakaenda Ejipita kotenga zvokuha.
4 Asi Jakobe aazivi kupindisa Bhenjamini hama ya Josefa, no hama jake jimweni, ngokuti iyena wakati: “Azviiti, ngokuti iyena kangaije angasonganazve no ngozi.”
5 Vana va Iziraeri vakaenda no vamweni vaiendavo kotenga zvokuha, ngokuti njara yainga yazara mu nyika yo Khanani.
6 Josefa ndiyena waitonga nyika. Ndiyenazve waitengesa zvokuha ku vandhu vese vo nyikeyo. Hama jake pajakaguma pamberi pake, vakakotamisa musoro pasi.
7 Josefa paakavona hama jake, wakavaziva. Asi iyena wakaita kuti ivona vatame kumuziva. Wakavereketa navo ngo hasha, wovavhunjisa kudari: “Munovha kwapi?” Ivona vakadavira kuti: “Tinovha Khanani, taviya kotenga zvokuha.”
8 Josefa wakaziva hama jake, asi ivona avazivi kumuziva.
9 Pondhopo kamare, Josefa wakaceukija hope jaakarotaya ngo pamusoro pavo, wovavhunja kuti: “Imwimwi muri vafei, maviya kopsaka ndau icizivi kujivirihwa yo ndau ino.”
10 Perapo ivona vakadavira kudari: “Andizvopi mambo wangu. Vashandiri venyu, vaviya kotenga zvokuha.
11 Tese tiri vana va baba umwe. Tiri vanarume vakagondeka. Vashandiri venyu asipi vafei.”
12 Asi iyena wakati: “Andizvopi zvamuri kunangaro. Maviya kopsaka ndau icizivi kujivirihwa yo nyika ino.”
13 Ivona vakati: “Itusu vashandiri venyu tinokwana kuita 12. Tiri vana va baba umwe mu nyika yo Khanani. Mwana womudoko wasara na baba vedu. Asi umweni aacipo.”
14 Asi Josefa wakananga kuti: “Ndizvona zvandamuvhunjaya kuti, ‘imwimwi muri vafei.’
15 Waro kuti ndivone kuti zvamuri kubhuyaro ndizvonadi, ngatiite kudari: Ndinopika ngo zina ra Faro, imwimwi amuzovhi pa ndau ino mbhera munukuna wenyu aviye kuno.
16 Wari tumanyi umwe wenyu kuti aende kotora munukuna wenyu kuti aviye naye. Imwimwi saranyi mwakasungwa kuno. Mukaita kudaro, zvamanangaro zvinozovoneka kuti ndizvonadi kamare. Kudari zviciripi izvona, ndinopika ngo zina ra Faro, imwimwi muri vafei.”
17 Ngo kudaro, wakavaita kuti vangwarihwe ko njiku ndhatu jese.
18 Pa njiku yocitatu, Josefa wakavavhunja kudari: “Inini ndinothya Mwari. Waro itanyi zvandinodari kumuvhunja pano kuti mupone.
19 Kudari imwimwi muri vanarume vakagondeka, hama yenyu imwe, ngaisare yakafungihwa. Asi vamweni ngavatore zvokuhwa kuti vaende koponesa ukama hwenyu.
20 Perapo moviisa munukuna wenyu, kuti ndive no cokwadi cokuti zvamanangaro ndizvona. Imwimwi amuzofi.” Ivona vakaita zvondhozvo.
21 Ivona vakavhunjana ngocavo kudari: “Itusu tiri kutambujwa ngo ndava yo hama yedu. Ngokuti takaivona icitambujika payaitideketerera kuti tiizwire pena, asi itusu atizivi kuizwa. Ngo zviri kuitisari kuti titambunjike kudari.”
22 Rubheni wakavavhunja kudari: “Andizivi kumuvhunja kuti ‘mucauraya mwana uwu’ imwimwi motama kuzwa? Wari tiri kudavira ngo ndava yo ngazi yake.”
23 Asi ivona avacaizvizivepi kuti Josefa waizvizwa. Ngokuti painga no mundhu waisanduja zvavaibhuyaro.
24 Ngo kudaro, iyena wakareya kuvha povaingaro wotanga kucema.* Paakahwirira wobhuyazve navo, wakatora Simiyoni womusunga ivona vacizvivona.
25 Josefa wakavhunja vandhu vake kuti vazaje saku jo hama jake ngo zvokuha, no kuvahwirijira mare yavo mu saku javo, no kuvapa mbuva kuti vazohe mugwanja. Ivona vakaita zvondhozvo.
26 Ivona vakapakija zvokuha zvavo pa mbongoyo javo, vopinda.
27 Umwe wavo paakafunungura saku kuti atore zvokuha kuti apekeje mbongoyo pa ndau yavaida kuvatira, wakavona mare yake yainga ngo panyezuru.
28 Paakavona izvi, wakavhunja hama jake kuti: “Vandihwirijira mare yangu, iri mu saku!” Ivona vakapera simba votetemera, vosotana ngocavo perapo voti: “Zvicinyi zvaatiitirari Mwari?”
29 Povakaguma Khanani, vakavhunja baba wavo Jakobe zvese zvakavaitikira, voti:
30 “Mwanarume ari kutonga nyikeyo wativereketera ngo hasha, wotivhunja kuti tiri kufeya nyikeyo.
31 Asi itusu tamuvhunja kuti, ‘tiri vanarume vakagondeka. Atiripi vafei.
32 Itusu tiri vana va baba umwe. Baba wedu vano vana vanokwana kuita 12. Umwe aacipo. Womudoko wasara na baba wedu mu nyika yo Khanani.’
33 Asi mwanarume ari kutonga nyikeyo wativhunja kuti: ‘Wari ndinozoziva kuti muri vanarume vakagondeka mukaita kudari: Siyanyi hama yenyu imwe na inini. Toranyi zvokuha kuti muende koponesa ukama hwenyu.
34 Ndiviisirenyi munukuna wenyu kuti ndizive kuti imwimwi amuripi vafei, asi muri vanarume vakagondeka. Inini, ndinozomuhwirijira hama yenyu. Imwimwi munozoenderera mberi muciviya kotenga zviro mu nyika ino.’”
35 Pavaivhisa zviro mu saku, mu saku ya umwe na umwe mwainga no mare yake. Ivona na baba wavo povakavona mare iyi, vakathya maningi.
36 Jakobe baba wavo wakananga kudari: “Mwandisiya ndicina vana. Josefa aacipo, Simiyoni aacipo. Wari muri kuda kunditorerazve Bhenjamini. Zvese izvi zvinondowira inini basi.”
37 Rubheni wakavhunja baba wake kudari: “Munozouraya vana vangu vovaviri kudari ndikatama kumuviisa. Mupekejenyi inini kuti ndimungwarire, ndinozoviyazve naye.”
38 Asi babake vakati: “Amuzoendi no mwana wangu. Ngokuti hama yake yakafa wosara ega. Kudari kwakaitika ngozi mugwanjemo, munozoita kuti inini ndiende mu guva no vhuji rangu rakacena, ndakanyangajwa.”
Masoko o Pasi
^ Kana: “kurira.”
